ਅਮਰੀਕਾ ਵਿਚ ਪੜ੍ਹਦੀ ਭਾਰਤੀ ਮੁਟਿਆਰ ਲਾਪਤਾ

ਪਿਟਜ਼ਬਰਗ : ਅਮਰੀਕਾ ਦੀ ਪਿਟਜ਼ਬਰਗ ਯੂਨੀਵਰਸਿਟੀ ਵਿਚ ਪੜ੍ਹਦੀ 20 ਸਾਲਾ ਭਾਰਤੀ ਮੁਟਿਆਰ ਕਈ ਦਿਨ ਤੋਂ ਲਾਪਤਾ ਹੈ ਜੋ ਆਪਣੀਆਂ ਸਹੇਲੀਆਂ ਨਾਲ ਸੈਰ-ਸਪਾਟਾ ਕਰਨ ਡੌਮੀਨਿਕਨ ਰਿਪਬਲਿਕ ਦੇ ਪੁੰਟਾ ਕਾਨਾ ਗਈ ਸੀ। ਡੌਮੀਨਿਕਨ ਨੈਸ਼ਨਲ ਪੁਲਿਸ ਨੇ ਦੱਸਿਆ ਕਿ ਸੁਦੀਕਸ਼ਾ ਕੋਨਾਂਕੀ 3 ਮਾਰਚ ਨੂੰ ਪੰਜ ਜਣਿਆਂ ਨਾਲ ਉਨ੍ਹਾਂ ਦੇ ਮੁਲਕ ਵਿਚ ਦਾਖਲ ਹੋਈ ਅਤੇ ਬੀਤੇ ਵੀਰਵਾਰ ਨੂੰ ਇਹ ਸਾਰੇ ਇਕ ਬੀਚ ’ਤੇ ਇਕੱਤਰ ਹੋਏ। ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ ਮੁਤਾਬਕ ਵੀਰਵਾਰ ਸਵੇਰੇ ਤਕਰੀਬਨ 6 ਵਜੇ ਪੰਜ ਔਰਤਾਂ ਅਤੇ ਇਕ ਇਕ ਪੁਰਸ਼ ਬੀਚ ਛੱਡ ਕੇ ਜਾਂਦੇ ਨਜ਼ਰ ਆਏ ਪਰ ਸੁਦੀਕਸ਼ਾ ਆਪਣੇ ਇਕ ਦੋਸਤ ਨਾਲ ਉਥੇ ਹੀ ਮੌਜੂਦ ਰਹੀ।

ਸਹੇਲੀਆਂ ਨਾਲ ਗਈ ਸੀ ਡੌਮੀਨਿਕਨ ਰਿਪਬਲਿਕ

ਇਸ ਮਗਰੋਂ ਤਕਰੀਬਨ 10 ਵਜੇ ਸੁਦੀਕਸ਼ਾ ਦਾ ਸਾਥੀ ਵੀ ਬੀਚ ਤੋਂ ਬਾਹਰ ਜਾਂਦਾ ਨਜ਼ਰ ਆਇਆ ਪਰ ਸੁਦੀਕਸ਼ਾ ਨਜ਼ਰ ਨਾ ਆਈ। ਪੁਲਿਸ ਵੱਲੋਂ ਨੌਜਵਾਨ ਤੋਂ ਪੁੱਛ-ਪੜਤਾਲ ਕੀਤੀ ਗਈ ਹੈ ਪਰ ਕੋਈ ਠੋਸ ਜਾਣਕਾਰੀ ਸਾਹਮਣੇ ਨਹੀਂ ਆ ਸਕੀ। ਪੁਲਿਸ ਵੱਲੋਂ ਸੁਦੀਕਸ਼ਾ ਦੀਆਂ ਸਹੇਲੀਆਂ ਤੋਂ ਵੀ ਪੁੱਛ ਪੜਤਾਲ ਕੀਤੀ ਗਈ ਅਤੇ ਸਮੁੰਦਰ ਵਿਚ ਵੀ ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ। ਉਧਰ ਅਮਰੀਕਾ ਵਿਚ ਮੌਜੂਦ ਸੁਦੀਕਸ਼ਾ ਦੇ ਪਿਤਾ ਸੁਬਰਾਯੁਦੂ ਕੋਨਾਂਕੀ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹ ਬਸੰਤ ਰੁੱਤ ਦੀਆਂ ਛੁੱਟੀਆਂ ਦੇ ਮੱਦੇਨਜ਼ਰ ਪੁੰਟਾ ਕਾਨਾ ਗਈ ਜੋ ਡਾਕਟਰੀ ਦੀ ਪੜ੍ਹਾਈ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਸੁਦੀਕਸ਼ਾ ਦੇ ਬੀਚ ਤੋਂ ਵਾਪਸ ਨਾ ਆਉਣ ਮਗਰੋਂ ਉਸ ਦੀਆਂ ਸਹੇਲੀਆਂ ਨੇ ਪੁਲਿਸ ਨੂੰ ਖਬਰ ਦਿਤੀ ਅਤੇ ਉਸ ਦੀ ਹਰ ਪਾਸੇ ਭਾਲ ਕੀਤੀ ਜਾ ਰਹੀ ਹੈ। ਸੁਦੀਕਸ਼ਾ ਦੀਆਂ ਸਹੇਲੀਆਂ ਨੇ ਵੀਰਵਾਰ ਸ਼ਾਮ 4 ਵਜੇ ਉਸ ਦੇ ਲਾਪਤਾ ਹੋਣ ਦੀ ਇਤਲਾਹ ਦਿਤੀ ਪਰ ਐਨੇ ਦਿਨ ਲੰਘਣ ਤੋਂ ਬਾਅਦ ਵੀ ਉਸ ਦਾ ਕੋਈ ਥਹੁ-ਪਤਾ ਨਾ ਲੱਗ ਸਕਿਆ। ਇਥੇ ਦਸਣਾ ਬਣਦਾ ਹੈ ਕਿ ਸੁਦੀਕਸ਼ਾ ਦਾ ਪਰਵਾਰ 2006 ਤੋਂ ਅਮਰੀਕਾ ਵਿਚ ਰਹਿ ਰਿਹਾ ਹੈ ਅਤੇ ਸਾਰੇ ਗਰੀਨ ਕਾਰਡ ਹੋਲਡਰ ਹਨ।

