ਭਾਰਤ ਵਿਚ ਅਮਰੀਕਾ ਦੇ ਨਵੇਂ ਰਾਜਦੂਤ ਹੋਣਗੇ ਸਰਜੀਓ ਗੋਰ

ਵਾਸ਼ਿੰਗਟਨ : ਰਾਸ਼ਟਰਪਤੀ ਡੌਨਲਡ ਟਰੰਪ ਵੱਲੋਂ ਸਰਜੀਓ ਗੋਰ ਨੂੰ ਭਾਰਤ ਵਿਚ ਅਮਰੀਕਾ ਦਾ ਨਵਾਂ ਰਾਜਦੂਤ ਨਿਯੁਕਤ ਕੀਤਾ ਗਿਆ ਹੈ। ਸਰਜੀਓ ਗੋਰ ਬੀਤੇ ਮਈ ਮਹੀਨੇ ਦੌਰਾਨ ਸੁਰਖੀਆਂ ਵਿਚ ਆਏ ਸਨ ਜਦੋਂ ਟੈਸਲਾ ਦੇ ਮੁਖੀ ਈਲੌਨ ਮਸਕ ਨੇ ਉਨ੍ਹਾਂ ਨੂੰ ‘ਕਾਲਾ ਨਾਗ’ ਦੱਸਿਆ। ਨਿਊ ਯਾਰਕ ਪੋਸਟ ਦੀ ਰਿਪੋਰਟ ਮੁਤਾਬਕ ਮਾਰਚ ਮਹੀਨੇ ਦੌਰਾਨ ਟਰੰਪ ਦੀ ਇਕ ਕੈਬਨਿਟ ਮੀਟਿੰਗ ਵਿਚ ਮਸਕ ਅਤੇ ਗੋਰ ਵਿਚਾਲੇ ਤਿੱਖੀ ਬਹਿਸ ਹੋਈ ਜਿਸ ਮਗਰੋਂ ਗੋਰ ਨੇ ਬਦਲਾ ਲੈਣ ਦਾ ਐਲਾਨ ਕਰ ਦਿਤਾ। ਮਸਕ ਨੇ ਜਦੋਂ ਆਪਣੇ ਖਾਸ ਦੋਸਤ ਜੇ. ਇਸਾਕਮੈਨ ਨੂੰ ਨਾਸਾ ਦਾ ਮੁਖੀ ਨਾਮਜ਼ਦ ਕਰਨ ਦੀ ਸਿਫ਼ਾਰਸ਼ ਕੀਤੀ ਤਾਂ ਸਰਜੀਓ ਗੋਰ ਨੇ ਭਾਨੀ ਮਾਰ ਦਿਤੀ।

