ਹੋਰਮੁਜ਼ ਸਟ੍ਰੇਟ 'ਚ ਮਾਰੇ ਗਏ ਤਿੰਨ ਭਾਰਤੀ, ਸਮੁੰਦਰੀ ਜਹਾਜ਼ 'ਚ ਮੱਲਾਹ ਸਨ ਤਿੰਨੇ ਭਾਰਤੀ

ਭਾਰਤ ਸਰਕਾਰ ਨੇ ਕੀਤੀ ਪੁਸ਼ਟੀ

ਨਵੀਂ ਦਿੱਲੀ: ਈਰਾਨ ਤੇ ਇਜ਼ਰਾਈਲ ਵਿਚਾਲ਼ੇ ਚੱਲ ਰਹੀ ਜੰਗ ਦੀ ਲਪੇਟ ਵਿੱਚ ਆ ਕੇ ਤਿੰਨ ਭਾਰਤੀਆਂ ਦੀ ਮੌਤ ਹੋ ਗਈ ਹੈ। ਇੱਕ ਭਾਰਤੀ ਲਾਪਤਾ ਵੀ ਦੱਸਿਆ ਜਾ ਰਿਹਾ ਹੈ। ਮਾਰੇ ਗਏ ਤਿੰਨੇ ਭਾਰਤੀ ਸਮੁੰਦਰੀ ਜਹਾਜ਼ ਵਿੱਚ ਸਵਾਰ ਮੱਲਾਹ ਸਨ। ਇਹ ਵਾਰਦਾਤ ਈਰਾਨ ਲਾਗਲੇ ਹੋਰਮੁਜ਼ ਜਲ–ਡਮਰੂ ਇਲਾਕੇ 'ਚ ਵਾਪਰੀ ਹੈ। ਭਾਰਤ ਸਰਕਾਰ ਨੇ ਵੀ ਆਪਣੇ ਤਿੰਨ ਨਾਗਰਿਕਾਂ ਦੇ ਹੋਰਮੁਜ਼ ਜਲ–ਡਮਰੂ ਖੇਤਰ ਵਿੱਚ ਮਾਰੇ ਜਾਣ ਦੀ ਪੁਸ਼ਟੀ ਕਰ ਦਿੱਤੀ ਹੈ। ਸਰਕਾਰ ਨੇ ਕਿਹਾ ਹੈ ਕਿ ਇਸ ਖ਼ਤਰਨਾਕ ਖੇਤਰ ਵਿੱਚੋਂ ਲੰਘ ਰਹੇ ਭਾਰਤੀ ਜਹਾਜ਼ਾਂ ਉਤੇ ਨੇੜਿਓਂ ਨਜ਼ਰ ਰੱਖੀ ਜਾ ਰਹੀ ਹੈ। ਦੇਸ਼ ਵਿੱਚ ਤੇਲ ਅਤੇ ਗੈਸ ਦੀ ਸਪਲਾਈ ਨੂੰ ਕਾਇਮ ਰੱਖਣ ਦੇ ਖ਼ਾਸ ਉਪਰਾਲੇ ਵੀ ਜਾਰੀ ਹਨ।

ਵਿਦੇਸ਼ ਮੰਤਰਾਲੇ ਨੇ ਓਮਾਨ ਵਿੱਚ ਭਾਰਤੀ ਨਾਗਰਿਕਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ। MEA ਦੇ ਬੁਲਾਰੇ ਰਣਧੀਰ ਜੈਸਵਾਲ ਨੇ ਕਿਹਾ ਕਿ ਮਸਕਟ ਵਿੱਚ ਦੋ ਭਾਰਤੀ ਨਾਗਰਿਕਾਂ ਦੀ ਮੌਤ ਹੋ ਗਈ। ਸਰਕਾਰੀ ਬੁਲਾਰੇ ਨੇ ਦੱਸਿਆ ਕਿ "ਅਸੀਂ ਉਨ੍ਹਾਂ ਦੇ ਪਰਿਵਾਰਾਂ ਪ੍ਰਤੀ ਆਪਣੀ ਡੂੰਘੀ ਸੰਵੇਦਨਾ ਪ੍ਰਗਟ ਕਰਦੇ ਹਾਂ"। ਦੋ ਪੀੜਤਾਂ ਦੀ ਪਛਾਣ ਅਸੀਮ ਆਰ ਮਹਾਜਨ ਅਤੇ ਸੁਹਾਸ ਵਜੋਂ ਹੋਈ ਹੈ।

