ਹਿਮਾਚਲ 'ਚ ਡੂੰਘੀ ਖੱਡ ਵਿੱਚ ਡਿੱਗੀ ਸੈਲਾਨੀਆਂ ਦੀ ਕਾਰ, ਜਲੰਧਰ ਦੇ 3 ਵਿਅਕਤੀਆਂ ਦੀ ਮੌਤ

ਡੇਢ ਕਿਲੋਮੀਟਰ ਡੂੰਘੀ ਖੱਡ 'ਚ ਡਿੱਗੀ ਕਾਰ

ਚੰਬਾ: ਸ਼ੁੱਕਰਵਾਰ ਦੇਰ ਰਾਤ, ਡਲਹੌਜ਼ੀ-ਕੈਰੇਲਨੂ ਸੜਕ 'ਤੇ ਛੇ ਸੈਲਾਨੀਆਂ ਦੀ ਕਾਰ ਡੂੰਘੀ ਖੱਡ ਵਿੱਚ ਡਿੱਗ ਪਈ ਇਸ ਹਾਦਸੇ ਵਿੱਚ ਤਿੰਨ ਸੈਲਾਨੀਆਂ ਦੀ ਮੌਤ ਹੋ ਗਈ, ਜਦੋਂ ਕਿ ਤਿੰਨ ਹੋਰ ਗੰਭੀਰ ਜ਼ਖਮੀ ਹੋ ਗਏ। ਪੁਲਿਸ ਅਨੁਸਾਰ, ਦੋ ਸੈਲਾਨੀਆਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਜ਼ਖਮੀਆਂ ਵਿੱਚੋਂ ਇੱਕ ਨੌਜਵਾਨ ਔਰਤ ਪਠਾਨਕੋਟ ਦੇ ਇੱਕ ਹਸਪਤਾਲ ਲਿਜਾਂਦੇ ਸਮੇਂ ਦਮ ਤੋੜ ਗਈ। ਜਿਸ ਜਗ੍ਹਾ ਹਾਦਸਾ ਵਾਪਰਿਆ ਹੈ, ਉਹ ਚੰਬਾ ਜ਼ਿਲ੍ਹਾ ਹੈ।

ਇੱਕ ਗੰਭੀਰ ਜ਼ਖਮੀ ਵਿਅਕਤੀ ਨੂੰ ਇਲਾਜ ਲਈ ਪਠਾਨਕੋਟ ਰੈਫਰ ਕਰ ਦਿੱਤਾ ਗਿਆ ਹੈ, ਜਦੋਂ ਕਿ ਦੋ ਹੋਰ ਜ਼ਖਮੀ ਇਸ ਸਮੇਂ ਡਲਹੌਜ਼ੀ ਦੇ ਸਿਵਲ ਹਸਪਤਾਲ ਵਿੱਚ ਇਲਾਜ ਅਧੀਨ ਹਨ। ਗੱਡੀ ਵਿੱਚ ਕੁੱਲ ਛੇ ਲੋਕ ਸਵਾਰ ਸਨ। ਸਾਰੇ ਸਵਾਰ ਜਲੰਧਰ ਦੇ ਵਸਨੀਕ ਦੱਸੇ ਜਾ ਰਹੇ ਹਨ ਜੋ ਡਲਹੌਜ਼ੀ ਇਲਾਕੇ ਦੀ ਸੈਰ ਕਰਨ ਲਈ ਆਏ ਸਨ। ਮ੍ਰਿਤਕਾਂ ਦੀ ਹਾਲ਼ੇ ਤੱਕ ਪਛਾਣ ਨਹੀਂ ਹੋ ਸਕੀ ਹੈ।

ਇਹ ਹਾਦਸਾ ਗਾਂਧੀ ਚੌਕ ਦੇ ਨੇੜੇ ਕਰੇਲਨੂ ਰੋਡ 'ਤੇ ਹੋਇਆ। ਰਿਪੋਰਟਾਂ ਮੁਤਾਬਕ ਸੈਲਾਨੀਆਂ ਦਾ ਵਾਹਨ ਬੇਕਾਬੂ ਹੋ ਗਿਆ, ਸੜਕ ਤੋਂ ਤਿਲਕ ਗਿਆ ਅਤੇ ਲਗਭਗ 1.5 ਕਿਲੋਮੀਟਰ ਡੂੰਘੀ ਖੱਡ ਵਿੱਚ ਡਿੱਗ ਗਿਆ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਵਾਹਨ ਪੂਰੀ ਤਰ੍ਹਾਂ ਤਬਾਹ ਹੋ ਗਿਆ। ਪੁਲਿਸ ਨੇ ਕਿਹਾ ਹੈ ਕਿ ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਘਟਨਾ ਦੀ ਸੂਚਨਾ ਮਿਲਦੇ ਹੀ, ਪੁਲਿਸ, ਪ੍ਰਸ਼ਾਸਨਿਕ ਅਧਿਕਾਰੀ ਅਤੇ ਸਥਾਨਕ ਬਚਾਅ ਟੀਮਾਂ ਮੌਕੇ 'ਤੇ ਪਹੁੰਚ ਗਈਆਂ। ਰਾਤ ਦੇ ਹਨੇਰੇ ਅਤੇ ਖੱਡ ਦੀ ਡੂੰਘਾਈ ਕਾਰਨ ਬਚਾਅ ਕਾਰਜ ਨੂੰ ਕਾਫ਼ੀ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ। ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਮੁੱਢਲੀ ਜਾਂਚ ਤੋਂ ਪਤਾ ਚੱਲਦਾ ਹੈ ਕਿ ਸੜਕ ਦੀ ਤਿਲਕਣ, ਬਹੁਤ ਜ਼ਿਆਦਾ ਰਫ਼ਤਾਰ, ਜਾਂ ਡਰਾਈਵਰ ਦਾ ਵਾਹਨ ਤੋਂ ਕੰਟਰੋਲ ਗੁਆਉਣਾ ਹਾਦਸੇ ਦੇ ਸੰਭਾਵੀ ਕਾਰਨ ਹੋ ਸਕਦੇ ਹਨ। ਜਾਂਚ ਪੂਰੀ ਹੋਣ ਤੋਂ ਬਾਅਦ ਹੀ ਅਸਲ ਕਾਰਨ ਸਪੱਸ਼ਟ ਹੋਵੇਗਾ।