ਇੰਡੋਨੇਸ਼ੀਆ ’ਚ ਜਵਾਲਾਮੁਖੀ ਫਟਣ ਮਗਰੋਂ ਸੁਨਾਮੀ ਦਾ ਐਲਰਟ
- ਤਾਜ਼ਾ ਖਬਰਾਂਦੁਨੀਆ
- April 18, 2024 4:51 pm...
- No Comment
- 41
ਜਕਾਰਤਾ, 18 ਅਪ੍ਰੈਲ (ਵਿਸ਼ੇਸ਼ ਪ੍ਰਤੀਨਿਧ) : ਇੰਡੋਨੇਸ਼ੀਆ ਦੇ ਮਾਊਂਟ ਰੁਆਂਗ ਵਿਖੇ ਜਵਾਲਾਮੁਖੀ ਫਟਣ ਕਾਰਨ ਸੁਨਾਮੀ ਦਾ ਐਲਰਟ ਜਾਰੀ ਕਰਦਿਆਂ 11 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਟਿਕਾਣਿਆਂ ਵੱਲ ਲਿਜਾਇਆ ਗਿਆ ਹੈ। ਸਰਕਾਰ ਵੱਲੋਂ ਜਾਰੀ ਬਿਆਨ ਮੁਤਾਬਕ ਜਵਾਲਾ ਮੁਖੀ ਵਿਚ 24 ਘੰਟੇ ਦੌਰਾਨ 5 ਧਮਾਕੇ ਹੋਏ। ਡਿਜ਼ਾਸਟਰ ਮੈਨੇਜਮੈਂਟ ਦੇ ਅਧਿਕਾਰੀਆਂ ਨੇ ਅਗਲੇ 24 ਘੰਟੇ ਤੱਕ ਹਵਾਈ ਅੱਡਾ ਬੰਦ ਰੱਖਣ ਦੇ ਹੁਕਮ ਦਿਤੇ ਹਨ। ਜਵਾਲਾ ਮੁਖੀ ਵਿਚੋਂ ਐਨੀ ਤੇਜ਼ੀ ਨਾਲ ਲਾਵਾ ਨਿਕਲ ਰਿਹਾ ਹੈ ਕਿ ਇਸ ਨਾਲ ਸੁਨਾਮੀ ਆ ਸਕਦੀ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਮਾਊਂਟ ਰੁਆਂਗ ’ਤੇ ਪਹਿਲਾ ਧਮਾਕਾ ਮੰਗਲਵਾਰ ਰਾਤ ਪੌਣੇ ਦਸ ਵਜੇ ਹੋਇਆ ਅਤੇ ਇਸ ਮਗਰੋਂ ਲਗਾਤਾਰ ਵਕਫੇ ’ਤੇ ਧਮਾਕੇ ਹੋਣ ਲੱਗੇ। ਆਲੇ ਦੁਆਲੇ ਦੇ ਕਈ ਕਿਲੋਮੀਟਰ ਇਲਾਕੇ ਵਿਚ ਸੁਆਲ ਖਿੱਲਰ ਚੁੱਕੀ ਹੈ ਅਤੇ ਲਾਵਾ ਰੁਕਦਾ ਨਜ਼ਰ ਨਹੀਂ ਆ ਰਿਹਾ।
11 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਟਿਕਾਣਿਆਂ ’ਤੇ ਪਹੁੰਚਾਇਆ
ਇਥੇ ਦਸਣਾ ਬਣਦਾ ਹੈ ਕਿ 1871 ਵਿਚ ਇੰਡੋਨੇਸ਼ੀਆ ਵਿਚ ਹੁਣ ਤੱਕ ਦਾ ਸਭ ਤੋਂ ਵੱਡਾ ਜਵਾਲਾਮੁਖੀ ਧਮਾਕਾ ਹੋਇਆ ਸੀ। ਇੰਡੋਨੇਸ਼ੀਆ ਦਾ ਡਿਜ਼ਾਸਟਰ ਮੈਨੇਜਮੈਂਟ ਵਿਭਾਗ ਐਲਰਟ ਮੋਡ ’ਤੇ ਹੈ ਅਤੇ ਕਿਸੇ ਵੀ ਵੇਲੇ ਹੋਰ ਜ਼ਿਆਦਾ ਲੋਕਾਂ ਨੂੰ ਸੁਰੱਖਿਅਤ ਟਿਕਾਣਿਆਂ ਵੱਲ ਲਿਜਾਣਾ ਪੈ ਸਕਦਾ ਹੈ। ਇੰਡੋਨੇਸ਼ੀਆ ਵਿਚ ਇਸ ਵੇਲੇ 120 ਐਕਟਿਵ ਵੌਲਕੈਨੋ ਦੱਸੇ ਜਾ ਰਹੇ ਹਨ ਅਤੇ ਤਾਜ਼ਾ ਧਮਾਕੇ ਮਗਰੋਂ ਅਸਮਾਨ ਵਿਚ ਦੋ ਕਿਲੋਮੀਟਰ ਉਚਾਈ ਤੱਕ ਧੂੰਆਂ ਉਠਦਾ ਨਜ਼ਰ ਆਇਆ। ਹਵਾਈ ਅੱਡਾ ਬੰਦ ਹੋਣ ਕਾਰਨ ਚੀਨ, ਸਿੰਗਾਪੁਰ ਅਤੇ ਦੱਖਣੀ ਕੋਰੀਆ ਜਾਣ ਵਾਲੀਆਂ ਫਲਾਈਟਸ ਪ੍ਰਭਾਵਤ ਹੋਈਆਂ ਜਦਕਿ ਧਮਾਕਿਆਂ ਦਾ ਅਸਰ ਗੁਆਂਢੀ ਮੁਲਕ ਮਲੇਸ਼ੀਆ ਤੱਕ ਦੇਖਣ ਨੂੰ ਮਿਲ ਰਿਹਾ ਹੈ।