ਅੱਠ ਮੁਲਕਾਂ ਦੇ 200 ਕਰੋੜ ਲੋਕਾਂ ਨੂੰ ਖਤਰਾ!

ਵਿਗਿਆਨੀਆਂ ਨੇ ਜਤਾਈ ਸੰਭਾਵਨਾ
ਕਾਠਮਾਂਡੂ, 20 ਜੂਨ (ਹਮਦਰਦ ਨਿਊਜ਼ ਸਰਵਿਸ) : ਹਿਮਾਲਿਆ ਦੇ ਗਲੇਸ਼ੀਅਰ ਤੇਜ਼ੀ ਨਾਲ ਪਿਘਲ ਰਹੇ ਨੇ। ਵਿਗਿਆਨੀਆਂ ਨੇ ਵੱਡੀ ਸੰਭਾਵਨਾ ਜਤਾਈ ਹੈ ਕਿ ਸੰਨ 2100 ਤੱਕ ਹਿਮਾਲਿਆ ਦੇ 75 ਫੀਸਦੀ ਗਲੇਸ਼ੀਅਰ ਪਿਘਲ ਕੇ ਖਤਮ ਹੋ ਜਾਣਗੇ। ਇਸ ਕਾਰਨ 8 ਦੇਸ਼ਾਂ ਦੇ 200 ਕਰੋੜ ਲੋਕਾਂ ’ਤੇ ਖਤਰੇ ਦੇ ਬੱਦਲ ਮੰਡਰਾ ਸਕਦੇ ਨੇ।
ਵਿਗਿਆਨੀਆਂ ਨੇ ਵੱਡੇ ਖ਼ਤਰੇ ਦੀ ਸੰਭਾਵਨਾ ਜਤਾਉਂਦਿਆ ਕਿਹਾ ਕਿ 8 ਦੇਸ਼ਾਂ ਦੇ ਕਰੋੜਾਂ ਲੋਕਾਂ ਨੂੰ ਪਾਣੀ ਦੀ ਕਿੱਲਤ ਅਤੇ ਹੜ੍ਹ ਦੇ ਖ਼ਤਰੇ ਦਾ ਸਾਹਮਣਾ ਕਰਨਾ ਪਏਗਾ। ਇਨ੍ਹਾਂ 8 ਮੁਲਕਾਂ ਵਿੱਚ ਭਾਰਤ, ਪਾਕਿਸਤਾਨ, ਭੂਟਾਨ, ਅਫ਼ਗਾਨਿਸਤਾਨ, ਚੀਨ, ਮਿਆਂਮਾਰ, ਨੇਪਾਲ ਤੇ ਬੰਗਲਾਦੇਸ਼ ਸ਼ਾਮਲ ਹੈ।
ਕਾਠਮਾਂਡੂ ਦੇ ਇੰਟਰਨੈਸ਼ਨਲ ਸੈਂਟਰ ਫਾਰ ਇੰਟੀਗਰੇਟਡ ਮਾਊਂਟੇਨ ਡਿਵੈਲਪਮੈਂਟ ਨੇ ਇਸ ਸਬੰਧੀ ਜਾਣਕਾਰੀ ਸਾਂਝੀ ਕੀਤੀ ਹੈ। ਵਿਗਿਆਨੀਆਂ ਨੇ ਸੰਭਾਵਨਾ ਜਤਾਉਂਦਿਆਂ ਕਿਹਾ ਕਿ ਆਉਣ ਵਾਲੇ ਸਮੇਂ ਵਿੱਚ ਐਵਲਾਂਚ ਯਾਨੀ ਬਰਫ਼ ਦੇ ਤੋਦੇ ਡਿੱਗਣ ਜਾਂ ਬਰਫ਼ੀਲੇ ਤੂਫ਼ਾਨ ਦੀਆਂ ਘਟਨਾਵਾਂ ਤੇਜ਼ੀ ਨਾਲ ਵਧਣਗੀਆਂ। ਗਲੇਸ਼ੀਆ ਪਿਘਲਣ ਦਾ ਅਸਰ ਉਨ੍ਹਾਂ ਲੋਕਾਂ ’ਤੇ ਹੋਵੇਗਾ, ਜਿਨ੍ਹਾਂ ਨੇ ਗਲੋਬਲ ਵਾਰਮਿੰਗ ਕੀਤੀ ਹੀ ਨਹੀਂ ਹੈ।