ਦੁਨੀਆ ਭਰ ਵਿੱਚ Youtube ਦੀਆਂ ਸੇਵਾਵਾਂ ਠੱਪ

ਨਵੀਂ ਦਿੱਲੀ: 18 ਫਰਵਰੀ, 2026

ਵੀਡੀਓ ਸਟ੍ਰੀਮਿੰਗ ਦੇ ਸਭ ਤੋਂ ਵੱਡੇ ਪਲੇਟਫਾਰਮ ਯੂਟਿਊਬ ਦੀਆਂ ਸੇਵਾਵਾਂ ਅੱਜ ਸਵੇਰੇ ਭਾਰਤ ਸਮੇਤ ਦੁਨੀਆ ਦੇ ਕਈ ਹਿੱਸਿਆਂ ਵਿੱਚ ਅਚਾਨਕ ਬੰਦ ਹੋ ਗਈਆਂ। ਲਗਭਗ ਇੱਕ ਘੰਟੇ ਤੱਕ ਸੇਵਾਵਾਂ ਠੱਪ ਰਹਿਣ ਕਾਰਨ ਲੱਖਾਂ ਉਪਭੋਗਤਾਵਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਸਵੇਰੇ ਜਿਵੇਂ ਹੀ ਲੋਕਾਂ ਨੇ ਯੂਟਿਊਬ ਖੋਲ੍ਹਿਆ, ਉਨ੍ਹਾਂ ਨੂੰ ਹੋਮਪੇਜ ਦੀ ਬਜਾਏ "ਕੁਝ ਗਲਤ ਹੈ" ਅਤੇ "ਸਰਚ ਕਰਨ ਦੀ ਕੋਸ਼ਿਸ਼ ਕਰੋ" ਵਰਗੇ ਸੁਨੇਹੇ ਮਿਲਣੇ ਸ਼ੁਰੂ ਹੋ ਗਏ।

ਇਹ ਤਕਨੀਕੀ ਖ਼ਰਾਬੀ ਮੋਬਾਈਲ ਐਪਲੀਕੇਸ਼ਨ ਅਤੇ ਡੈਸਕਟੌਪ ਵੈੱਬਸਾਈਟ ਦੋਵਾਂ 'ਤੇ ਦੇਖਣ ਨੂੰ ਮਿਲੀ। ਜਿਵੇਂ ਹੀ ਯੂਟਿਊਬ ਡਾਊਨ ਹੋਇਆ, ਉਪਭੋਗਤਾਵਾਂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ (ਪਹਿਲਾਂ ਟਵਿੱਟਰ) 'ਤੇ ਸ਼ਿਕਾਇਤਾਂ ਦੀ ਝੜੀ ਲਗਾ ਦਿੱਤੀ, ਜਿਸ ਤੋਂ ਬਾਅਦ #YouTubeDown ਹੈਸ਼ਟੈਗ ਤੇਜ਼ੀ ਨਾਲ ਟ੍ਰੈਂਡ ਕਰਨ ਲੱਗਾ। ਜਾਣਕਾਰੀ ਅਨੁਸਾਰ ਸਿਰਫ਼ ਭਾਰਤ ਤੋਂ ਹੀ ਲਗਭਗ 10,000 ਤੋਂ ਵੱਧ ਲੋਕਾਂ ਨੇ ਸੇਵਾਵਾਂ ਬੰਦ ਹੋਣ ਦੀ ਰਿਪੋਰਟ ਦਰਜ ਕਰਵਾਈ।

ਹਾਲਾਂਕਿ ਯੂਟਿਊਬ ਵੱਲੋਂ ਇਸ ਡਾਊਨਟਾਈਮ ਦੇ ਪਿੱਛੇ ਦੇ ਅਸਲ ਕਾਰਨਾਂ ਦੀ ਅਧਿਕਾਰਤ ਤੌਰ 'ਤੇ ਕੋਈ ਵਿਸਥਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ, ਪਰ ਕੰਪਨੀ ਨੇ ਹੁਣ ਦਾਅਵਾ ਕੀਤਾ ਹੈ ਕਿ ਤਕਨੀਕੀ ਸਮੱਸਿਆ ਨੂੰ ਹੱਲ ਕਰ ਲਿਆ ਗਿਆ ਹੈ ਅਤੇ ਸੇਵਾਵਾਂ ਮੁੜ ਬਹਾਲ ਕਰ ਦਿੱਤੀਆਂ ਗਈਆਂ ਹਨ। ਮਾਹਰਾਂ ਦਾ ਮੰਨਣਾ ਹੈ ਕਿ ਸੇਵਾਵਾਂ ਬੰਦ ਹੋਣ ਕਾਰਨ ਕੰਟੈਂਟ ਕ੍ਰਿਏਟਰਾਂ ਅਤੇ ਵਿਗਿਆਪਨਦਾਤਾਵਾਂ ਨੂੰ ਵਿੱਤੀ ਨੁਕਸਾਨ ਦਾ ਸਾਹਮਣਾ ਵੀ ਕਰਨਾ ਪਿਆ ਹੈ। ਫਿਲਹਾਲ ਯੂਟਿਊਬ ਹੁਣ ਸਾਰੀਆਂ ਡਿਵਾਈਸਾਂ 'ਤੇ ਸੁਚਾਰੂ ਰੂਪ ਵਿੱਚ ਚੱਲ ਰਿਹਾ ਹੈ।