ਇੱਥੇ ਦੱਸ ਦੇਈਏ ਕਿ ਪੱਛਮੀ ਏਸ਼ੀਆ ਵਿੱਚ ਹੋਰਮੁਜ਼ ਜਲ–ਡਮਰੂ ਇਲਾਕਾ ਕਾਫ਼ੀ ਤੰਗ ਹੈ ਪਰ ਇੱਥੋਂ ਦੀ ਸਮੁੰਦਰੀ ਮਾਲਵਾਹਕ ਬੇੜਿਆਂ ਨੂੰ ਲੰਘਣਾ ਪੈਂਦਾ ਹੈ। ਇਹ ਪੱਛਮੀ ਦੇਸ਼ਾਂ ਦੇ ਬਾਜ਼ਾਰਾਂ ਨਾਲ਼ ਜੋੜਨ ਵਾਲ਼ਾ ਰਸਤਾ ਹੈ। ਈਰਾਨ ਤੇ ਇਜ਼ਰਾਈਲ ਵਿਚਾਲ਼ੇ ਤਣਾਅ ਵਧਣ ਕਾਰਣ ਮੱਧ–ਪੂਰਬੀ ਤੇ ਪੱਛਮੀ ਏਸ਼ੀਆ ਦੇ ਦੇਸ਼ਾਂ ਵਿੱਚ ਤਣਾਅ ਫੈਲ ਗਿਆ ਹੈ ਤੇ ਚਿੰਤਾ ਵਧ ਗਈ ਹੈ।

ਸ਼ਿਪਿੰਗ ਮੰਤਰਾਲੇ ਦੇ ਵਿਸ਼ੇਸ਼ ਸਕੱਤਰ ਰਾਜੇਸ਼ ਕੇ ਸਿਨਹਾ ਨੇ ਕਿਹਾ ਕਿ ਹੋਰਮੁਜ਼ ਵਿੱਚ ਅਤੇ ਇਸ ਦੇ ਆਲੇ-ਦੁਆਲੇ ਕੰਮ ਕਰਨ ਵਾਲੇ ਭਾਰਤੀ ਜਹਾਜ਼ਾਂ ਉਤੇ ਨਿਰੰਤਰ ਨਿਗਰਾਨੀ ਰੱਖ ਰਹੀ ਹੈ।

ਉਨ੍ਹਾਂ ਦੱਸਿਆ ਕਿ "ਭਾਰਤੀ ਝੰਡੇ ਵਾਲਾ ਇੱਕ ਜਹਾਜ਼ ਅੱਜ ਹੋਰਮੁਜ਼ ਜਲਡਮਰੂ ਤੋਂ ਚਲਿਆ ਗਿਆ ਹੈ।" ਇਹ ਜਹਾਜ਼ ਹੋਰਮੁਜ਼ ਸਟ੍ਰੇਟ ਦੇ ਪੂਰਬ ਵਿੱਚ ਸਥਿਤ ਸੀ ਅਤੇ ਉਸਨੂੰ ਰਸਤੇ ਨੂੰ ਪਾਰ ਕਰਨ ਦੀ ਜ਼ਰੂਰਤ ਨਹੀਂ ਸੀ।

ਬੁਲਾਰੇ ਨੇ ਦੱਸਿਆ,"ਇਹ ਜਹਾਜ਼ ਭਾਰਤ ਨਹੀਂ ਆ ਰਿਹਾ ਹੈ, ਸਗੋਂ ਇਹ ਅਫਰੀਕਾ ਜਾ ਰਿਹਾ ਹੈ"।

ਸਿਨਹਾ ਨੇ ਕਿਹਾ ਕਿ ਅਧਿਕਾਰੀ ਖੇਤਰ ਵਿੱਚ ਸਾਰੇ ਭਾਰਤੀ ਜਹਾਜ਼ਾਂ ਦੀ ਨਿਗਰਾਨੀ ਕਰ ਰਹੇ ਹਨ ਅਤੇ ਸ਼ਿਪਿੰਗ ਕੰਪਨੀਆਂ ਨਾਲ ਨੇੜਿਓਂ ਤਾਲਮੇਲ ਕਰ ਰਹੇ ਹਨ।

ਖਾੜੀ ਵਿੱਚ ਸਮੁੰਦਰੀ ਗਤੀਵਿਧੀਆਂ ਦੀ ਇੱਕ ਵਿਆਪਕ ਤਸਵੀਰ ਵਿਖਾਉਂਦਿਆਂ ਸਿਨਹਾ ਨੇ ਕਿਹਾ ਕਿ ਕਈ ਭਾਰਤੀ ਝੰਡੇ ਵਾਲੇ ਜਹਾਜ਼ ਅਤੇ ਸੈਂਕੜੇ ਸਮੁੰਦਰੀ ਜਹਾਜ਼ ਹੋਰਮੁਜ਼ ਜਲ–ਡਮਰੂ ਦੇ ਆਲੇ-ਦੁਆਲੇ ਪਾਣੀਆਂ ਵਿੱਚ ਰਹਿੰਦੇ ਹਨ।

