ਟਰੰਪ ਨੂੰ ਮਾਰਨ ਨਿਕਲਿਆ ਨੌਜਵਾਨ ਕਾਬੂ !

ਵਾਸ਼ਿੰਗਟਨ : ਅਮਰੀਕਾ ਦੇ ਰਾਸ਼ਟਰਪਤੀ ਡੌਨਲਡ ਟਰੰਪ ਨੂੰ ਜਾਨੋਂ ਮਾਰਨ ਦਾ ਮਨਸੂਬਾ ਪੂਰਾ ਕਰਨ ਖਾਤਰ 17 ਸਾਲ ਦੇ ਅੱਲ੍ਹੜ ਨੇ ਆਪਣੇ ਮਾਪਿਆਂ ਦਾ ਕਤਲ ਕਰ ਦਿਤਾ। ਫੈਡਰਲ ਬਿਊਰੋ ਆਫ ਇਨਵੈਸਟੀਗੇਸ਼ਨ ਵੱਲੋਂ ਜਨਤਕ ਕੀਤੇ ਦਸਤਾਵੇਜ਼ਾਂ ਮੁਤਾਬਕ ਨਿਕੀਤਾ ਕੈਸਪ ਵਿਰੁੱਧ ਆਪਣੀ ਮਾਂ ਤਾਤਿਆਨਾ ਕੈਸਪ ਅਤੇ ਮਤਰਏ ਪਿਉ ਡੌਨਲਡ ਮਾਯਰ ਦੀ ਹੱਤਿਆ ਦੇ ਦੋਸ਼ ਆਇਦ ਕੀਤੇ ਗਏ ਹਨ। ਸ਼ੱਕੀ ਦੇ ਫੋਨ ਵਿਚੋਂ ਜਿਥੇ ਅਡੌਲਫ਼ ਹਿਟਲਰ ਦੀਆਂ ਤਸਵੀਰਾਂ ਅਤੇ ਨਾਜ਼ੀਆਂ ਦੀ ਹਮਾਇਤ ਵਾਲੀਆਂ ਲਿਖਤਾਂ ਮਿਲੀਆਂ ਹਨ, ਉਥੇ ਹੀ ਯਹੂਦੀਆਂ ਵਿਰੁੱਧ ਲਿਖਤਾਂ ਵੀ ਬਰਾਮਦ ਕੀਤੀਆਂ ਗਈਆਂ ਜਿਨ੍ਹਾਂ ਵਿਚ ਟਰੰਪ ਦੇ ਕਤਲ ਦੀ ਵਿਸਤਾਰਤ ਯੋਜਨਾ ਦਾ ਜ਼ਿਕਰ ਕੀਤਾ ਗਿਆ ਸੀ। ਇਥੇ ਦਸਣਾ ਬਣਦਾ ਹੈ ਕਿ ਮਿਲਵੌਕੀ ਨੇੜਲੇ ਪਿੰਡ ਵੌਕੇਸ਼ਾ ਦੇ ਘਰ ਵਿਚੋਂ ਮਾਪਿਆਂ ਦੀਆਂ ਲਾਸ਼ਾਂ ਮਿਲੀਆਂ ਜਿਨ੍ਹਾਂ ਵਿਚੋਂ ਪਿਤਾ ਦਾ ਕਤਲ ਸਿਰਫ ਵਿਚ ਗੋਲੀ ਮਾਰ ਕੇ ਕੀਤਾ ਗਿਆ ਹੈ ਜਦਕਿ ਮਾਂ ਦੇ ਸਰੀਰ ’ਤੇ ਗੋਲੀਆਂ ਦੇ ਕਈ ਜ਼ਖਮ ਨਜ਼ਰ ਆਏ। ਵਾਰਦਾਤ 11 ਫਰਵਰੀ ਨੂੰ ਵਾਪਰੀ ਪਰ ਲਾਸ਼ਾਂ ਦੀ ਬਰਾਮਦਗੀ 28 ਫਰਵਰੀ ਨੂੰ ਕੀਤੀ ਜਾ ਸਕੀ।

