ਸਲਮਾਨ ਖਾਨ-ਪਰਿਣੀਤੀ ਚੋਪੜਾ ਦੇ ਸਾਥੀ ‘ਤੇ ਜਾਨਲੇਵਾ ਹਮਲਾ

ਆਗਰਾ : ਨੌਜਵਾਨ ਅਦਾਕਾਰ ਆਰੀਅਨ ਅਰੋੜਾ ਨਾਲ ਵੱਡਾ ਹਾਦਸਾ ਵਾਪਰ ਗਿਆ ਹੈ। ਆਗਰਾ ਵਿੱਚ ਉਸ ਉੱਤੇ ਜਾਨਲੇਵਾ ਹਮਲਾ ਹੋਇਆ ਸੀ। ਫਿਲਹਾਲ ਉਹ ਆਈਸੀਯੂ ਵਿੱਚ ਹੈ ਅਤੇ ਉਸਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਸਾਰਾ ਵਿਵਾਦ ਕਾਰ ਪਾਰਕਿੰਗ ਨੂੰ ਲੈ ਕੇ ਹੈ।

ਆਰੀਅਨ ਅਰੋੜਾ ‘ਜਬਰੀਆ ਜੋੜੀ’, ‘ਗੁੰਜਨ ਸਕਸੈਨਾ’, ‘ਰਾਧੇ’ ਵਰਗੀਆਂ ਫਿਲਮਾਂ ਅਤੇ ‘ਬ੍ਰੋਕਨ ਬਟ ਬਿਊਟੀਫੁੱਲ’, ‘ਸੁਲਤਾਨ ਆਫ ਦਿੱਲੀ’ ਵਰਗੀਆਂ ਫਿਲਮਾਂ ‘ਚ ਕੰਮ ਕਰ ਚੁੱਕਾ ਹੈ।

ਜਾਣਕਾਰੀ ਮੁਤਾਬਕ ਹਾਲਾਂਕਿ ਆਰੀਅਨ ਅਰੋੜਾ ਮੁੰਬਈ ‘ਚ ਰਹਿੰਦਾ ਹੈ ਅਤੇ ਉੱਥੇ ਕੰਮ ਕਰਨ ਦੇ ਨਾਲ-ਨਾਲ ਪੜ੍ਹਾਈ ਵੀ ਕਰਦਾ ਹੈ ਪਰ ਨਵੇਂ ਸਾਲ ‘ਤੇ ਉਹ ਆਗਰਾ ਸਥਿਤ ਆਪਣੇ ਘਰ ਆਇਆ ਸੀ। ਇੱਥੇ ਉਹ ਆਪਣੇ ਕੁਝ ਦੋਸਤਾਂ ਨਾਲ ਕ੍ਰਿਕਟ ਅਕੈਡਮੀ ਗਿਆ ਸੀ।

ਦੱਸਿਆ ਜਾ ਰਿਹਾ ਹੈ ਕਿ ਕਾਰ ਹਟਾਉਣ ਨੂੰ ਲੈ ਕੇ ਕੇਅਰਟੇਕਰ ਨਾਲ ਝਗੜਾ ਸ਼ੁਰੂ ਹੋ ਗਿਆ। ਲੜਾਈ ਇੰਨੀ ਵੱਧ ਗਈ ਕਿ ਕੇਅਰਟੇਕਰ ਨੇ ਆਰੀਅਨ ਦੇ ਸਿਰ ‘ਤੇ ਡੰਡੇ ਨਾਲ ਹਮਲਾ ਕਰ ਦਿੱਤਾ। ਉਹ ਜ਼ਖਮੀ ਹੋ ਕੇ ਉਥੇ ਹੀ ਡਿੱਗ ਪਿਆ। ਦੋਸਤਾਂ ਨੇ ਤੁਰੰਤ ਉਸ ਨੂੰ ਹਸਪਤਾਲ ਦਾਖਲ ਕਰਵਾਇਆ, ਜਿੱਥੇ ਉਸ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਉਸ ਦੇ ਸਿਰ ‘ਤੇ 12 ਟਾਂਕੇ ਲੱਗੇ ਹਨ।

ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਸ ਮੌਕੇ ‘ਤੇ ਪਹੁੰਚ ਗਈ। ਕੇਅਰਟੇਕਰ ਦੇ ਖਿਲਾਫ ਕਈ ਧਾਰਾਵਾਂ ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਫਿਲਹਾਲ ਉਹ ਫਰਾਰ ਹੈ ਅਤੇ ਉਸਦੀ ਭਾਲ ਜਾਰੀ ਹੈ।