ਮਹਾਰਾਸ਼ਟਰ ’ਚ ਬੱਸ ਹਾਦਸੇ ਦੌਰਾਨ 26 ਮੌਤਾਂ, ਕੀਨੀਆ ’ਚ ਟਰੱਕ ਨੇ ਲਈ 48 ਲੋਕਾਂ ਦੀ ਜਾਨ

ਬੁਲਢਾਣਾ, 1 ਜੁਲਾਈ (ਵਿਸ਼ੇਸ਼ ਪ੍ਰਤੀਨਿਧ) : ਮਹਾਰਾਸ਼ਟਰ ਦੇ ਬੁਲਢਾਣਾ ਵਿਖੇ ਸ਼ਨਿੱਚਰਵਾਰ ਵੱਡੇ ਤੜਕੇ ਇਕ ਬੱਸ ਨੂੰ ਅੱਗ ਲੱਗਣ ਕਾਰਨ ਤਿੰਨ ਬੱਚਿਆਂ ਸਣੇ 26 ਜਣੇ ਜਿਊਂਦੇ ਸੜ ਗਏ। ਬੱਸ ਵਿਚ 34 ਜਣੇ ਸਵਾਰ ਸਨ ਜਿਨ੍ਹਾਂ ਵਿਚੋਂ 8 ਨੂੰ ਸ਼ੀਸ਼ੇ ਤੋੜ ਕੇ ਬਾਹਰ ਕੱਢਿਆ ਗਿਆ। ਬੱਸ ਨਾਗਪੁਰ ਤੋਂ ਪੁਣੇ ਜਾ ਰਹੀ ਸੀ ਜਦੋਂ ਹਾਦਸਾ ਵਾਪਰਿਆ। ਪੁਲਿਸ ਮੁਤਾਬਕ ਟਾਇਰ ਫਟਣ ਕਾਰਨ ਬੱਸ ਬੇਕਾਬੂ ਹੋ ਗਈ ਅਤੇ ਖੰਭੇ ਵਿਚ ਵੱਜਣ ਮਗਰੋਂ ਡਿਵਾਈਡਰ ’ਤੇ ਜਾ ਚੜ੍ਹੀ। ਡੀਜ਼ਲ ਟੈਂਕ ਫਟਣ ਕਾਰਨ ਲੱਗੀ ਅੱਗ ਐਨੀ ਤੇਜ਼ੀ ਨਾਲ ਫੈਲੀ ਕਿ ਲੋਕਾਂ ਨੂੰ ਬਚਾਉਣਾ ਮੁਸ਼ਕਲ ਹੋ ਗਿਆ। ਦੂਜੇ ਪਾਸੇ ਕੀਨੀਆ ਵਿਚ ਇਕ ਬੇਕਾਬੂ ਟਰੱਕ ਨੇ ਪੈਦਲ ਲੋਕਾਂ ਨੂੰ ਦਰੜ ਦਿਤਾ ਅਤੇ 48 ਜਣਿਆਂ ਦੀ ਮੌਤ ਹੋ ਗਈ।