ਟੋਰਾਂਟੋ ਵਿਖੇ ਟੋਅ ਟਰੱਕ ਡਰਾਈਵਰਾਂ ਦੀ ਦੁਸ਼ਮਣੀ ਮੁੜ ਭੜਕੀ

ਟੋਰਾਂਟੋ : ਟੋਰਾਂਟੋ ਅਤੇ ਇਸ ਦੇ ਨਾਲ ਲਗਦੇ ਇਲਾਕਿਆਂ ਵਿਚ ਟੋਅ ਟਰੱਕ ਡਰਾਈਵਰਾਂ ਦੀ ਦੁਸ਼ਮਣੀ ਮੁੜ ਭੜਕਦੀ ਨਜ਼ਰ ਆਈ ਜਦੋਂ ਮੰਗਲਵਾਰ ਰਾਤ ਇਕ ਟੋਅ ਟਰੱਕ ਡਰਾਈਵਰ ਨੂੰ ਗੋਲੀ ਮਾਰ ਦਿਤੀ ਗਈ। ਡਰਾਈਵਰ ਨੂੰ ਗੰਭੀਰ ਜ਼ਖਮੀ ਹਾਲਤ ਵਿਚ ਹਸਪਤਾਲ ਦਾਖਲ ਕਰਵਾਇਆ ਗਿਆ ਹੈ। ਟੋਰਾਂਟੋ ਪੁਲਿਸ ਨੇ ਦੱਸਿਆ ਕਿ ਕੈਨੇਡੀ ਰੋਡ ਅਤੇ ਪ੍ਰੋਗਰੈਸ ਐਵੇਨਿਊ ਇਲਾਕੇ ਵਿਚ ਵਾਰਦਾਤ ਦੀ ਇਤਲਾਹ ਮਿਲਣ ’ਤੇ ਪੁੱਜੇ ਅਫਸਰਾਂ ਨੂੰ ਇਕ ਸ਼ਖਸ ਗੰਭੀਰ ਜ਼ਖਮੀ ਹਾਲਤ ਵਿਚ ਮਿਲਿਆ।

ਸਕਾਰਬ੍ਰੋਅ ਵਿਖੇ ਮੰਗਲਵਾਰ ਰਾਤ ਡਰਾਈਵਰ ਨੂੰ ਮਾਰੀ ਗੋਲੀ

ਟੋਰਾਂਟੋ ਪੈਰਾਮੈਡਿਕਸ ਵੱਲੋਂ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ ਜਿਸ ਦੀ ਹਾਲਤ ਨਾਜ਼ੁਕ ਦੱਸੀ ਗਈ। ਪੁਲਿਸ ਮੁਤਾਬਕ ਗੋਲੀਬਾਰੀ ਦੀ ਵਾਰਦਾਤ ਅਸਲ ਵਿਚ ਹਾਈਵੇਅ 401 ਦੇ ਉਤਰ ਵੱਲ ਮਾਰਖਮ ਰੋਡ ’ਤੇ ਵਾਪਰੀ ਅਤੇ ਇਸ ਮਗਰੋਂ ਟੋਅ ਟਰੱਕ ਡਰਾਈਵਰ ਪੰਜ ਕਿਲੋਮੀਟਰ ਖੁਦ ਡਰਾਈਵ ਕਰ ਕੇ ਕੈਨੇਡੀ ਰੋਡ ਅਤੇ ਪ੍ਰੋਗਰੈਸ ਐਵੇਨਿਊ ਇਲਾਕੇ ਵਿਚ ਪੁੱਜਾ। ਫਿਲਹਾਲ ਪੁਲਿਸ ਵੱਲੋਂ ਕਿਸੇ ਸ਼ੱਕੀ ਦਾ ਹੁਲੀਆ ਜਾਰੀ ਨਹੀਂ ਕੀਤਾ ਗਿਆ।

ਨਵੇਂ ਵਰ੍ਹੇ ਵਿਚ ਵਾਪਰ ਚੁੱਕੀਆਂ ਨੇ ਗੋਲੀਬਾਰੀ ਦੀਆਂ ਕਈ ਵਾਰਦਾਤਾਂ

ਪੁਲਿਸ ਮੁਤਾਬਕ ਨਵੇਂ ਵਰ੍ਹੇ ਦੌਰਾਨ 1 ਜਨਵਰੀ ਤੋਂ 13 ਜਨਵਰੀ ਦਰਮਿਆਨ ਵਾਪਰੀਆਂ ਗੋਲੀਬਾਰੀ ਦੀਆਂ ਵਾਰਦਾਤਾਂ ਵਿਚੋਂ 70 ਫੀ ਸਦੀ ਇਕ ਛੋਟੇ ਧੜੇ ਨਾਲ ਸਬੰਧਤ ਹਨ ਜੋ ਟੋਰਾਂਟੋ ਸ਼ਹਿਰ ਵਿਚ ਟੋਇੰਗ ਦਾ ਕੰਮ ਕਰਦਾ ਹੈ। ਗੋਲੀਬਾਰੀ ਦੀਆਂ ਵਾਰਦਾਤਾਂ ਤੋਂ ਇਲਾਵਾ ਟੋਅ ਟਰੱਕਾਂ ਨੂੰ ਅੱਗ ਲਾਉਣ ਦੀਆਂ ਵਾਰਦਾਤਾਂ ਵੀ ਅਕਸਰ ਹੀ ਸਾਹਮਣੇ ਆਉਂਦੀਆਂ ਰਹਿੰਦੀਆਂ ਹਨ।