ਮੁਸਲਮਾਨਾਂ ਲਈ 4% ਰਾਖਵਾਂਕਰਨ ਖਤਮ ਹੋਵੇਗਾ, ਅਮਿਤ ਸ਼ਾਹ ਦਾ ਐਲਾਨ

ਹੈਦਰਾਬਾਦ : ਤੇਲੰਗਾਨਾ ਵਿੱਚ ਮੁਸਲਮਾਨਾਂ ਨੂੰ ਦਿੱਤਾ ਗਿਆ ਚਾਰ ਫ਼ੀਸਦੀ ਰਾਖਵਾਂਕਰਨ ਖ਼ਤਮ ਕਰ ਦਿੱਤਾ ਜਾਵੇਗਾ ਅਤੇ ਅਨੁਸੂਚਿਤ ਜਾਤੀਆਂ, ਅਨੁਸੂਚਿਤ ਕਬੀਲਿਆਂ ਅਤੇ ਪੱਛੜੀਆਂ ਸ਼੍ਰੇਣੀਆਂ ਵਿੱਚ ਵੰਡਿਆ ਜਾਵੇਗਾ। ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸੋਮਵਾਰ ਨੂੰ ਜਗਤਿਆਲ ‘ਚ ਚੋਣ ਜਨ ਸਭਾ ਨੂੰ ਸੰਬੋਧਨ ਕਰਦੇ ਹੋਏ ਇਹ ਐਲਾਨ ਕੀਤਾ। ਉਨ੍ਹਾਂ ਦੱਸਿਆ ਕਿ ਅਸੀਂ ਫੈਸਲਾ ਕੀਤਾ ਹੈ ਕਿ ਮਦੀਗਾ ਭਾਈਚਾਰੇ ਨੂੰ ਅਨੁਸੂਚਿਤ ਜਨਜਾਤੀ ਤਹਿਤ ਰਾਖਵਾਂਕਰਨ ਮਿਲੇਗਾ।

ਤੇਲੰਗਾਨਾ ਦੇ ਮੁੱਖ ਮੰਤਰੀ ਕੇ ਚੰਦਰ ਸ਼ੇਖਰ ਰਾਓ ‘ਤੇ ਹਮਲਾ ਕਰਦਿਆਂ ਉਨ੍ਹਾਂ ਕਿਹਾ ਕਿ ਕੇਸੀਆਰ ਨੇ ਅਸਦੁਦੀਨ ਓਵੈਸੀ ਦੇ ਡਰ ਕਾਰਨ ਹੈਦਰਾਬਾਦ ਲਿਬਰੇਸ਼ਨ ਡੇ ਨਹੀਂ ਮਨਾਇਆ। ਉਨ੍ਹਾਂ ਕਿਹਾ ਕਿ ਕੇਸੀਆਰ ਓਵੈਸੀ ਤੋਂ ਡਰਦੇ ਹਨ, ਅਸੀਂ ਨਹੀਂ ਡਰਦੇ। ਜੇਕਰ ਅਸੀਂ ਸੱਤਾ ਵਿੱਚ ਆਏ ਤਾਂ ਹੈਦਰਾਬਾਦ ਲਿਬਰੇਸ਼ਨ ਡੇ ਨੂੰ ਰਾਜ ਦਿਵਸ ਵਜੋਂ ਮਨਾਵਾਂਗੇ। ਬੀਆਰਐਸ ਦੇ ਚੋਣ ਨਿਸ਼ਾਨ ਕਾਰ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਉਨ੍ਹਾਂ ਕਿਹਾ ਕਿ ਨਾ ਤਾਂ ਕੇਸੀਆਰ, ਨਾ ਕੇਟੀਆਰ ਅਤੇ ਨਾ ਹੀ ਕਵਿਤਾ ਕੋਲ ਇਸ ਦਾ ਸਟੀਅਰਿੰਗ ਹੈ। ਓਵੈਸੀ ਕੋਲ ਕਾਰ ਦਾ ਸਟੀਅਰਿੰਗ ਹੈ। ਕੀ ਉਸ ਦੇ ਹੱਥਾਂ ‘ਚ ਤੇਲੰਗਾਨਾ ਦੀ ਗੱਡੀ ਆਸਾਨੀ ਨਾਲ ਚੱਲੇਗੀ ?

ਗ੍ਰਹਿ ਮੰਤਰੀ ਸ਼ਾਹ ਨੇ ਕਿਹਾ, ਕੇਂਦਰ ਸਰਕਾਰ ਨੇ ਹਲਦੀ ਬੋਰਡ ਦਾ ਗਠਨ ਕੀਤਾ ਹੈ। ਇਸ ਨਾਲ ਕਿਸਾਨਾਂ ਨੂੰ ਉਨ੍ਹਾਂ ਦੀ ਉਪਜ ਦਾ ਸਹੀ ਮੁੱਲ ਮਿਲੇਗਾ। ਬੋਰਡ ਤੋਂ ਇਲਾਵਾ ਕੇਂਦਰ ਸਰਕਾਰ ਨੇ 200 ਕਰੋੜ ਰੁਪਏ ਦੀ ਲਾਗਤ ਨਾਲ ਖੋਜ ਕੇਂਦਰ ਖੋਲ੍ਹਣ ਦੀ ਵੀ ਯੋਜਨਾ ਬਣਾਈ ਹੈ ਤਾਂ ਜੋ ਹਲਦੀ ਦੇ ਔਸ਼ਧੀ ਗੁਣਾਂ ਬਾਰੇ ਵਿਸਥਾਰ ਨਾਲ ਜਾਣਿਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਲੰਬੇ ਸਮੇਂ ਤੱਕ ਸੱਤਾ ਵਿੱਚ ਰਹਿਣ ਦੇ ਬਾਵਜੂਦ ਕੇਸੀਆਰ ਨੇ ਬੋਰਡ ਦਾ ਗਠਨ ਨਹੀਂ ਕੀਤਾ।