Jio ਨੇ ਰਚਿਆ ਇਤਿਹਾਸ, ਚਾਈਨਾ ਮੋਬਾਈਲ ਨੂੰ ਪਛਾੜ ਕੇ ਬਣੀ ਦੁਨੀਆ ਦੀ ਨੰਬਰ 1 ਕੰਪਨੀ

ਨਵੀਂ ਦਿੱਲੀ (24 ਅਪ੍ਰੈਲ), ਰਜਨੀਸ਼ ਕੌਰ : ਭਾਰਤ ਦੇ ਦਿੱਗਜ ਕਾਰੋਬਾਰੀ ਤੇ ਸਭ ਤੋਂ ਅਮੀਰ ਆਦਮੀਆਂ ਵਿੱਚੋਂ ਇੱਕ ਮੁਕੇਸ਼ ਅੰਬਾਨੀ ਦੀ ਮਲਕੀਅਤ ਵਾਲੀ ਟੈਲੀਕਾਮ ਕੰਪਨੀ ਰਿਲਾਇੰਸ ਜੀਓ ਦਾ ਡੰਕਾ ਨਾ ਸਿਰਫ਼ ਭਾਰਤ ਵਿੱਚ ਸਗੋਂ ਪੂਰੀ ਦੁਨੀਆ ਵਿੱਚ ਵੱਜ ਰਿਹਾ ਹੈ। ਭਾਰਤ ਦੇ ਟੈਲੀਕਾਮ ਉਦਯੋਗ ਵਿੱਚ ਕ੍ਰਾਂਤੀ ਲਿਆਉਣ ਵਾਲੀ ਰਿਲਾਇੰਸ ਜੀਓ ਨੇ ਡਾਟਾ ਟਰੈਫਿਕ ਦੇ ਮਾਮਲੇ ਵਿੱਚ ਚੀਨੀ ਦਿੱਗਜ ਚਾਈਨਾ ਮੋਬਾਈਲ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ।

ਚੀਨੀ ਕੰਪਨੀ ਨੂੰ ਛੱਡਿਆ ਪਿੱਛੇ

ਮੁਕੇਸ਼ ਅੰਬਾਨੀ ਦੀ ਕੰਪਨੀ ਰਿਲਾਇੰਸ ਜਿਓ ਨੇ ਡਾਟਾ ਖਪਤ ਦੇ ਮਾਮਲੇ ‘ਚ ਵਿਸ਼ਵ ਰਿਕਾਰਡ ਬਣਾਇਆ ਹੈ। ਇਸ ਮਾਮਲੇ ‘ਚ ਰਿਲਾਇੰਸ ਜੀਓ ਨੇ ਦੁਨੀਆ ਦੀ ਨੰਬਰ ਇੱਕ ਡਾਟਾ ਖਪਤ ਕਰਨ ਵਾਲੀ ਚੀਨੀ ਕੰਪਨੀ ਚਾਈਨਾ ਮੋਬਾਈਲ ਨੂੰ ਪਿੱਛੇ ਛੱਡ ਦਿੱਤਾ ਹੈ। ਅਸਲ ‘ਚ ਪਿਛਲੀ ਤਿਮਾਹੀ ‘ਚ ਜੀਓ ਦਾ ਕੁੱਲ ਡਾਟਾ ਟ੍ਰੈਫਿਕ 40.9 ਐਕਸਾਬਾਈਟ ਦਰਜ ਕੀਤਾ ਗਿਆ ਸੀ, ਜਦਕਿ ਚੀਨੀ ਕੰਪਨੀ ਚਾਈਨਾ ਮੋਬਾਈਲ ਦਾ ਕੁੱਲ ਡਾਟਾ ਟ੍ਰੈਫਿਕ 40 ਐਕਸਾਬਾਈਟ ਦਰਜ ਕੀਤਾ ਗਿਆ ਸੀ।