ਬੁਲਾਰੇ ਮੁਤਾਬਕ “ਫਾਰਸੀ ਖਾੜੀ ਵਿੱਚ, ਹੋਰਮੁਜ਼ ਜਲ–ਡਮਰੂ ਦੇ ਪੱਛਮ ਵੱਲ, ਭਾਰਤੀ ਝੰਡੇ ਵਾਲੇ 24 ਜਹਾਜ਼ ਹਨ ਜਿਨ੍ਹਾਂ ਵਿੱਚ ਕੁੱਲ 677 ਭਾਰਤੀ ਸਮੁੰਦਰੀ ਜਹਾਜ਼ ਹਨ।”

“ਪੂਰੇ ਖਾੜੀ ਖੇਤਰ ਵਿੱਚ ਲਗਭਗ 23,000 ਭਾਰਤੀ ਮੱਲਾਹ ਕੰਮ ਕਰ ਰਹੇ ਹਨ, ਜੋ ਵਪਾਰੀ ਜਹਾਜ਼ਾਂ ਅਤੇ ਆਫਸ਼ੋਰ ਜਹਾਜ਼ਾਂ ਉਤੇ ਸਵਾਰ ਹਨ।”

ਬੁਲਾਰੇ ਨੇ ਦੱਸਿਆ,"ਡਾਇਰੈਕਟੋਰੇਟ ਜਨਰਲ ਆਫ਼ ਸ਼ਿਪਿੰਗ ਉਨ੍ਹਾਂ ਸਾਰਿਆਂ ਨਾਲ ਆਪਣੀਆਂ ਸਬੰਧਤ ਏਜੰਸੀਆਂ ਰਾਹੀਂ ਨਿਰੰਤਰ ਸੰਪਰਕ ਬਣਾਈ ਰੱਖਦਾ ਹੈ।" ਉਸ ਨੇ ਦੱਸਿਆ ਕਿ ਇਸ ਖੇਤਰ ਭਰ ਵਿੱਚ ਤਣਾਅ ਜਾਰੀ ਹੈ, ਸਰਕਾਰ ਨੇ ਭਾਰਤੀ ਨਾਗਰਿਕਾਂ ਦੀ ਸਹਾਇਤਾ ਲਈ ਇੱਕ ਕੰਟਰੋਲ ਰੂਮ ਸਥਾਪਤ ਕੀਤਾ ਹੈ।

ਜੈਸਵਾਲ ਨੇ ਕਿਹਾ ਕਿ ਇਹ ਸਹੂਲਤ 4 ਮਾਰਚ ਨੂੰ ਸਥਾਪਤ ਕੀਤੀ ਗਈ ਸੀ ਅਤੇ ਮਦਦ ਜਾਂ ਜਾਣਕਾਰੀ ਮੰਗਣ ਵਾਲੇ ਲੋਕਾਂ ਤੋਂ ਸੈਂਕੜੇ ਬੇਨਤੀਆਂ ਪ੍ਰਾਪਤ ਹੋਈਆਂ ਹਨ। “ਹੁਣ ਤੱਕ ਸਾਨੂੰ ਲਗਭਗ 900 ਫੋਨ ਕਾਲਾਂ ਅਤੇ 200 ਈਮੇਲ ਪ੍ਰਾਪਤ ਹੋਏ ਹਨ,” ਉਨ੍ਹਾਂ ਕਿਹਾ, ਅਤੇ ਕਿਹਾ ਕਿ ਬੇਨਤੀਆਂ ਦੀ ਗਿਣਤੀ ਹੌਲੀ-ਹੌਲੀ ਘੱਟ ਗਈ ਹੈ।

ਭਾਰਤ ਪੱਛਮੀ ਏਸ਼ੀਆ ਦੇ ਦੇਸ਼ਾਂ ਨਾਲ ਕੂਟਨੀਤਕ ਸਬੰਧ ਵੀ ਬਣਾਈ ਰੱਖ ਰਿਹਾ ਹੈ। ਜੈਸਵਾਲ ਨੇ ਦੱਸਿਆ ਕਿ “ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਈਰਾਨੀ ਲੀਡਰਸ਼ਿਪ ਨਾਲ ਗੱਲ ਕੀਤੀ ਹੈ ਅਤੇ ਉੱਥੇ ਭਾਰਤੀਆਂ ਦੀ ਸੁਰੱਖਿਆ ਬਾਰੇ ਡੂੰਘੀ ਚਿੰਤਾ ਪ੍ਰਗਟ ਕੀਤੀ ਹੈ”।