ਹਰਿਆਣਾ ਵਿੱਚ ਮੰਤਰੀਆਂ ਨੂੰ ਵਿਭਾਗਾਂ ਦੀ ਵੰਡ
ਪੰਚਕੂਲਾ : ਹਰਿਆਣਾ ਦੀ ਨਾਇਬ ਸਿੰਘ ਸੈਣੀ ਦੀ ਅਗਵਾਈ ਵਾਲੀ ਭਾਜਪਾ ਸਰਕਾਰ ਨੇ ਮੰਤਰੀਆਂ ਦੇ ਵਿਭਾਗਾਂ ਦੀ ਵੰਡ ਕਰ ਦਿੱਤੀ ਹੈ। ਸਹੁੰ ਚੁੱਕ ਸਮਾਗਮ ਦੇ ਚੌਥੇ ਦਿਨ ਐਤਵਾਰ ਦੇਰ ਰਾਤ ਸਾਰੇ 14 ਮੰਤਰੀਆਂ ਦੇ ਵਿਭਾਗਾਂ ਦਾ ਐਲਾਨ ਕੀਤਾ ਗਿਆ।
ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਗ੍ਰਹਿ, ਵਿੱਤ, ਆਬਕਾਰੀ ਅਤੇ ਕਰ ਸਮੇਤ 13 ਤੋਂ ਵੱਧ ਮੰਤਰਾਲੇ ਆਪਣੇ ਕੋਲ ਰੱਖੇ ਹਨ। ਅਨਿਲ ਵਿੱਜ, ਵਿਪੁਲ ਗੋਇਲ, ਸ਼ਿਆਮ ਸਿੰਘ ਰਾਣਾ, ਕ੍ਰਿਸ਼ਨ ਕੁਮਾਰ ਬੇਦੀ, ਆਰਤੀ ਰਾਓ ਅਤੇ ਗੌਰਵ ਗੌਤਮ ਨੂੰ 3-3 ਵਿਭਾਗ ਦਿੱਤੇ ਗਏ ਹਨ।
ਮਹੀਪਾਲ ਢਾਂਡਾ, ਡਾ: ਅਰਵਿੰਦ ਸ਼ਰਮਾ ਅਤੇ ਰਾਓ ਨਰਬੀਰ ਸਿੰਘ ਨੂੰ 4-4 ਵਿਭਾਗ ਮਿਲੇ ਹਨ | ਕ੍ਰਿਸ਼ਨ ਲਾਲ ਪੰਵਾਰ, ਰਣਬੀਰ ਗੰਗਵਾ, ਸ਼ਰੂਤੀ ਚੌਧਰੀ ਅਤੇ ਰਾਜੇਸ਼ ਨਾਗਰ ਨੂੰ 2-2 ਵਿਭਾਗ ਦਿੱਤੇ ਗਏ ਹਨ।
ਅਨਿਲ ਵਿਜ ਬਿਜਲੀ, ਟਰਾਂਸਪੋਰਟ ਅਤੇ ਕਿਰਤ ਮੰਤਰਾਲਿਆਂ ਨੂੰ ਸੰਭਾਲਣਗੇ। ਆਰਤੀ ਰਾਓ ਸਿਹਤ, ਵਿਪੁਲ ਗੋਇਲ ਸ਼ਹਿਰੀ ਸਥਾਨਕ ਸੰਸਥਾਵਾਂ, ਕ੍ਰਿਸ਼ਨ ਲਾਲ ਪੰਵਾਰ ਪੰਚਾਇਤ, ਮਹੀਪਾਲ ਢਾਂਡਾ ਸਿੱਖਿਆ, ਸ਼ਿਆਮ ਸਿੰਘ ਰਾਣਾ ਖੇਤੀਬਾੜੀ ਅਤੇ ਗੌਰਵ ਗੌਤਮ ਖੇਡ ਵਿਭਾਗ ਦੀ ਦੇਖਭਾਲ ਕਰਨਗੇ।
ਮੁੱਖ ਮੰਤਰੀ ਸੈਣੀ ਅਤੇ ਉਨ੍ਹਾਂ ਦੇ 13 ਮੰਤਰੀਆਂ ਨੇ 17 ਅਕਤੂਬਰ ਨੂੰ ਪੰਚਕੂਲਾ ਵਿੱਚ ਇੱਕ ਸ਼ਾਨਦਾਰ ਸਮਾਰੋਹ ਵਿੱਚ ਸਹੁੰ ਚੁੱਕੀ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਸਹੁੰ ਚੁੱਕਣ ਤੋਂ ਅਗਲੇ ਹੀ ਦਿਨ 18 ਅਕਤੂਬਰ ਨੂੰ ਨਵੀਂ ਦਿੱਲੀ ਚਲੇ ਗਏ ਸਨ। ਕੇਂਦਰੀ ਲੀਡਰਸ਼ਿਪ ਨਾਲ 2 ਦਿਨਾਂ ਦੀ ਚਰਚਾ ਤੋਂ ਬਾਅਦ ਮੰਤਰੀਆਂ ਦੇ ਵਿਭਾਗਾਂ ਦਾ ਐਲਾਨ ਕੀਤਾ ਗਿਆ ਹੈ।