ਦੁਨੀਆ ਭਰ ਦੀਆਂ ਟੈਲੀਕਾਮ ਕੰਪਨੀਆਂ ਦੇ ਡਾਟਾ ਟ੍ਰੈਫਿਕ ‘ਤੇ ਨਜ਼ਰ ਰੱਖਣ ਵਾਲੀ ਕੰਪਨੀ TAfficient ਨੇ ਆਪਣੀ ਰਿਪੋਰਟ ‘ਚ ਇਹ ਜਾਣਕਾਰੀ ਦਿੱਤੀ ਹੈ। ਉਨ੍ਹਾਂ ਤੋਂ ਇਲਾਵਾ ਮੁਕੇਸ਼ ਅੰਬਾਨੀ ਨੇ ਵੀ ਆਪਣੇ ਹਾਲ ਹੀ ਦੇ ਸਾਲਾਨਾ ਸਮਾਗਮ ਦੌਰਾਨ ਇਸ ਰਿਪੋਰਟ ਦਾ ਖੁਲਾਸਾ ਕੀਤਾ ਸੀ।

ਇਸ ਕਾਰਨ ਰਿਲਾਇੰਸ ਜੀਓ ਨੇ ਚੀਨੀ ਕੰਪਨੀ ਨੂੰ ਪਿੱਛੇ ਛੱਡ ਦਿੱਤਾ ਹੈ ਅਤੇ ਡਾਟਾ ਖਪਤ ਦੇ ਮਾਮਲੇ ‘ਚ ਦੁਨੀਆ ਦੀ ਨੰਬਰ 1 ਕੰਪਨੀ ਬਣ ਗਈ ਹੈ। ਇਸ ਸੂਚੀ ‘ਚ ਚੀਨ ਦੀ ਇੱਕ ਹੋਰ ਟੈਲੀਕਾਮ ਕੰਪਨੀ ਦਾ ਨਾਂ ਵੀ ਤੀਜੇ ਨੰਬਰ ‘ਤੇ ਹੈ ਅਤੇ ਭਾਰਤ ਦੀ ਏਅਰਟੈੱਲ ਕੰਪਨੀ ਦਾ ਨਾਮ ਚੌਥੇ ਨੰਬਰ ‘ਤੇ ਆਉਂਦਾ ਹੈ।

ਰਿਲਾਇੰਸ ਜੀਓ ਨੇ ਪਿਛਲੇ ਸਾਲ ਦੇ ਮੁਕਾਬਲੇ ਇਸ ਸਾਲ 35.2 ਫੀਸਦੀ ਜ਼ਿਆਦਾ ਡਾਟਾ ਖਪਤ ਕੀਤਾ ਹੈ। ਇੰਨੀ ਵੱਡੀ ਉਛਾਲ ਦਾ ਮੁੱਖ ਕਾਰਨ ਜੀਓ ਦੁਆਰਾ ਸ਼ੁਰੂ ਕੀਤੀ ਗਈ 5ਜੀ ਸੇਵਾ ਹੈ। ਜੀਓ ਨੇ ਭਾਰਤ ਦੇ ਹਜ਼ਾਰਾਂ ਸ਼ਹਿਰਾਂ ਵਿੱਚ 5ਜੀ ਸੇਵਾ ਸ਼ੁਰੂ ਕੀਤੀ ਹੈ। ਜੀਓ ਦੀ ਤਿਮਾਹੀ ਰਿਪੋਰਟ ਦੇ ਅਨੁਸਾਰ, 10 ਕਰੋੜ 80 ਲੱਖ ਗਾਹਕ Jio True 5G ਨਾਲ ਜੁੜੇ ਹੋਏ ਹਨ। ਹੁਣ ਤੱਕ, ਜੀਓ ਭਾਰਤ ਦੇ ਹਜ਼ਾਰਾਂ ਸ਼ਹਿਰਾਂ ਵਿੱਚ ਬਹੁਤ ਸਾਰੇ ਰੀਚਾਰਜ ਪਲਾਨ ਦੇ ਨਾਲ ਬੇਅੰਤ 5G ਸੇਵਾ ਬਿਲਕੁਲ ਮੁਫਤ ਪ੍ਰਦਾਨ ਕਰ ਰਿਹਾ ਹੈ, ਜਿਸ ਦਾ ਪ੍ਰਭਾਵ ਸਪੱਸ਼ਟ ਨਜ਼ਰ ਆ ਰਿਹਾ ਹੈ। ਜੀਓ ਦੇ ਕੁੱਲ ਡਾਟਾ ਟਰੈਫਿਕ ਦਾ 28 ਫੀਸਦੀ ਸਿਰਫ 5ਜੀ ਨੈੱਟਵਰਕ ਦੇ ਯੂਜ਼ਰਸ ਰਾਹੀਂ ਆ ਰਿਹਾ ਹੈ।