ਭਾਰਤੀ ਮੁਟਿਆਰ ਦੀ ਮੌਤ ਦਾ ਸ਼ੱਕੀ ਅਮਰੀਕਾ ਰਵਾਨਾ

ਪੁੰਟਾ ਕਾਨਾ : ਭਾਰਤੀ ਮੁਟਿਆਰ ਸੁਦੀਕਸ਼ਾ ਕੋਨਾਂਕੀ ਦੇ ਲਾਪਤਾ ਹੋਣ ਮਗਰੋਂ ਮੁੱਖ ਸ਼ੱਕੀ ਮੰਨਿਆ ਗਿਆ ਜੋਸ਼ੂਆ ਰੀਬੇ ਅਮਰੀਕਾ ਰਵਾਨਾ ਹੋ ਗਿਆ ਹੈ। ਸੁਦੀਕਸ਼ਾ ਦੇ ਮਾਪਿਆਂ ਵੱਲੋਂ ਜੋਸ਼ੂਆ ਵਿਰੁੱਧ ਕਿਸੇ ਕਿਸਮ ਦੀ ਕਾਰਵਾਈ ਤੋਂ ਇਨਕਾਰ ਕੀਤੇ ਜਾਣ ਮਗਰੋਂ ਡੌਮੀਨਿਕਨ ਰਿਪਬਲਿਕ ਦੀ ਅਦਾਲਤ ਨੇ ਉਸ ਨੂੰ ਬਰੀ ਕਰ ਦਿਤਾ। ਇਸੇ ਦੌਰਾਨ ‘ਨਿਊ ਯਾਰਕ ਪੋਸਟ’ ਨਾਲ ਗੱਲਬਾਤ ਕਰਦਿਆਂ ਸੁਦੀਕਸ਼ਾ ਦੇ ਪਿਤਾ ਸੁਬਾਰਾਯਦੂ ਕੋਨਾਂਕੀ ਨੇ ਦੱਸਿਆ ਕਿ ਘਟਨਾ ਵੇਲੇ ਸਮੁੰਦਰ ਵਿਚ ਛੱਲਾਂ ਬਹੁਤ ਉਚੀਆਂ ਉਠ ਰਹੀਆਂ ਸਨ ਅਤੇ ਇਸ ਬਾਰੇ ਡੌਮੀਨਿਕਨ ਰਿਪਬਲਿਕ ਦੇ ਅਧਿਕਾਰੀਆਂ ਨੇ ਤਸਦੀਕ ਕਰ ਦਿਤੀ। ਪੁਲਿਸ ਵੱਲੋਂ ਆਰੰਭ ਤੋਂ ਹੀ ਜੋਸ਼ੂਆ ਨੂੰ ਸ਼ੱਕੀ ਨਹੀਂ ਬਲਕਿ ਪਰਸਨ ਆਫ਼ ਇੰਟ੍ਰਸਟ ਮੰਨਿਆ ਗਿਆ। ਬੇਹੱਦ ਅਫਸੋਸ ਨਾਲ ਕਹਿਣਾ ਪੈ ਰਿਹਾ ਹੈ ਕਿ ਸਾਡੀ ਬੇਟੀ ਡੁੱਬ ਗਈ। ਉਧਰ ਜੋਸ਼ੂਆ ਨੇ ਅਦਾਲਤ ਨੂੰ ਦੱਸਿਆ ਕਿ ਦੁੱਖ ਵਿਚ ਡੁੱਬੀ ਸੁਦੀਕਸ਼ਾ ਦੀ ਮਾਂ ਉਸ ਨੂੰ ਮਿਲਣ ਆਈ ਅਤੇ ਸਮੁੰਦਰ ਵਿਚ ਰੁੜ੍ਹਨ ਤੋਂ ਪਹਿਲਾਂ ਸੁਦੀਕਸ਼ਾ ਨੂੰ ਖਿੱਚ ਕੇ ਕਿਨਾਰੇ ਵੱਲ ਲਿਆਉਣ ਦੇ ਯਤਨ ਕਰਨ ਦਾ ਸ਼ੁਕਰੀਆ ਅਦਾ ਕੀਤਾ।