ਮਾਪਿਆਂ ਦਾ ਗੋਲੀਆਂ ਮਾਰ ਕੇ ਕੀਤਾ ਕਤਲ

28 ਫ਼ਰਵਰੀ ਨੂੰ ਹੀ ਪੁਲਿਸ ਨੇ ਸ਼ੱਕੀ ਨੂੰ ਕੈਨਸਸ ਸੂਬੇ ਤੋਂ ਗ੍ਰਿਫ਼ਤਾਰ ਕਰ ਲਿਆ ਜਦੋਂ ਉਹ ਆਪਣੇ ਮਤਰਏ ਪਿਤਾ ਦੀ ਗੱਡੀ ਵਿਚ ਜਾ ਰਿਹਾ ਸੀ। ਗੱਡੀ ਵਿਚੋਂ ਡੌਨਲਡ ਮਾਯਰ ਦੀ ਪਸਤੌਲ, ਚਾਰ ਕ੍ਰੈਡਿਟ ਕਾਰਡ, ਕੁਝ ਗਹਿਣੇ ਅਤੇ 14 ਹਜ਼ਾਰ ਡਾਲਰ ਨਕਦ ਬਰਾਮਦ ਕੀਤੇ ਗਏ। ਤਲਾਸ਼ੀ ਵਾਰੰਟਾਂ ਮੁਤਾਬਕ ਸ਼ੱਕੀ ਦਾ ਮੰਨਣਾ ਸੀ ਕਿ ਟਰੰਪ ਦੇ ਕਤਲ ਮਗਰੋਂ ਹੀ ਸਿਆਸੀ ਇਨਕਲਾਬ ਲਿਆਂਦਾ ਜਾ ਸਕਦਾ ਹੈ। ਜਾਂਚਕਰਤਾਵਾਂ ਨੇ ਦੱਸਿਆ ਕਿ ਮਾਪਿਆਂ ਦੀ ਹੱਤਿਆ ਦਾ ਮਕਸਦ, ਟਰੰਪ ਨੂੰ ਮਾਰਨ ਦੀ ਯੋਜਨਾ ਵਾਸਤੇ ਪੈਸਾ ਹਾਸਲ ਕਰਨਾ ਅਤੇ ਟੋਕਾ-ਟਾਕੀ ਤੋਂ ਬਚਣਾ ਸੀ। ਅਦਾਲਤੀ ਦਸਤਾਵੇਜ਼ ਕਹਿੰਦੇ ਹਨ ਕਿ ਸ਼ੱਕੀ ਵੱਲੋਂ ਆਪਣੇ ਮਾਪਿਆਂ ਦੇ ਕਤਲ ਦੀ ਸਾਜ਼ਿਸ਼ ਬਾਰੇ ਰੂਸ ਬੈਠੇ ਲੋਕਾਂ ਨਾਲ ਗੱਲਬਾਤ ਕੀਤੀ ਗਈ। ਸਿਰਫ ਐਨਾ ਹੀ ਨਹੀਂ ਸ਼ੱਕੀ ਨੇ ਟਰੰਪ ਉਤੇ ਹਮਲੇ ਵਾਸਤੇ ਡਰੋਨ ਅਤੇ ਬਾਰੂਦ ਖਰੀਦਣ ਲਈ ਅਦਾਇਗੀ ਵੀ ਕੀਤੀ ਅਤੇ ਵਾਰਦਾਤ ਨੂੰ ਅੰਜਾਮ ਦੇਣ ਮਗਰੋਂ ਯੂਕਰੇਨ ਫਰਾਰ ਹੋਣ ਦੀ ਯੋਜਨਾ ਸੀ। ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕਿ ਸ਼ੱਕੀ ਵੱਲੋਂ ਰਾਸ਼ਟਰਪਤੀ ਦੇ ਕਤਲ ਅਤੇ ਅਮਰੀਕਾ ਸਰਕਾਰ ਦਾ ਤਖਤਾ ਪਲਟਣ ਦੀ ਸਾਜ਼ਿਸ਼ ਕਈ ਧਿਰਾਂ ਨਾਲ ਸਾਂਝੀ ਕੀਤੀ ਗਈ। ਸ਼ੱਕੀ ਦੀ ਅਦਾਲਤ ਵਿਚ ਪਹਿਲੀ ਪੇਸ਼ੀ 9 ਅਪ੍ਰੈਲ ਨੂੰ ਹੋਈ ਅਤੇ ਉਸ ਵੱਲੋਂ ਦੋਸ਼ਾਂ ਦੇ ਜਵਾਬ ਵਿਚ ਕੋਈ ਦਸਤਾਵੇਜ਼ ਦਾਖਲ ਨਹੀਂ ਕੀਤਾ ਗਿਆ। ਹੁਣ ਉਸ ਦੀ ਅਗਲੀ ਪੇਸ਼ੀ 7 ਮਈ ਨੂੰ ਵੌਕੇਸ਼ਾ ਕਾਊਂਟੀ ਕੋਰਟ ਵਿਚ ਹੋਣੀ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਪਿਛਲੇ ਦਿਨੀਂ ਪੈਨਸਿਲਵੇਨੀਆ ਸੂਬੇ ਦੇ ਬਟਲਰ ਸ਼ਹਿਰ ਨਾਲ ਸਬੰਧਤ ਇਕ ਸ਼ੱਕੀ ਨੂੰ ਰਾਸ਼ਟਰਪਤੀ ਡੌਨਲਡ ਟਰੰਪ, ਈਲੌਨ ਮਸਕ ਅਤੇ ਆਈਸ ਏਜੰਟਾਂ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇਣ ਦੇ ਦੋਸ਼ ਹੇਠ ਕਾਬੂ ਕੀਤਾ ਗਿਆ।

