ਈਰਾਨੀ ਬੰਦਰਗਾਹ 'ਤੇ ਧਮਾਕੇ ਦਾ ਵੀਡੀਓ ਵਾਇਰਲ

 ਦੱਖਣੀ ਈਰਾਨ ਦੇ ਬੰਦਰ ਅੱਬਾਸ ਸ਼ਹਿਰ ਦੇ ਸ਼ਾਹਿਦ ਰਾਜਾਈ ਬੰਦਰਗਾਹ 'ਤੇ 26 ਅਪ੍ਰੈਲ 2025 ਨੂੰ ਇੱਕ ਭਿਆਨਕ ਧਮਾਕਾ ਹੋਇਆ, ਜਿਸ ਨਾਲ ਪੂਰੇ ਖੇਤਰ ਵਿੱਚ ਹੜਕੰਪ ਮਚ ਗਿਆ। ਧਮਾਕਾ ਇੰਨਾ ਜ਼ਬਰਦਸਤ ਸੀ ਕਿ ਕਈ ਕਿਲੋਮੀਟਰ ਦੂਰ ਤੱਕ ਘਰਾਂ ਦੀਆਂ ਖਿੜਕੀਆਂ ਦੇ ਸ਼ੀਸ਼ੇ ਟੁੱਟ ਗਏ ਅਤੇ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ।

ਧਮਾਕੇ ਦੀਆਂ ਵੀਡੀਓਆਂ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ, ਜਿਨ੍ਹਾਂ ਵਿੱਚ ਅਸਮਾਨ ਵਿੱਚ ਵੱਡੇ ਧੂੰਏਂ ਦੇ ਬੱਦਲ ਅਤੇ ਅੱਗ ਦੀ ਲਪਟਾਂ ਸਾਫ਼ ਦਿਖਾਈ ਦੇ ਰਹੀਆਂ ਹਨ। ਰਿਪੋਰਟਾਂ ਮੁਤਾਬਕ, ਇਹ ਧਮਾਕਾ ਸ਼ਾਹਿਦ ਰਾਜਾਈ ਪੋਰਟ ਦੇ ਕੰਟੇਨਰ ਯਾਰਡ ਵਿੱਚ ਹੋਇਆ, ਜਿੱਥੇ ਕਈ ਕੰਟੇਨਰਾਂ ਦੇ ਧਮਾਕਿਆਂ ਕਾਰਨ ਅੱਗ ਲੱਗ ਗਈ। ਇਸ ਘਟਨਾ ਵਿੱਚ ਘੱਟੋ-ਘੱਟ 281 ਲੋਕਾਂ ਦੇ ਜ਼ਖਮੀ ਹੋਣ ਦੀ ਪੁਸ਼ਟੀ ਹੋਈ ਹੈ। ਜ਼ਖਮੀਆਂ ਨੂੰ ਇਲਾਜ ਲਈ ਨੇੜਲੇ ਹਸਪਤਾਲਾਂ 'ਚ ਭੇਜਿਆ ਗਿਆ ਹੈ ਅਤੇ ਰਾਹਤ-ਬਚਾਅ ਕਾਰਜ ਜਾਰੀ ਹਨ।

ਧਮਾਕੇ ਦਾ ਕਾਰਨ ਅਜੇ ਤੱਕ ਸਪਸ਼ਟ ਨਹੀਂ ਹੋਇਆ, ਪਰ ਸ਼ੁਰੂਆਤੀ ਜਾਂਚਾਂ ਵਿੱਚ ਦੱਸਿਆ ਗਿਆ ਕਿ ਸੰਭਵ ਤੌਰ 'ਤੇ ਜ਼ਲਦ ਭੜਕਣ ਵਾਲਾ ਸਮਾਨ ਗਲਤ ਢੰਗ ਨਾਲ ਰੱਖਿਆ ਗਿਆ ਸੀ, ਜਿਸ ਕਾਰਨ ਇਹ ਵੱਡਾ ਹਾਦਸਾ ਵਾਪਰਿਆ। ਬੰਦਰਗਾਹ ਪ੍ਰਸ਼ਾਸਨ ਅਤੇ ਸੁਰੱਖਿਆ ਏਜੰਸੀਆਂ ਵਲੋਂ ਮੌਕੇ 'ਤੇ ਅੱਗ ਬੁਝਾਉਣ ਅਤੇ ਹਾਲਤ ਨੂੰ ਕਾਬੂ ਕਰਨ ਲਈ ਵੱਡੀ ਮੁਹਿੰਮ ਚਲਾਈ ਜਾ ਰਹੀ ਹੈ।

ਸ਼ਾਹਿਦ ਰਾਜਾਈ ਪੋਰਟ ਈਰਾਨ ਦਾ ਸਭ ਤੋਂ ਵੱਡਾ ਕੰਟੇਨਰ ਪੋਰਟ ਹੈ, ਜਿੱਥੇ ਤੇਲ ਟੈਂਕ ਅਤੇ ਪੈਟਰੋ-ਕੈਮੀਕਲ ਫੈਕਟਰੀਆਂ ਵੀ ਮੌਜੂਦ ਹਨ। 2020 ਵਿੱਚ ਵੀ ਇਸ ਪੋਰਟ 'ਤੇ ਇੱਕ ਵੱਡਾ ਸਾਇਬਰ ਹਮਲਾ ਹੋਇਆ ਸੀ।

ਇਸ ਵਾਰ ਦੇ ਧਮਾਕੇ ਨੇ ਸਥਾਨਕ ਲੋਕਾਂ ਵਿੱਚ ਭਾਰੀ ਦਹਿਸ਼ਤ ਫੈਲਾ ਦਿੱਤੀ ਹੈ ਅਤੇ ਬੰਦਰਗਾਹ 'ਤੇ ਸਾਰੀਆਂ ਗਤੀਵਿਧੀਆਂ ਅਸਥਾਈ ਤੌਰ 'ਤੇ ਰੁਕ ਗਈਆਂ ਹਨ।