20 ਸਾਲ ਦੀ ਸੁਦੀਕਸ਼ਾ ਕੋਨਾਂਕੀ ਦਾ ਪਰਵਾਰ ਚਿੰਤਾ ਵਿਚ ਡੁੱਬਿਆ

ਉਧਰ ਵਰਜੀਨੀਆ ਦੀ ਲਾਊਡਨ ਕਾਊਂਟੀ ਦੇ ਸ਼ੈਰਿਫ ਦਫ਼ਤਰ ਨੇ ਕਿਹਾ ਕਿ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਵੱਲੋਂ ਡੌਮੀਨਿਕਨ ਰਿਪਬਲਿਕ ਦੇ ਉਚ ਅਧਿਕਾਰੀਆਂ ਨਾਲ ਸੰਪਰਕ ਕਾਇਮ ਕੀਤਾ ਗਿਆ ਹੈ ਜਦਕਿ ਅਮਰੀਕਾ ਵਿਚ ਭਾਰਤ ਦੀ ਅੰਬੈਸੀ ਵੱਲੋਂ ਵੀ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ। ਯੂਨੀਵਰਸਿਟੀ ਆਫ਼ ਪਿਟਜ਼ਰਬਰਗ ਵੱਲੋਂ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਜੇ ਕਿਸੇ ਕੋਲ ਸੁਦੀਕਸ਼ਾ ਬਾਰੇ ਕੋਈ ਜਾਣਕਾਰੀ ਹੋਵੇ ਤਾਂ ਲਾਊਡਨ ਕਾਊਂਟੀ ਦੇ ਸ਼ੈਰਿਫ ਦਫ਼ਤਰ ਨਾਲ ਸੰਪਰਕ ਕੀਤਾ ਜਾਵੇ। ਯੂਨੀਵਰਸਿਟੀ ਪ੍ਰਬੰਧਕਾਂ ਵੱਲੋਂ ਸੁਦੀਕਸ਼ਾ ਦੇ ਪਰਵਾਰਕ ਮੈਂਬਰਾਂ ਨਾਲ ਸੰਪਰਕ ਕਾਇਮ ਕੀਤਾ ਗਿਆ ਹੈ ਅਤੇ ਲਾਊਡਨ ਕਾਊਂਟੀ ਦੇ ਅਧਿਕਾਰੀਆਂ ਤੋਂ ਵੀ ਪਲ ਪਲ ਦੀ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ। ਇਸੇ ਦੌਰਾਨ ਸੁਦੀਕਸ਼ਾ ਦੇ ਪਿਤਾ ਐਤਵਾਰ ਨੂੰ ਪੁੰਟਾ ਕਾਨਾ ਪੁੱਜ ਗਏ ਅਤੇ ਸੁਦੀਕਸ਼ਾਂ ਦੀ ਭਾਲ ਵਿਚ ਜੁਟੇ ਪੁਲਿਸ ਅਧਿਕਾਰੀਆਂ ਨਾਲ ਗੱਲਬਾਤ ਕੀਤੀ। ਪੁਲਿਸ ਦਾ ਮੰਨਣਾ ਹੈ ਕਿ ਇਹ ਅਗਵਾ ਜਾਂ ਮਨੁੱਖੀ ਤਸਕਰੀ ਦਾ ਮਾਮਲਾ ਹੋ ਸਕਦਾ ਹੈ। ਦੱਸ ਦੇਈਏ ਕਿ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਵੱਲੋਂ ਡੌਮੀਨਿਕਨ ਰਿਪਬਲਿਕ ਜਾਣ ਵਾਲੇ ਆਪਣੇ ਨਾਗਰਿਕਾਂ ਨੂੰ ਬੇਹੱਦ ਸੁਚੇਤ ਰਹਿਣ ਦੀ ਐਡਵਾਇਜ਼ਰੀ ਜਾਰੀ ਕੀਤੀ ਗਈ ਹੈ। ਵਿਦੇਸ਼ ਵਿਭਾਗ ਦਾ ਕਹਿਣਾ ਹੈ ਕਿ ਹਥਿਆਰਬੰਦ ਲੁੱਟ, ਕਤਲ ਅਤੇ ਸੈਕਸ਼ੁਅਲ ਅਸਾਲਟ ਵਰਗੀਆਂ ਵਾਰਦਾਤਾਂ ਡੌਮੀਨਿਕਨ ਰਿਪਬਲਿਕ ਵਿਚ ਆਮ ਹਨ। ਉਧਰ ਭਾਰਤੀ ਅੰਬੈਸੀ ਨੇ ਕਿਹਾ ਕਿ ਡੌਮੀਨਿਕਨ ਰਿਪਬਲਿਕ ਦੀ ਸਰਕਾਰ ਨੂੰ ਹਰ ਸੰਭਵ ਸਹਿਯੋਗ ਦਿਤਾ ਜਾ ਰਿਹਾ ਹੈ।