ਗੜੇਮਾਰ ਤੇ ਝੱਖੜ ਨੇ ਪੰਜਾਬ ਦੇ ਕਿਸਾਨਾਂ ਨੂੰ ਦਿੱਤਾ ਵੱਡਾ ਝਟਕਾ, ਧਰਤੀ 'ਤੇ ਵਿਛੀ ਕਈ ਮਹੀਨਿਆਂ ਦੀ ਮਿਹਨਤ
ਐਤਵਾਰ ਦੀ ਰਾਤ ਕਰੀਬ 11 ਵਜੇ ਅਚਾਨਕ ਹੋਈ ਤੇਜ਼ ਗੜੇਮਾਰੀ ਅਤੇ ਝੱਖੜ ਨੇ ਪੰਜਾਬ ਦੇ ਕਿਸਾਨਾਂ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਖਾਸ ਕਰਕੇ ਬਾਲਿਆਂਵਾਲੀ ਖੇਤਰ ਵਿਚ ਪੱਕਣ ’ਤੇ ਆਈ ਕਣਕ ਦੀ ਫਸਲ ਭਾਰੀ ਨੁਕਸਾਨ ਵਿਚ ਆ ਗਈ ਹੈ
By : Mehtab-Ud-Din
ਕਿਸਾਨਾਂ ਨੇ ਕੀਤਾ ਸੀ ਬੀਜ, ਖਾਦ ਤੇ ਲੇਬਰ 'ਤੇ ਵੱਡਾ ਖ਼ਰਚ
ਬਠਿੰਡਾ: ਐਤਵਾਰ ਦੀ ਰਾਤ ਕਰੀਬ 11 ਵਜੇ ਅਚਾਨਕ ਹੋਈ ਤੇਜ਼ ਗੜੇਮਾਰੀ ਅਤੇ ਝੱਖੜ ਨੇ ਪੰਜਾਬ ਦੇ ਕਿਸਾਨਾਂ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਖਾਸ ਕਰਕੇ ਬਾਲਿਆਂਵਾਲੀ ਖੇਤਰ ਵਿਚ ਪੱਕਣ ’ਤੇ ਆਈ ਕਣਕ ਦੀ ਫਸਲ ਭਾਰੀ ਨੁਕਸਾਨ ਵਿਚ ਆ ਗਈ ਹੈ। ਕਿਸਾਨ ਇਸ ਵੇਲੇ ਵਾਢੀ ਲਈ ਤਿਆਰੀਆਂ ਕਰ ਰਹੇ ਸਨ, ਪਰ ਇੱਕ ਰਾਤ ਵਿਚ ਹੀ ਉਨ੍ਹਾਂ ਦੀਆਂ ਮਹੀਨਿਆਂ ਦੀ ਮਿਹਨਤ ਧਰਤੀ ਉੱਤੇ ਵਿਛ ਗਈ।
ਗੜੇਮਾਰ ਕਾਰਣ ਲਗਭਗ 2000 ਏਕੜ ਵਿਚ ਖੜ੍ਹੀ ਕਣਕ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋਈ ਹੈ। ਤੇਜ਼ ਹਵਾਵਾਂ ਅਤੇ ਵੱਡੇ–ਵੰਡੇ ਗੜਿਆਂ ਨੇ ਕਣਕ ਦੀਆਂ ਬੱਲੀਆਂ ਨੂੰ ਧਰਤੀ ਉੱਤੇ ਵਿਛਾ ਦਿੱਤਾ ਹੈ। ਕਈ ਥਾਵਾਂ ਉੱਤੇ ਤਾਂ ਬੱਲੀਆਂ ਟੁੱਟ ਗਈਆਂ ਹਨ ਅਤੇ ਕਣਕ ਬਿਲਕੁਲ ਖਰਾਬ ਹੋ ਗਈ ਹੈ।
ਖੇਤੀ ਮਾਹਿਰਾਂ ਅਨੁਸਾਰ ਇਸ ਨਾਲ ਫਸਲ ਦਾ ਝਾੜ ਬਹੁਤ ਘੱਟ ਜਾਵੇਗਾ ਅਤੇ ਡਿੱਗੀ ਹੋਈ ਫਸਲ ਕੱਟਣ ਲਈ ਵਾਧੂ ਖਰਚਾ ਵੀ ਵਧ ਜਾਵੇਗਾ।
