ਉਤਰ-ਪੱਛਮ ਰਾਜਾਂ ਵਿਚ 12 ਗੁਣਾ ਤੱਕ ਜ਼ਿਆਦਾ ਬਾਰਸ਼, ਦੋ ਦਿਨਾਂ ਵਿਚ 7 ਰਾਜਾਂ ਵਿਚ 31 ਲੋਕਾਂ ਦੀ ਮੌਤ
- ਪੰਜਾਬਭਾਰਤ
- June 27, 2023 6:58 am...
- No Comment
- 33
ਹਿਮਾਚਲ ਪ੍ਰਦੇਸ਼ ਵਿਚ 150 ਤੋਂ ਜ਼ਿਆਦਾ ਰੋਡ ਬੰਦ
ਨਵੀਂ ਦਿੱਲੀ, 27 ਜੂਨ, ਹ.ਬ. : ਕੁਝ ਦਿਨਾਂ ਦੀ ਸੁਸਤੀ ਤੋਂ ਬਾਅਦ ਮਾਨਸੂਨ ਲਗਭਗ ਪੂਰੇ ਉੱਤਰ ਅਤੇ ਉੱਤਰ ਪੱਛਮ ਭਾਰਤ ਵਿਚ ਪਹੁੰਚ ਗਿਆ ਹੈ। ਉਤਰ-ਪੱਛਮੀ ਰਾਜਾਂ ਵਿੱਚ 24 ਘੰਟਿਆਂ ਵਿੱਚ ਆਮ ਨਾਲੋਂ 2 ਤੋਂ 12 ਗੁਣਾ ਜ਼ਿਆਦਾ ਮੀਂਹ ਪਿਆ ਹੈ। ਮਾਨਸੂਨ ਸੋਮਵਾਰ ਨੂੰ ਪੰਜਾਬ ਅਤੇ ਗੁਜਰਾਤ ਵਿੱਚ ਅੱਗੇ ਵਧਿਆ। ਦੇਸ਼ ਦੇ ਪੂਰਬੀ, ਮੱਧ, ਉੱਤਰ-ਪੱਛਮ ਅਤੇ ਪੱਛਮੀ ਰਾਜਾਂ ਵਿੱਚ ਮਾਨਸੂਨ ਪੰਜ ਦਿਨ ਸਰਗਰਮ ਰਹੇਗਾ। ਅਗਲੇ 24 ਘੰਟਿਆਂ ’ਚ 24 ਸੂਬਿਆਂ ’ਚ ਭਾਰੀ ਮੀਂਹ ਦੀ ਸੰਭਾਵਨਾ ਹੈ। ਦੋ ਦਿਨਾਂ ਵਿੱਚ ਸੱਤ ਰਾਜਾਂ ਵਿੱਚ ਮੀਂਹ ਅਤੇ ਜ਼ਮੀਨ ਖਿਸਕਣ ਵਰਗੀਆਂ ਘਟਨਾਵਾਂ ਕਾਰਨ 31 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਨ੍ਹਾਂ ਵਿੱਚੋਂ 9 ਹਿਮਾਚਲ ਪ੍ਰਦੇਸ਼ ਵਿੱਚ, 6 ਮੁੰਬਈ ਵਿੱਚ, 6 ਰਾਜਸਥਾਨ ਵਿੱਚ, 2 ਹਰਿਆਣਾ ਅਤੇ 2 ਪੰਜਾਬ ਵਿਚ ਹੋਈਆਂ। ਇਸ ਤੋਂ ਇਲਾਵਾ ਛੱਤੀਸਗੜ੍ਹ ’ਚ ਅਸਮਾਨੀ ਬਿਜਲੀ ਡਿੱਗਣ ਕਾਰਨ 5 ਲੋਕਾਂ ਦੀ ਮੌਤ ਹੋ ਗਈ ਹੈ। ਦਿੱਲੀ ’ਚ ਕਰੰਟ ਲੱਗਣ ਨਾਲ 1 ਔਰਤ ਦੀ ਮੌਤ ਹੋ ਗਈ ਹੈ। ਹਿਮਾਚਲ ਦੇ ਮੰਡੀ ਜ਼ਿਲ੍ਹੇ ਵਿੱਚ 48 ਘੰਟਿਆਂ ਵਿੱਚ ਦੋ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਵਾਪਰੀਆਂ। ਇਸ ਕਾਰਨ ਚੰਡੀਗੜ੍ਹ-ਮਨਾਲੀ ਨੈਸ਼ਨਲ ਹਾਈਵੇ-21 ਦੋ ਥਾਵਾਂ ’ਤੇ ਘੰਟਿਆਂਬੱਧੀ ਬੰਦ ਰਿਹਾ। ਇਸ ਰੂਟ ’ਤੇ ਲੱਗਿਆ ਜਾਮ 20 ਘੰਟੇ ਬਾਅਦ ਖੁੱਲ੍ਹਿਆ। ਹੁਣ ਵੀ ਇੱਥੇ 150 ਸੜਕਾਂ ਬੰਦ ਹਨ। ਅੱਜ ਲਈ ਔਰੇਂਜ ਅਲਰਟ ਜਾਰੀ ਕੀਤਾ ਗਿਆ ਹੈ। ਸੂਬੇ ਵਿੱਚ 102.5 ਕਰੋੜ ਰੁਪਏ ਦਾ ਨੁਕਸਾਨ ਹੋਣ ਦੀ ਸੰਭਾਵਨਾ ਹੈ।