ਅਗਲੇ ਮਹੀਨੇ ਤੋਂ ਬਣਨਾ ਸ਼ੁਰੂ ਹੋਵੇਗਾ ਟ੍ਰਿਬਿਊਨ ਚੌਕ, ਚੰਡੀਗੜ੍ਹ ਦਾ ਫ਼ਲਾਈਓਵਰ

30 ਮਹੀਨਿਆਂ 'ਚ ਮੁਕੰਮਲ ਹੋਵੇਗੀ ਸਮੁੱਚੀ ਉਸਾਰੀ

1.65 ਕਿਲੋਮੀਟਰ ਹੋਵੇਗੀ ਫ਼ਲਾਈਓਵਰ ਦੀ ਲੰਬਾਈ

ਚੰਡੀਗੜ੍ਹ: ਚੰਡੀਗੜ੍ਹ ਦੇ ਸਭ ਤੋਂ ਰੁਝੇਵਿਆਂ ਨਾਲ਼ ਭਰਪੂਰ ਟ੍ਰਿਬਿਊਨ ਚੌਕ ਉੱਤੇ ਫਲਾਈਓਵਰ ਬਣਾਉਣ ਦਾ ਕੰਮ ਅਗਲੇ ਮਹੀਨੇ ਤੋਂ ਸ਼ੁਰੂ ਹੋਣ ਵਾਲਾ ਹੈ। ਇਸ ਪ੍ਰੋਜੈਕਟ ਲਈ ਟੈਂਡਰ ਖੋਲ੍ਹੇ ਗਏ ਸਨ ਅਤੇ ਸਿੰਗਲਾ ਕੰਸਟ੍ਰਕਸ਼ਨ ਲਿਮਿਟਿਡ ਨੇ 147.98 ਕਰੋੜ ਰੁਪਏ ਵਿਚ ਸਭ ਤੋਂ ਘੱਟ ਬੋਲੀ ਲਗਾ ਕੇ ਠੇਕਾ ਲੈ ਲਿਆ ਹੈ। ਇਹ ਰਕਮ ਸਰਕਾਰੀ ਅਨੁਮਾਨ ਤੋਂ ਲਗਭਗ 31 ਫੀਸਦੀ ਘੱਟ ਹੈ। ਇਹ ਸਿਰਫ ਇੱਕ ਫਲਾਈਓਵਰ ਨਹੀਂ, ਬਲਕਿ 1.65 ਕਿਲੋਮੀਟਰ ਲੰਬਾ ਇੰਟੀਗ੍ਰੇਟਿਡ ਕੌਰੀਡੋਰ ਹੋਵੇਗਾ। ਇਸ ਨੂੰ 30 ਮਹੀਨਿਆਂ ਵਿਚ ਪੂਰਾ ਕੀਤਾ ਜਾਵੇਗਾ। ਇਸ ਨਾਲ ਚੰਡੀਗੜ੍ਹ ਵਿਚ ਟ੍ਰੈਫਿਕ ਜਾਮ ਤੋਂ ਬਹੁਤ ਰਾਹਤ ਮਿਲੇਗੀ।

ਚੰਡੀਗੜ੍ਹ ਦੇ ਟ੍ਰਿਬਿਊਨ ਚੌਕ ਉੱਤੇ ਫਲਾਈਓਵਰ ਬਣਾਉਣ ਦੀ ਯੋਜਨਾ ਲੰਬੇ ਸਮੇਂ ਤੋਂ ਚੱਲ ਰਹੀ ਸੀ। ਬੱਸ ਹੁਣ ਇਹ ਸਿਰਫ਼ ਢਾਈ ਸਾਲ ਦੂਰ ਰਹਿ ਗਿਆ ਹੈ। ਵਿੱਤੀ ਬੋਲੀ ਖੋਲ੍ਹਣ ਤੋਂ ਬਾਅਦ ਸਿੰਗਲਾ ਕੰਸਟ੍ਰਕਸ਼ਨ ਲਿਮਿਟਿਡ ਨੇ 147.98 ਕਰੋੜ ਰੁਪਏ ਵਿਚ ਠੇਕਾ ਆਪਣੇ ਨਾਂ ਕਰਵਾ ਲਿਆ ਹੈ। ਇਹ ਰਕਮ ਪ੍ਰਸ਼ਾਸਨ ਵੱਲੋਂ ਲਗਾਏ ਗਏ ਅਨੁਮਾਨ 214.66 ਕਰੋੜ ਰੁਪਏ ਤੋਂ ਕਰੀਬ 31 ਫੀਸਦੀ ਘੱਟ ਹੈ। ਇਸ ਨਾਲ ਸਰਕਾਰੀ ਖਜ਼ਾਨੇ ਨੂੰ ਵੀ ਬਹੁਤ ਬਚਤ ਹੋਵੇਗੀ।

ਇਸ ਟੈਂਡਰ ਵਿਚ ਦੇਸ਼ ਭਰ ਤੋਂ 12 ਵੱਡੀਆਂ ਨਿਰਮਾਣ ਕੰਪਨੀਆਂ ਨੇ ਹਿੱਸਾ ਲਿਆ ਸੀ। ਤਕਨੀਕੀ ਜਾਂਚ ਤੋਂ ਬਾਅਦ 8 ਕੰਪਨੀਆਂ ਯੋਗ ਪਾਈਆਂ ਗਈਆਂ ਅਤੇ 4 ਕੰਪਨੀਆਂ ਦੇ ਟੈਂਡਰ ਖਾਰਜ ਕਰ ਦਿੱਤੇ ਗਏ। ਸਿੰਗਲਾ ਕੰਪਨੀ ਨੇ ਸਭ ਤੋਂ ਘੱਟ ਰੇਟ ਲਗਾ ਕੇ ਇਸ ਦੌੜ ਵਿਚ ਜਿੱਤ ਹਾਸਲ ਕੀਤੀ ਹੈ।

