ਅਮਰੀਕਾ ਤੋਂ ਛੋਟ ਮਿਲਣ ਵਾਲੇ ਦੇਸ਼ਾਂ 'ਤੇ ਚੀਨ ਗੁੱਸੇ 'ਚ

ਬੀਜਿੰਗ, 19 ਅਪ੍ਰੈਲ 2025 – ਚੀਨ ਨੇ ਅਮਰੀਕਾ ਵਲੋਂ ਲਗਾਏ ਗਏ ਉੱਚ ਟੈਰਿਫਾਂ ਨੂੰ ਲੈ ਕੇ ਗੰਭੀਰ ਚਿੰਤਾ ਜਤਾਈ ਹੈ ਅਤੇ ਕਿਹਾ ਹੈ ਕਿ ਜੇਕਰ ਦੁਨੀਆ ਦੇ ਹੋਰ ਦੇਸ਼ ਵੀ ਚੀਨ ਨਾਲ ਵਪਾਰ ਕਰਨਾ ਬੰਦ ਕਰ ਦਿੰਦੇ ਹਨ, ਤਾਂ ਇਹ ਵਿਸ਼ਵ ਆਰਥਿਕਤਾ ਲਈ ਤਬਾਹੀ ਦੇ ਰੂਪ ਵਿੱਚ ਸਾਬਤ ਹੋਵੇਗਾ। ਚੀਨ ਦੇ ਸਰਕਾਰੀ ਅਖਬਾਰ ਗਲੋਬਲ ਟਾਈਮਜ਼ ਨੇ ਲਿਖਿਆ ਹੈ ਕਿ ਅਮਰੀਕਾ ਨੇ ਚੀਨ ਉੱਤੇ 245% ਟੈਰਿਫ ਲਗਾ ਕੇ ਸਿੱਧਾ ਨਿਸ਼ਾਨਾ ਬਣਾਇਆ ਹੈ, ਜਦਕਿ ਭਾਰਤ ਸਮੇਤ ਕਈ ਹੋਰ ਦੇਸ਼ਾਂ ਨੂੰ 90 ਦਿਨਾਂ ਦੀ ਛੂਟ ਦਿੱਤੀ ਗਈ ਹੈ।

ਚੀਨ ਦਾ ਦਾਅਵਾ ਹੈ ਕਿ ਅਮਰੀਕਾ ਦੀ ਇਹ ਕੋਸ਼ਿਸ਼ ਹੈ ਕਿ ਉਹ ਚੀਨ ਨਾਲ ਟਕਰਾਅ ਕਰੇ ਬਿਨਾਂ ਹੀ ਆਪਣੀ ਟੈਰਿਫ ਨੀਤੀ ਲਾਗੂ ਕਰੇ, ਤਾਂ ਜੋ ਹੋਰ ਦੇਸ਼ ਅਸਰਹੀਨ ਰਹਿਣ। ਪਰ ਚੀਨ ਨੇ ਚੇਤਾਵਨੀ ਦਿੱਤੀ ਕਿ ਅਜਿਹੀ ਪਾਲਸੀ ਨਾਲ ਹੋਰ ਦੇਸ਼ ਵੀ ਪ੍ਰਭਾਵਿਤ ਹੋਣਗੇ, ਖਾਸ ਕਰਕੇ ਉਹ ਜੋ ਚੀਨ ਤੋਂ ਸਮਾਨ ਖਰੀਦ ਕੇ ਅਮਰੀਕਾ ਨੂੰ ਨਿਰਯਾਤ ਕਰਦੇ ਹਨ।

ਚੀਨ ਦਾ ਕਹਿਣਾ ਹੈ ਕਿ ਅਮਰੀਕਾ ਹੋਰ ਦੇਸ਼ਾਂ ਨੂੰ ਵੀ ਦਬਾਅ ਵਿੱਚ ਲੈ ਕੇ ਚੀਨ ਨਾਲ ਕਾਰੋਬਾਰ ਘਟਾਉਣ ਲਈ ਮਜਬੂਰ ਕਰ ਰਿਹਾ ਹੈ। ਇਹ ਵੀ ਕਿਹਾ ਗਿਆ ਹੈ ਕਿ ਸਸਤੇ ਚੀਨੀ ਸਮਾਨ ਦੀ ਹੋਰ ਦੇਸ਼ਾਂ ਵਿੱਚ ਆਮਦ 'ਤੇ ਰੋਕ ਲਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।