ਵਾਰਦਾਤ ਮਗਰੋਂ ਯੂਕਰੇਨ ਹੋਣਾ ਸੀ ਫਰਾਰ

32 ਸਾਲ ਦੇ ਸ਼ੌਨ ਮੌਨਪੇਅ ਨੇ ਕਥਿਤ ਤੌਰ ’ਤੇ ਯੂਟਿਊਬ ਵੀਡੀਓਜ਼ ਰਾਹੀਂ ਧਮਕੀਆਂ ਦਿਤੀਆਂ ਅਤੇ ਐਫ਼.ਬੀ.ਆਈ. ਨੂੰ ਇਨ੍ਹਾਂ ਦੀ ਜੜ ਬਟਲਰ ਸ਼ਹਿਰ ਵਿਚ ਮਿਲੀ। ਇਕ ਵੀਡੀਓ ਵਿਚ ਸ਼ੌਨ ਨੇ ਕਿਹਾ ਸੀ ਕਿ ਅਸੀਂ ਬਹੁਗਿਣਤੀ ਵਿਚ ਹਾਂ ਅਤੇ ਮੇਕ ਅਮੈਰਿਕਾ ਗ੍ਰੇਟ ਅਗੇਨ ਦੇ ਨਾਹਰੇ ਦੇਣ ਵਾਲਾ ਘੱਟ ਗਿਣਤੀ ਵਿਚ ਹੈ। ਹੁਣ ਅਮਰੀਕਾ ਦਾ ਦੂਜਾ ਇਨਕਲਾਬ ਸ਼ੁਰੂ ਹੋਵੇਗਾ। ਸ਼ੌਨ ਵੱਲੋਂ ਆਈਸ ਏਜੰਟਾਂ ਨੂੰ ਘਰੇਲੂ ਅਤਿਵਾਦੀ ਕਰਾਰ ਦਿਤਾ ਗਿਆ। ਚੇਤੇ ਰਹੇ ਕਿ ਚੋਣ ਪ੍ਰਚਾਰ ਦੌਰਾਨ ਪੈਨਸਿਲਵੇਨੀਆ ਸੂਬੇ ਦੇ ਬਟਲਰ ਸ਼ਹਿਰ ਵਿਚ ਹੀ ਟਰੰਪ ’ਤੇ ਗੋਲੀਆਂ ਚੱਲੀਆਂ ਸਨ ਪਰ ਉਹ ਵਾਲ ਵਾਲ ਬਚ ਗਏ। ਸੀਕਰੇਟ ਸਰਵਿਸ ਵਾਲਿਆਂ ਨੇ ਹਮਲਾਵਰ ਨੂੰ ਮੌਕੇ ’ਤੇ ਮਾਰ ਮੁਕਾਇਆ ਸੀ।