ਇਹ ਪ੍ਰੋਜੈਕਟ ਇੱਕ ਆਮ ਫਲਾਈਓਵਰ ਨਹੀਂ ਹੈ। ਇਹ ਇੱਕ ਇੰਟੀਗ੍ਰੇਟਿਡ ਕਾਰੀਡੋਰ ਹੋਵੇਗਾ ਜਿਸ ਦੀ ਕੁੱਲ ਲੰਬਾਈ 1.65 ਕਿਲੋਮੀਟਰ ਹੋਵੇਗੀ। ਇਸ ਵਿਚ 1442 ਮੀਟਰ ਲੰਬਾ ਫਲਾਈਓਵਰ ਅਤੇ 519 ਮੀਟਰ ਲੰਬਾ ਅੰਡਰਪਾਸ ਵੀ ਸ਼ਾਮਲ ਹੋਵੇਗਾ। ਇਸ ਨੂੰ 30 ਮਹੀਨਿਆਂ ਵਿਚ ਪੂਰਾ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ। ਇਸ ਨਾਲ ਟ੍ਰਿਬਿਊਨ ਚੌਕ, ਸੈਕਟਰ 17, ਸੈਕਟਰ 22 ਅਤੇ ਮੱਧਿਆ ਮਾਰਗ ਵੱਲ ਜਾਣ ਵਾਲੀ ਟ੍ਰੈਫਿਕ ਆਸਾਨੀ ਨਾਲ ਚੱਲ ਸਕੇਗੀ ਅਤੇ ਰੋਜ਼ਾਨਾ ਵਾਲਾ ਵੱਡਾ ਜਾਮ ਖ਼ਤਮ ਹੋਵੇਗਾ।

ਇਸ ਪ੍ਰੋਜੈਕਟ ਦੀ ਸ਼ੁਰੂਆਤ 2016 ਵਿਚ ਹੋਈ ਸੀ ਅਤੇ 2019 ਵਿਚ ਇਸ ਨੂੰ ਅਧਿਕਾਰਤ ਮਨਜ਼ੂਰੀ ਮਿਲ ਗਈ ਸੀ। ਪਰ ਉਠਾਈ ਗਈ ਪਟੀਸ਼ਨ ਉੱਤੇ ਹਾਈਕੋਰਟ ਨੇ ਰੁੱਖਾਂ ਦੀ ਕਟਾਈ ਉੱਤੇ ਰੋਕ ਲਗਾ ਦਿੱਤੀ ਸੀ। ਇਸ ਕਾਰਨ ਪ੍ਰੋਜੈਕਟ 5 ਸਾਲ ਤੱਕ ਰੁਕਿਆ ਰਿਹਾ। ਅਪ੍ਰੈਲ 2024 ਵਿਚ ਹਾਈ ਕੋਰਟ ਤੋਂ ਆਖਰੀ ਇਜਾਜ਼ਤ ਮਿਲਣ ਤੋਂ ਬਾਅਦ ਹੁਣ ਇਸ ਦਾ ਰਾਹ ਪੂਰੀ ਤਰ੍ਹਾਂ ਸਾਫ਼ ਹੋ ਗਿਆ ਹੈ। ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜ ਮਾਰਗ ਮੰਤਰਾਲੇ ਤੋਂ ਆਖਰੀ ਇਜਾਜ਼ਤ ਮਿਲਦਿਆਂ ਹੀ ਅਗਲੇ ਮਹੀਨੇ ਤੋਂ ਨਿਰਮਾਣ ਕੰਮ ਸ਼ੁਰੂ ਹੋ ਜਾਵੇਗਾ।

ਇਸ ਫਲਾਈਓਵਰ ਤੋਂ ਚੰਡੀਗੜ੍ਹ ਵਾਸੀਆਂ ਨੂੰ ਬਹੁਤ ਵੱਡੀ ਰਾਹਤ ਮਿਲਣ ਵਾਲੀ ਹੈ ਕਿਉਂਕਿ ਟ੍ਰਿਬਿਊਨ ਚੌਕ ਰੋਜ਼ਾਨਾ ਵੱਡੀ ਟ੍ਰੈਫਿਕ ਜਾਮ ਵਾਲੀ ਥਾਂ ਹੈ। ਇਸ ਨਾਲ ਨਾ ਸਿਰਫ਼ ਸਮਾਂ ਬਚੇਗਾ ਬਲਕਿ ਇਲਾਕੇ ਵਿਚ ਹਵਾ ਦੀ ਗੁਣਵੱਤਾ ਵੀ ਬਿਹਤਰ ਹੋਵੇਗੀ।

ਪ੍ਰਸ਼ਾਸਨ ਅਤੇ ਲੋਕ ਇਸ ਪ੍ਰੋਜੈਕਟ ਨੂੰ ਲੈ ਕੇ ਬਹੁਤ ਉਤਸੁਕ ਹਨ। ਹੁਣ ਇਹ ਤੈਅ ਹੈ ਕਿ ਅਗਲੇ ਕੁਝ ਮਹੀਨਿਆਂ ਵਿਚ ਟ੍ਰਿਬਿਊਨ ਚੌਕ ਉੱਤੇ ਫਲਾਈਓਵਰ ਦਾ ਨਿਰਮਾਣ ਕੰਮ ਤੇਜ਼ੀ ਨਾਲ ਚੱਲੇਗਾ।