ਬੱਸ ਕੰਡਕਟਰ ਤੇ ਔਰਤ ਵਿਚਾਲੇ ਹੋਇਆ ਝਗੜਾ, ਟਿਕਟਾਂ ਕੱਟਣ ਵਾਲੀ ਮਸ਼ੀਨ ਖੋਹੀ

ਜਲੰਧਰ, 22 ਜੂਨ, ਹ.ਬ. : ਪੰਜਾਬ ਰੋਡਵੇਜ਼ ਦੀ ਬੱਸ ਵਿੱਚ ਇੱਕ ਔਰਤ ਨੇ ਹੰਗਾਮਾ ਮਚਾ ਦਿੱਤਾ। ਜਦੋਂ ਉਸ ਨੂੰ ਬੱਸ ਵਿੱਚ ਚੜ੍ਹਨ ਨਹੀਂ ਦਿੱਤਾ ਗਿਆ ਤਾਂ ਔਰਤ ਨੇ ਕੰਡਕਟਰ ਤੋਂ ਟਿਕਟਾਂ ਕੱਟਣ ਵਾਲੀ ਮਸ਼ੀਨ ਖੋਹ ਲਈ। ਇਸ ਦੇ ਨਾਲ ਹੀ ਉਸ ਨੇ ਕੰਡਕਟਰ ’ਤੇ ਵੀ ਹੱਥ ਚੁੱਕਿਆ। ਔਰਤ ਵਾਰ-ਵਾਰ ਕੰਡਕਟਰ ਨੂੰ ਮਾਰਨ ਦੀ ਕੋਸ਼ਿਸ਼ ਕਰ ਰਹੀ ਸੀ। ਸਵਾਰੀਆਂ ਨੇ ਔਰਤ ਨੂੰ ਸ਼ਾਂਤ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ ਪਰ ਔਰਤ ਉਨ੍ਹਾਂ ਨਾਲ ਵੀ ਉਲਝ ਗਈ। ਜਦੋਂ ਕੰਡਕਟਰ ਆਪਣੇ ਮੋਬਾਈਲ ਨਾਲ ਔਰਤ ਦੇ ਦੁਰਵਿਵਹਾਰ ਦੀ ਵੀਡੀਓ ਬਣਾ ਰਿਹਾ ਸੀ ਤਾਂ ਔਰਤ ਹੋਰ ਵੀ ਗੁੱਸੇ ਵਿੱਚ ਆ ਗਈ। ਉਹ ਕੰਡਕਟਰ ਨੂੰ ਧਮਕੀਆਂ ਦੇਣ ਲੱਗੀ। ਜਦੋਂ ਕੰਡਕਟਰ ਨੇ ਕਿਹਾ ਕਿ ਉਹ ਥਾਣੇ ਫੋਨ ਕਰੇਗਾ ਤਾਂ ਔਰਤ ਨੇ ਕਿਹਾ ਕਿ ਫੋਨ ਉਸ ਕੋਲ ਵੀ ਹੈ। ਇਸ ਤੋਂ ਪਹਿਲਾਂ ਉਹ ਥਾਣੇ ਵਿਚ ਫੋਨ ਕਰੇਗੀ। ਬੱਸ ’ਚ ਹੰਗਾਮੇ ਦੌਰਾਨ ਔਰਤ ਨੇ ਟਿਕਟ ਕੱਟਣ ਵਾਲੀ ਮਸ਼ੀਨ ਖੋਹ ਕੇ ਆਪਣੇ ਬੈਗ ’ਚ ਪਾ ਲਈ। ਕੰਡਕਟਰ ਦੇ ਕਹਿਣ ’ਤੇ ਉਸ ਨੇ ਕਿਹਾ ਕਿ ਉਹ ਮਸ਼ੀਨ ਨਹੀਂ ਦੇਵੇਗੀ। ਜਦੋਂ ਦੇਰੀ ਹੁੰਦੀ ਦੇਖ ਸਵਾਰੀਆਂ ਨੇ ਔਰਤ ਨੂੰ ਥੋੜ੍ਹਾ ਸਮਝਾਇਆ ਤਾਂ ਕੰਡਕਟਰ ਨੂੰ ਮਸ਼ੀਨ ਸੌਂਪਣ ਦੀ ਬਜਾਏ ਉਸ ਨੇ ਥੱਲੇ ਸੁੱਟ ਦਿੱਤੀ।