ਗਲੋਬਲ ਟਾਈਮਜ਼ ਨੇ ਲਿਖਿਆ ਕਿ ਜੇਕਰ ਦੁਨੀਆ ਚੀਨ ਨਾਲ ਵਪਾਰ ਕਰਨਾ ਛੱਡ ਦੇਂਦੀ ਹੈ, ਤਾਂ ਇਹ ਵਿਸ਼ਵਵਿਆਪੀ ਮੰਦੀ ਦਾ ਕਾਰਨ ਬਣੇਗਾ। ਅਖਬਾਰ ਨੇ ਇਹ ਵੀ ਦੱਸਿਆ ਕਿ ਅਮਰੀਕਾ ਦੀ ਟੈਰਿਫ ਨੀਤੀ ਨਾਲ ਬਾਜ਼ਾਰਾਂ ਵਿੱਚ ਗਿਰਾਵਟ ਆ ਰਹੀ ਹੈ ਅਤੇ ਸਪਲਾਈ ਚੇਨ ਦੇ ਟੁੱਟਣ ਕਾਰਨ ਭਵਿੱਖ ਵਿੱਚ ਹਾਲਾਤ ਹੋਰ ਵੀ ਗੰਭੀਰ ਹੋ ਸਕਦੇ ਹਨ।

ਚੀਨ ਨੇ ਇਹ ਵੀ ਕਿਹਾ ਕਿ ਭਾਵੇਂ ਅਮਰੀਕਾ ਨੇ ਕੁਝ ਦੇਸ਼ਾਂ ਨੂੰ ਅਸਥਾਈ ਛੂਟ ਦਿੱਤੀ ਹੈ, ਪਰ ਇਹ ਲੰਬੇ ਸਮੇਂ ਤੱਕ ਨਹੀਂ ਚੱਲੇਗੀ। ਉਨ੍ਹਾਂ ਦਾ ਦਾਅਵਾ ਹੈ ਕਿ ਅਮਰੀਕਾ ਹਰੇਕ ਦੇਸ਼ ਉੱਤੇ ਇੱਕ-ਇੱਕ ਕਰਕੇ ਟੈਰਿਫ ਲਗਾਏਗਾ।

ਚੀਨ ਨੇ ਆਪਣੇ ਉਤਪਾਦਾਂ ਨੂੰ ਸਸਤਾ ਤੇ ਉੱਚ ਮਿਆਰੀ ਦੱਸਦਿਆਂ ਕਿਹਾ ਕਿ ਕਈ ਦੇਸ਼ ਅਮਰੀਕਾ ਦੇ ਦਬਾਅ ਹੇਠ ਆ ਸਕਦੇ ਹਨ, ਪਰ ਕਈ ਦੇਸ਼ ਅਜੇ ਵੀ ਚੀਨ ਨਾਲ ਵਪਾਰ ਜਾਰੀ ਰੱਖਣਗੇ। ਉਹ ਕਹਿੰਦੇ ਹਨ ਕਿ ਜੇਕਰ ਚੀਨ ਤੋਂ ਵੱਖ ਹੋਣ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਇਸਦਾ ਵਿਸ਼ਵ ਆਰਥਿਕਤਾ 'ਤੇ ਭਾਰੀ ਅਸਰ ਪਵੇਗਾ।

ਇਸ ਟਕਰਾਅ ਵਿੱਚ ਚੀਨ ਨੇ ਸਾਫ਼ ਕੀਤਾ ਹੈ ਕਿ ਉਹ ਝੁਕਣ ਵਾਲਾ ਨਹੀਂ, ਸਗੋਂ ਜਵਾਬੀ ਕਾਰਵਾਈ ਲਈ ਵੀ ਤਿਆਰ ਹੈ। ਅਖਬਾਰ ਨੇ ਆਖ਼ਰ ਵਿੱਚ ਚੇਤਾਵਨੀ ਦਿੱਤੀ ਕਿ ਜੇਕਰ ਅਮਰੀਕਾ ਦੇ ਟੈਰਿਫ ਐਜੰਡੇ ਦਾ ਵਿਸ਼ਵ ਪੱਧਰ 'ਤੇ ਵਿਰੋਧ ਹੋਇਆ ਤਾਂ ਇਹ ਨੀਤੀ ਅਸਫਲ ਹੋ ਸਕਦੀ ਹੈ ਅਤੇ ਅਮਰੀਕਾ ਨੂੰ ਆਪਣੇ ਕਦਮ ਪਿੱਛੇ ਹਟਾਉਣੇ ਪੈਣਗੇ।

ਇਹ ਮਾਮਲਾ ਹੁਣ ਇੱਕ ਆਮ ਵਪਾਰਕ ਵਿਵਾਦ ਤੋਂ ਉੱਪਰ ਚਲਿਆ ਗਿਆ ਹੈ ਅਤੇ ਵਿਸ਼ਵ ਆਰਥਿਕਤਾ ਲਈ ਸੰਭਾਵਿਤ ਖ਼ਤਰੇ ਵਧ ਰਹੇ ਹਨ।