ਗੁਜਰਾਤ ਦੇ ਪੋਰਬੰਦਰ ਵਿੱਚ Liquor Shop ਨੂੰ ਮਨਜ਼ੂਰੀ, ਲੋਕਾਂ ਨੇ ਕੀ ਕਿਹਾ

ਅਹਿਮਦਾਬਾਦ, 10 ਅਪ੍ਰੈਲ : ਗੁਜਰਾਤ ਦੇ ਪੋਰਬੰਦਰ, ਜੋ ਮਹਾਤਮਾ ਗਾਂਧੀ ਦਾ ਜਨਮਸਥਾਨ ਹੈ, ਵਿੱਚ ਪਹਿਲੀ ਵਾਰ ਸ਼ਰਾਬ ਦੀ ਦੁਕਾਨ ਖੋਲ੍ਹਣ ਲਈ ਮਨਜ਼ੂਰੀ ਦਿੱਤੀ ਗਈ ਹੈ। ਇਹ ਦੁਕਾਨ ਲਾਰਡਸ ਹੋਟਲ ਵਿੱਚ ਖੁੱਲੇਗੀ, ਜਿਸ ਲਈ ਰਾਜ ਦੇ ਗ੍ਰਹਿ ਵਿਭਾਗ ਨੇ ਹਾਲ ਹੀ ਵਿੱਚ ਇਜਾਜ਼ਤ ਦਿੱਤੀ ਹੈ। ਦੋ ਸਾਲ ਪਹਿਲਾਂ ਦਿੱਤੀ ਗਈ ਅਰਜ਼ੀ ਨੂੰ ਮਨਜ਼ੂਰੀ ਮਿਲਣ ਤੋਂ ਬਾਅਦ ਹੁਣ ਕੇਵਲ ਉਹੀ ਲੋਕ ਇੱਥੋਂ ਸ਼ਰਾਬ ਖਰੀਦ ਸਕਣਗੇ, ਜਿਨ੍ਹਾਂ ਕੋਲ ਵੈਧ ਪਰਮਿਟ ਹੋਵੇਗਾ। ਗੁਜਰਾਤ ਵਿੱਚ ਸੈਲਾਨੀਆਂ, ਸਿਹਤ ਕਾਰਨਾਂ ਕਰਕੇ ਸ਼ਰਾਬ ਲੈਣ ਵਾਲਿਆਂ ਅਤੇ ਕਾਰਪੋਰੇਟ ਸਮਾਗਮਾਂ ਵਿੱਚ ਸ਼ਾਮਲ ਹੋਣ ਵਾਲਿਆਂ ਨੂੰ ਖ਼ਾਸ ਪਰਮਿਟ ਜਾਰੀ ਕੀਤੇ ਜਾਂਦੇ ਹਨ।

ਸ਼ਰਾਬਬੰਦੀ ਕਾਨੂੰਨ ਦੇ ਵਿਚਕਾਰ ਲਿਆ ਗਿਆ ਫੈਸਲਾ

ਗੁਜਰਾਤ ਵਿੱਚ ਸ਼ਰਾਬਬੰਦੀ ਗੁਜਰਾਤ ਪ੍ਰੋਹਿਬਿਸ਼ਨ ਐਕਟ 1949 ਅਧੀਨ ਲਾਗੂ ਹੈ। ਇਸ ਕਾਨੂੰਨ ਮੁਤਾਬਕ ਰਾਜ ਵਿੱਚ ਸ਼ਰਾਬ ਦੀ ਉਤਪਾਦਨ, ਵਿਕਰੀ, ਖਰੀਦ, ਸਟੋਰੇਜ ਅਤੇ ਸੇਵਨ ਆਮ ਤੌਰ ‘ਤੇ ਮਨਾਹੀ ਹੈ, ਪਰ ਖ਼ਾਸ ਇਜਾਜ਼ਤ ਹੇਠ ਛੂਟ ਦਿੱਤੀ ਜਾਂਦੀ ਹੈ। ਇਸ ਫੈਸਲੇ ਨੂੰ ਲੈ ਕੇ ਲੋਕਾਂ ਦੀ ਰਾਇ ਵੰਡੀ ਹੋਈ ਹੈ। ਕੁਝ ਲੋਕ ਇਸਨੂੰ ਸਧਾਰਣ ਪ੍ਰਸ਼ਾਸਕੀ ਪ੍ਰਕਿਰਿਆ ਮੰਨ ਰਹੇ ਹਨ, ਜਦਕਿ ਕਈ ਲੋਕ ਇਸਨੂੰ ਗਾਂਧੀ ਜੀ ਦੇ ਸਿਧਾਂਤਾਂ ਦੇ ਖ਼ਿਲਾਫ਼ ਦੱਸ ਰਹੇ ਹਨ।

ਰਾਜ ਸਰਕਾਰ ਦੇ ਅਨੁਸਾਰ, ਪਿਛਲੇ ਦੋ ਸਾਲਾਂ ਵਿੱਚ ਪੁਲਿਸ ਨੇ ਪੂਰੇ ਗੁਜਰਾਤ ਵਿੱਚ ਲਗਭਗ 42 ਕਰੋੜ ਰੁਪਏ ਦੀ ਗੈਰਕਾਨੂੰਨੀ ਸ਼ਰਾਬ ਜ਼ਬਤ ਕੀਤੀ ਹੈ। ਇਹ ਅੰਕੜੇ ਹਾਲ ਹੀ ਵਿੱਚ ਵਿਧਾਨ ਸਭਾ ਵਿੱਚ ਪੇਸ਼ ਕੀਤੇ ਗਏ, ਜਿਸ ਨਾਲ ਇਹ ਸਪਸ਼ਟ ਹੁੰਦਾ ਹੈ ਕਿ ਸ਼ਰਾਬਬੰਦੀ ਦੇ ਬਾਵਜੂਦ ਗੈਰਕਾਨੂੰਨੀ ਵਪਾਰ ਜਾਰੀ ਹੈ।