ਸਿੱਧੂ ਮੂਸੇਵਾਲ਼ਾ ਕੇਸ ਦੀ ਸੁਣਵਾਈ 'ਚ ਆਈ ਤੇਜ਼ੀ, ਗਵਾਹਾਂ ਦੇ ਬਿਆਨ ਮਾਨਸਾ ਅਦਾਲਤ 'ਚ ਹੋਏ ਦਰਜ

ਅਗਲੀ ਸੁਣਵਾਈ 10 ਅਪ੍ਰੈਲ ਨੂੰ

ਮਾਨਸਾ: ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲਾ ਦੇ ਕਤਲ ਕੇਸ ਵਿੱਚ ਮਾਨਸਾ ਦੀ ਅਦਾਲਤ ਵਿੱਚ ਸੁਣਵਾਈ ਜਾਰੀ ਹੈ। ਸ਼ੁੱਕਰਵਾਰ ਨੂੰ ਅਦਾਲਤ ਵਿੱਚ ਕਈ ਗਵਾਹਾਂ ਦੇ ਬਿਆਨ ਦਰਜ ਕੀਤੇ ਗਏ। ਇਸ ਨਾਲ ਹੁਣ ਤੱਕ ਕੁੱਲ 15 ਗਵਾਹਾਂ ਨੇ ਅਦਾਲਤ ਵਿੱਚ ਆਪਣੀ ਗੱਲ ਕਹਿ ਦਿੱਤੀ ਹੈ। ਅਗਲੀ ਸੁਣਵਾਈ ਆਉਂਦੀ 10 ਅਪ੍ਰੈਲ ਨੂੰ ਰੱਖੀ ਗਈ ਹੈ। ਅੱਜ ਜਿੰਨੀ ਤੇਜ਼ੀ ਨਾਲ਼ ਗਵਾਹ ਭੁਗਤਾਏ ਗਏ, ਇਸ ਤੋਂ ਪਹਿਲਾਂ ਅਦਾਲਤ ਇਸ ਮਾਮਲੇ ਵਿੱਚ ਕਦੇ ਇੰਨੀ ਤੇਜ਼ ਰਫ਼ਤਾਰ ਨਾਲ਼ ਸੁਣਵਾਈ ਕਰਦੀ ਨਹੀਂ ਵੇਖੀ ਗਈ।

ਇਸ ਕੇਸ ਦੇ ਵਕੀਲ ਸਤਿੰਦਰ ਪਾਲ ਸਿੰਘ ਮਿੱਤਲ ਨੇ ਦੱਸਿਆ ਕਿ ਅੱਜ ਦੀ ਸੁਣਵਾਈ ਵਿੱਚ ਗਵਾਹਾਂ ਨੇ ਆਪਣੇ ਬਿਆਨ ਦਿੱਤੇ। ਪਹਿਲਾਂ ਉਨ੍ਹਾਂ ਲੋਕਾਂ ਦੇ ਬਿਆਨ ਲਏ ਗਏ ਸਨ ਜੋ ਘਟਨਾ ਵਾਲੇ ਦਿਨ ਮੂਸੇਵਾਲਾ ਨਾਲ ਗੱਡੀ ਵਿੱਚ ਸਨ। ਇਹ ਗਵਾਹ ਬਹੁਤ ਮਹੱਤਵਪੂਰਨ ਹਨ ਕਿਉਂਕਿ ਉਹ ਘਟਨਾ ਦੇ ਸਮੇਂ ਦੀ ਪੂਰੀ ਤਸਵੀਰ ਦੱਸ ਸਕਦੇ ਹਨ। ਇਨ੍ਹਾਂ ਗਵਾਹੀਆਂ ਨਾਲ ਅਦਾਲਤ ਨੂੰ ਘਟਨਾ ਕਿਵੇਂ ਵਾਪਰੀ ਸੀ ਇਸ ਨੂੰ ਸਮਝਣ ਵਿੱਚ ਮਦਦ ਮਿਲ ਰਹੀ ਹੈ।