ਟਰੰਪ ਨੇ ਆਪਣੇ ਗੂੜ੍ਹੇ ਦੋਸਤ ਨੂੰ ਦਿਤਾ ਅਹਿਮ ਅਹੁਦਾ

ਡੌਨਲਡ ਟਰੰਪ ਵੱਲੋਂ ਇਸਾਕਮੈਨ ਨੂੰ ਨਾਮਜ਼ਦ ਵੀ ਕੀਤਾ ਜਾ ਚੁੱਕਾ ਸੀ ਅਤੇ ਸੈਨੇਟ ਨੇ ਵੀ ਹਾਂ ਕਰ ਦਿਤੀ ਪਰ 31 ਮਈ 2025 ਨੂੰ ਗੋਰ ਦੇ ਕਹਿਣ ’ਤੇ ਟਰੰਪ ਨੇ ਨਾਮਜ਼ਦਗੀ ਰੱਦ ਕਰ ਦਿਤੀ। ਰਾਸ਼ਟਰਪਤ ਡੌਨਲਡ ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ’ਤੇ ਲਿਖਿਆ ਕਿ ਵਾਈਟ ਹਾਊਸ ਦੇ ਪ੍ਰੈਜ਼ੀਡੈਂਸ਼ੀਅਲ ਪਰਸਨਲ ਡਾਇਰੈਕਟਰ ਵਜੋਂ ਸਰਜੀਓ ਅਤੇ ਉਨ੍ਹਾਂ ਨੇ ਟੀਮ ਨੇ ਰਿਕਾਰਡ ਸਮੇਂ ਵਿਚ ਤਕਰੀਬਨ 4 ਹਜ਼ਾਰ ਅਮੈਰਿਕ ਫਸਟ ਪੈਟ੍ਰੀਔਟਸ ਦੀ ਭਰਤੀ ਕੀਤੀ। ਟਰੰਪ ਨੇ ਅੱਗੇ ਲਿਖਿਆ ਕਿ ਗੋਰ ਉਨ੍ਹਾਂ ਦੇ ਗੂੜ੍ਹੇ ਦੋਸਤ ਹਨ ਅਤੇ ਉਨ੍ਹਾਂ ਉਤੇ ਪੂਰਾ ਯਕੀਨ ਹੈ। ਸਰਜੀਓ ਆਪਣੇ ਮੌਜੂਦ ਅਹੁਦੇ ’ਤੇ ਕੰਮ ਕਰਦੇ ਰਹਿਣਗੇ ਜਦੋਂ ਤੱਕ ਉਨ੍ਹਾਂ ਦੀ ਨਿਯੁਕਤੀ ਉਤੇ ਸੰਸਦ ਦੀ ਮੋਹਰ ਨਹੀਂ ਲੱਗ ਜਾਂਦੀ। ਟਰੰਪ ਦਾ ਕਹਿਣਾ ਸੀ ਕਿ ਸਰਜੀਓ ਕਈ ਸਾਲ ਉਨ੍ਹਾਂ ਨਾਲ ਕੰਮ ਕਰ ਰਹੇ ਹਨ ਅਤੇ ਇਤਿਹਾਸਕ ਚੋਣਾਂ ਦੌਰਾਨ ਵੀ ਡਟ ਕੇ ਸਾਥ ਦਿਤਾ।

ਮਸਕ ਨੇ ਗੋਰ ਨੂੰ ਦੱਸਿਆ ਸੀ ‘ਕਾਲਾ ਨਾਗ’

ਏਸ਼ੀਆ ਵਰਗੇ ਸੰਘਣੀ ਵਸੋਂ ਵਾਲੇ ਇਲਾਕਿਆਂ ਵਿਚ ਅਮਰੀਕਾ ਸਰਕਾਰ ਦੀਆਂ ਨੀਤੀਆਂ ਲਾਗੂ ਕਰਨ ਲਈ ਭਰੋਸੇਮੰਦ ਇਨਸਾਨ ਦੀ ਜ਼ਰੂਰਤ ਹੈ ਅਤੇ ਇਹ ਜ਼ਿੰਮੇਵਾਰੀ ਸਰਜੀਓ ਹੀ ਬਿਹਤਰ ਤਰੀਕੇ ਨਾਲ ਨਿਭਾਅ ਸਕਦੇ ਹਨ। ਸਰਜੀਓ ਨੂੰ ਨਵੀਂ ਜ਼ਿੰਮੇਵਾਰੀ ਲਈ ਦਿਲੋਂ ਮੁਬਾਰਕਬਾਦ। ਦੱਸ ਦੇਈਏ ਕਿ ਸਰਜੀਓ ਗੋਰ ਨੂੰ ਦੱਖਣੀ ਅਤੇ ਮੱਧ ਏਸ਼ੀਆਈ ਮਾਮਲਿਆਂ ਦੇ ਵਿਸ਼ੇਸ਼ ਦੂਤ ਦੀ ਜ਼ਿੰਮੇਵਾਰੀ ਵੀ ਸੌਂਪੀ ਗਈ ਹੈ। ਭਾਰਤ ਵਿਚ ਅਮਰੀਕਾ ਦੇ ਨਵੇਂ ਅੰਬੈਸਡਰ ਦੀ ਨਿਯੁਕਤੀ ਅਜਿਹੇ ਸਮੇਂ ਹੋਈ ਹੈ ਜਦੋਂ ਟੈਰਿਫ਼ਸ ਦੇ ਮੁੱਦੇ ’ਤੇ ਭਾਰਤ ਅਤੇ ਅਮਰੀਕਾ ਵਿਚਾਲੇ ਤਣਾਅ ਚੱਲ ਰਿਹਾ ਹੈ।