America ਦੀਆਂ ਏਅਰਲਾਈਨਜ਼ ਨੂੰ ਮਿਲੀ ਚਿਤਾਵਨੀ

ਵਾਸ਼ਿੰਗਟਨ : ਡੌਨਲਡ ਟਰੰਪ ਵੱਲੋਂ ਸੰਭਾਵਤ ਤੌਰ ’ਤੇ ਮੈਕਸੀਕੋ ਉਤੇ ਹਮਲੇ ਦੀ ਤਿਆਰੀ ਕੀਤੀ ਜਾ ਰਹੀ ਹੈ ਜਿਸ ਦੇ ਮੱਦੇਨਜ਼ਰ ਫ਼ੈਡਰਲ ਐਵੀਏਸ਼ਨ ਐਡਮਨਿਸਟ੍ਰੇਸ਼ਨ ਨੇ ਅਮਰੀਕਾ ਦੀਆਂ ਏਅਰਲਾਈਨਜ਼ ਨੂੰ ਚਿਤਾਵਨੀ ਜਾਰੀ ਕਰ ਦਿਤੀ। ਏਅਰਲਾਈਨਜ਼ ਨੂੰ ਮੈਕਸੀਕੋ ਅਤੇ ਲੈਟਿਨ ਅਮੈਰਿਕਾ ਦੇ ਕਈ ਮੁਲਕਾਂ ਦੇ ਅਸਮਾਨ ਵਿਚੋਂ ਲੰਘਦਿਆਂ ਸੁਚੇਤ ਰਹਿਣ ਵਾਸਤੇ ਆਖਿਆ ਗਿਆ ਹੈ। 16 ਜਨਵਰੀ ਨੂੰ ਜਾਰੀ ਅਤੇ 60 ਦਿਨ ਲਾਗੂ ਰਹਿਣ ਵਾਲੀ ਵਾਰਨਿੰਗ ਬਾਰੇ ਮੈਕਸੀਕੋ ਨੇ ਟਿੱਪਣੀ ਕਰਦਿਆਂ ਕਿਹਾ ਹੈ ਕਿ ਇਹ ਸਿਰਫ਼ ਅਹਿਤਿਆਤੀ ਕਦਮ ਹੈ ਅਤੇ ਮੁਲਕ ਦੀਆਂ ਹਵਾਈ ਸਰਹੱਦਾਂ ’ਤੇ ਕੋਈ ਪਾਬੰਦੀ ਲਾਗੂ ਨਹੀਂ ਕੀਤੀ ਗਈ।

ਮੈਕਸੀਕੋ ਉਤੇ ਹਮਲਾ ਕਰਨ ਦੀ ਤਿਆਰੀ ਵਿਚ ਟਰੰਪ

ਚੇਤੇ ਰਹੇ ਕਿ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ 8 ਜਨਵਰੀ ਨੂੰ ਕਿਹਾ ਸੀ ਕਿ ਮੈਕਸੀਕੋ ਵਿਚ ਡ੍ਰਗ ਕਾਰਟੈਲ ਮੁਲਕ ਚਲਾ ਰਹੇ ਹਨ ਅਤੇ ਅਮਰੀਕਾ ਇਨ੍ਹਾਂ ਵਿਰੁੱਧ ਜ਼ਮੀਨੀ ਹਮਲੇ ਕਰ ਸਕਦਾ ਹੈ। ਵੈਨੇਜ਼ੁਏਲਾ ਵਿਰੁੱਧ ਕਾਰਵਾਈ ਮਗਰੋਂ ਟਰੰਪ ਨੇ ਆਖਿਆ ਸੀ ਕਿ ਉਨ੍ਹਾਂ ਦੀ ਸਰਕਾਰ ਜਲਦ ਹੀ ਜ਼ਮੀਨ ’ਤੇ ਮੌਜੂਦ ਡ੍ਰਗ ਕਾਰਟੈਲਜ਼ ਨੂੰ ਨਿਸ਼ਾਨਾ ਬਣਾਉਣ ਦੀ ਕਾਰਵਾਈ ਸ਼ੁਰੂ ਕਰੇਗਾ। ਟਰੰਪ ਦਾ ਮੰਨਣਾ ਹੈ ਕਿ ਮੈਕਸੀਕੋ ਵਿਚ ਤਿਆਰ ਨਸ਼ਿਆਂ ਰਾਹੀਂ ਅਮਰੀਕਾ ਵਿਚ ਹਰ ਸਾਲ ਢਾਈ ਤੋਂ ਤਿੰਨ ਲੱਖ ਲੋਕ ਮਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਮੁੰਦਰੀ ਰਸਤੇ ਨਸ਼ਾ ਤਸਕਰੀ ਨੂੰ 97 ਫ਼ੀ ਸਦੀ ਰੋਕ ਦਿਤਾ ਗਿਆ ਹੈ ਅਤੇ ਹੁਣ ਜ਼ਮੀਨੀ ਕਾਰਵਾਈ ਕੀਤੀ ਜਾਵੇਗੀ। ਉਧਰ ਮੈਕਸੀਕੋ ਦੀ ਰਾਸ਼ਟਰਪਤੀ ਕਲੌਡੀਆ ਸ਼ੀਨਬੌਮ ਨੇ ਟਰੰਪ ਦੀਆਂ ਟਿੱਪਣੀਆਂ ਦਾ ਤਿੱਖਾ ਜਵਾਬ ਦਿੰਦਿਆਂ ਕਿਹਾ ਕਿ ਨਿਕੋਲਸ ਮਾਦੁਰੋ ਦੀ ਗ੍ਰਿਫ਼ਤਾਰੀ ਮਗਰੋਂ ਅਮਰੀਕਾ ਕਿਸੇ ਵੀ ਖੇਤਰ ਦਾ ਮਾਲਕ ਨਹੀਂ ਬਣ ਸਕਦਾ।