ਪਰ ਅੱਜ ਇੱਕ ਮਹੱਤਵਪੂਰਨ ਗਵਾਹ ਸਿੱਧੂ ਮੂਸੇਵਾਲ਼ਾ ਦੇ ਪਿਤਾ ਬਲਕੌਰ ਸਿੰਘ ਅਦਾਲਤ ਵਿੱਚ ਨਹੀਂ ਪਹੁੰਚ ਸਕੇ। ਉਨ੍ਹਾਂ ਦਾ ਬਿਆਨ ਹਾਲ਼ੇ ਪੂਰਾ ਨਹੀਂ ਦਰਜ ਹੋਇਆ। ਵਕੀਲ ਨੇ ਕਿਹਾ ਕਿ ਅਗਲੀ ਸੁਣਵਾਈ ਵਿੱਚ ਬਲਕੌਰ ਸਿੰਘ ਅਤੇ ਹੋਰ ਗਵਾਹਾਂ ਨੂੰ ਜ਼ਰੂਰ ਪੇਸ਼ ਹੋਣਾ ਚਾਹੀਦਾ ਹੈ। ਅਦਾਲਤ ਨੇ ਵੀ ਇਸ ਬਾਰੇ ਨਿਰਦੇਸ਼ ਦਿੱਤੇ ਹਨ।

ਸਿੱਧੂ ਮੂਸੇਵਾਲਾ ਨੂੰ 29 ਮਈ 2022 ਨੂੰ ਮਾਨਸਾ ਜ਼ਿਲ੍ਹੇ ਦੇ ਜਵਾਹਰ ਕੇ ਪਿੰਡ ਨੇੜੇ ਗੱਡੀ ਵਿੱਚ ਬੈਠੇ ਹੋਏ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਉਸ ਵੇਲੇ ਉਹ 28 ਸਾਲ ਦੇ ਸਨ। ਇਸ ਕਤਲ ਨੇ ਪੂਰੇ ਪੰਜਾਬ ਅਤੇ ਪੰਜਾਬੀ ਸੰਗੀਤ ਦੁਨੀਆ ਨੂੰ ਹਿਲਾ ਕੇ ਰੱਖ ਦਿੱਤਾ ਸੀ। ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਅਤੇ ਗੋਲਡੀ ਬਰਾੜ ਨੇ ਇਸ ਦੀ ਜ਼ਿੰਮੇਵਾਰੀ ਲਈ ਸੀ। ਕੇਸ ਵਿੱਚ 30 ਤੋਂ ਵੱਧ ਮੁਲਜ਼ਮ ਹਨ ਅਤੇ ਇਹ ਪੰਜਾਬ ਦੇ ਸਭ ਤੋਂ ਵੱਡੇ ਕੇਸਾਂ ਵਿੱਚੋਂ ਇੱਕ ਹੈ।

ਬੀਤੇ ਦਿਨੀਂ ਸੁਪਰੀਮ ਕੋਰਟ ਇਸ ਮਾਮਲੇ ਦੇ ਦੋ ਮੁਲਜ਼ਮਾਂ ਪਵਨ ਬਿਸ਼ਨੋਈ ਅਤੇ ਜਗਤਾਰ ਸਿੰਘ ਨੂੰ ਜ਼ਮਾਨਤ ਦੇ ਚੁੱਕੀ ਹੈ।

ਮੂਸੇਵਾਲਾ ਦੇ ਪਰਿਵਾਰ ਅਤੇ ਪ੍ਰਸ਼ੰਸਕਾਂ ਨੂੰ ਨਿਆਂ ਮਿਲਣ ਦੀ ਉਮੀਦ ਹੈ। ਅਦਾਲਤ ਹੁਣ ਸਬੂਤਾਂ, ਗਵਾਹੀਆਂ ਅਤੇ ਹੋਰ ਪਹਿਲੂਆਂ ਨੂੰ ਧਿਆਨ ਨਾਲ ਵੇਖ ਰਹੀ ਹੈ। ਅਗਲੀ ਸੁਣਵਾਈ ਵਿੱਚ ਹੋਰ ਵੱਡੀ ਪ੍ਰਗਤੀ ਹੋ ਸਕਦੀ ਹੈ। ਇਹ ਕੇਸ ਨਾ ਸਿਰਫ ਇੱਕ ਮਸ਼ਹੂਰ ਗਾਇਕ ਦੇ ਕਤਲ ਦਾ ਮਾਮਲਾ ਹੈ, ਸਗੋਂ ਪੰਜਾਬ ਵਿੱਚ ਗੈਂਗਸਟਰਵਾਦ ਅਤੇ ਸੁਰੱਖਿਆ ਨਾਲ ਜੁੜੇ ਵੱਡੇ ਸਵਾਲ ਵੀ ਚੁੱਕ ਰਿਹਾ ਹੈ।