ਸੁਦੀਕਸ਼ਾ ਦੇ ਮਾਪਿਆਂ ਦੀ ਸਹਿਮਤੀ ਮਗਰੋਂ ਅਦਾਲਤ ਨੇ ਕੀਤਾ ਬਰੀ

ਜੋਸ਼ੂਆ ਨੇ ਕਿਹਾ ਕਿ ਉਸ ਨੇ ਸੁਦੀਕੋਸ਼ਾ ਨੂੰ ਬਚਾਉਣ ਲਈ ਪੂਰਾ ਜ਼ੋਰ ਲਾਇਆ ਪਰ ਸਫ਼ਲ ਨਾ ਹੋ ਸਕਿਆ। ਇਥੇ ਦਸਣਾ ਬਣਦਾ ਹੈ ਕਿ ਕੁਝ ਦਿਨ ਪਹਿਲਾਂ ਸੁਦੀਕਸ਼ਾ ਦੇ ਮਾਪਿਆਂ ਨੇ ਕੌੜਾ ਸੱਚ ਪ੍ਰਵਾਨ ਕਰ ਲਿਆ ਕਿ ਉਨ੍ਹਾਂ ਦੀ ਬੇਟੀ ਵਾਪਸ ਨਹੀਂ ਆ ਸਕਦੀ। ਉਨ੍ਹਾਂ ਵੱਲੋਂ ਡੌਮੀਨਿਕਨ ਰਿਪਬਲਿਕ ਦੀ ਪੁਲਿਸ ਨੂੰ ਸਰਕਾਰੀ ਤੌਰ ’ਤੇ ਮੌਤ ਦਾ ਐਲਾਨ ਕਰਨ ਦੀ ਲਿਖਤੀ ਗੁਜ਼ਾਰਿਸ਼ ਕੀਤੀ ਗਈ। ਉਨ੍ਹਾਂ ਕਿਹਾ ਕਿ ਸੁਦੀਕਸ਼ਾ ਨਾਲ ਆਖਰੀ ਵਾਰ ਨਜ਼ਰ ਆਏ ਜੋਸ਼ੂਆ ਰੀਬੇ ਨੇ ਪੁਲਿਸ ਨਾਲ ਪੂਰਾ ਸਹਿਯੋਗ ਕੀਤਾ ਅਤੇ ਕਿਸੇ ਸਾਜ਼ਿਸ਼ ਦਾ ਕੋਈ ਸਬੂਤ ਸਾਹਮਣੇ ਨਹੀਂ ਆਇਆ। ਇਸ ਤੋਂ ਪਹਿਲਾਂ ਸੁਦੀਕਸ਼ਾ ਦੇ ਪਿਤਾ ਵੱਲੋਂ ਉਸ ਦੇ ਅਗਵਾ ਹੋਣ ਦਾ ਖਦਸ਼ਾ ਜ਼ਾਹਰ ਕੀਤਾ ਗਿਆ ਸੀ।

ਡੌਮੀਨਿਕਨ ਰਿਪਬਲਿਕ ਵਿਚ ਲਾਪਤਾ ਹੋਈ ਸੀ ਸੁਦੀਕਸ਼ਾ ਕੋਨਾਂਕੀ

ਸੁਬਾਰਾਯਦੂ ਕੋਨਾਂਕੀ ਮੁਤਾਬਕ ਸੁਦੀਕਸ਼ਾ ਨਾਲ ਉਨ੍ਹਾਂ ਦੀ ਆਖਰੀ ਗੱਲਬਾਤ 5 ਮਾਰਚ ਦੀ ਸ਼ਾਮ ਹੋਈ ਅਤੇ ਇਸ ਤੋਂ ਕੁਝ ਘੰਟੇ ਬਾਅਦ ਉਹ ਲਾਪਤਾ ਹੋ ਗਈ। ਅਮਰੀਕਾ ਦੇ ਆਇਓਵਾ ਸੂਬੇ ਨਾਲ ਸਬੰਧਤ ਜੋਸ਼ੂਆ ਰੀਬੇ ਪੁਲਿਸ ਨੂੰ ਦੋ ਕਹਾਣੀਆਂ ਸੁਣਾਈਆਂ ਜਿਸ ਮਗਰੋਂ ਉਸ ਦਾ ਪਾਸਪੋਰਟ ਜ਼ਬਤ ਕਰਦਿਆਂ ਸੁਦੀਕਸ਼ਾ ਦੀ ਗੁੰਮਸ਼ੁਦਗੀ ਨਾਲ ਸਬੰਧਤ ਪਰਸਨ ਆਫ਼ ਇੰਟ੍ਰਸਟ ਕਰਾਰ ਦਿਤਾ ਗਿਆ। ਦੱਸ ਦੇਈਏ ਕਿ ਸੁਦੀਕਸ਼ਾ ਕੋਨਾਂਕੀ 3 ਮਾਰਚ ਨੂੰ ਆਪਣੀਆਂ ਪੰਜ ਸਹੇਲੀਆਂ ਨਾਲ ਡੌਮੀਨਿਕਨ ਰਿਪਬਲਿਕ ਪੁੱਜੀ ਸੀ ਅਤੇ 6 ਮਾਰਚ ਦੀ ਸਵੇਰ ਲਾਪਤਾ ਹੋ ਗਈ। ਸੁਦੀਕਸ਼ਾ ਦਾ ਪਰਵਾਰ 2006 ਤੋਂ ਅਮਰੀਕਾ ਵਿਚ ਰਹਿ ਰਿਹਾ ਹੈ ਅਤੇ ਸਾਰੇ ਗਰੀਨ ਕਾਰਡ ਹੋਲਡਰ ਹਨ।