ਕਿਸਾਨਾਂ ਨੇ ਦੱਸਿਆ ਕਿ ਰਾਤ ਨੂੰ ਅਚਾਨਕ ਤੇਜ਼ ਹਵਾਵਾਂ ਚੱਲੀਆਂ ਅਤੇ ਗੜੇ ਪੈਣ ਲੱਗ ਪਏ। ਸਵੇਰੇ ਜਦੋਂ ਉਹ ਖੇਤਾਂ ਵਿਚ ਪਹੁੰਚੇ ਤਾਂ ਗੜਿਆਂ ਦੀਆਂ ਵੱਡੀਆਂ ਢੇਰੀਆਂ ਲੱਗੀਆਂ ਹੋਈਆਂ ਸਨ। ਇੱਕ ਕਿਸਾਨ ਨੇ ਕਿਹਾ, “ਫਸਲ ਕੱਟਣ ਲਈ ਸਿਰਫ਼ ਕੁਝ ਦਿਨ ਬਾਕੀ ਸਨ। ਅਸੀਂ ਬਹੁਤ ਉਮੀਦਾਂ ਨਾਲ ਉਡੀਕ ਰਹੇ ਸੀ, ਪਰ ਇੱਕ ਰਾਤ ਨੇ ਸਭ ਖਤਮ ਕਰ ਦਿੱਤਾ।”
ਗੜੇਮਾਰੀ ਤੋਂ ਬਾਅਦ ਖੇਤੀਬਾੜੀ ਵਿਭਾਗ ਦੇ ਅਧਿਕਾਰੀ ਤੁਰੰਤ ਮੌਕੇ ਉੱਤੇ ਪਹੁੰਚੇ। ਜਗਪਾਲ ਸਿੰਘ, ਮਨਦੀਪ ਸਿੰਘ ਅਤੇ ਪਟਵਾਰੀ ਪ੍ਰਦੀਪ ਸਿੰਘ ਨੇ ਪ੍ਰਭਾਵਿਤ ਖੇਤਰਾਂ ਦਾ ਦੌਰਾ ਕੀਤਾ। ਉਨ੍ਹਾਂ ਖੇਤਾਂ ਵਿਚ ਜਾ ਕੇ ਨੁਕਸਾਨ ਦਾ ਜਾਇਜ਼ਾ ਲਿਆ।
ਪਟਵਾਰੀ ਪ੍ਰਦੀਪ ਸਿੰਘ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਮੁਤਾਬਕ ਲਗਭਗ 70 ਤੋਂ 75 ਫੀਸਦੀ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਕਿਹਾ, “ਅਸੀਂ ਪੂਰੇ ਖੇਤਰ ਵਿਚ ਫਸਲ ਦਾ ਵਿਸਥਾਰ ਨਾਲ ਜਾਇਜ਼ਾ ਲੈ ਰਹੇ ਹਾਂ ਅਤੇ ਰਿਪੋਰਟ ਤਿਆਰ ਕਰ ਰਹੇ ਹਾਂ ਤਾਂ ਜੋ ਉਪਰ ਤੱਕ ਭੇਜੀ ਜਾ ਸਕੇ।”
ਇਸ ਵੇਲੇ ਕਣਕ ਦੀ ਫਸਲ ਵਾਢੀ ਲਈ ਤਿਆਰ ਸੀ। ਕਈ ਕਿਸਾਨਾਂ ਨੇ ਬੀਜ, ਖਾਦ ਅਤੇ ਲੇਬਰ ਉੱਤੇ ਭਾਰੀ ਖਰਚ ਕੀਤਾ ਸੀ।
ਖੇਤੀ ਮਾਹਿਰਾਂ ਦਾ ਕਹਿਣਾ ਹੈ ਕਿ ਗੜੇਮਾਰੀ ਇਸ ਤਰ੍ਹਾਂ ਦੀ ਫਸਲ ਲਈ ਸਭ ਤੋਂ ਖਤਰਨਾਕ ਹੁੰਦੀ ਹੈ ਕਿਉਂਕਿ ਇਸ ਵੇਲੇ ਬੱਲੀਆਂ ਨਾਜ਼ੁਕ ਹੋਣ ਕਰਕੇ ਇੱਕ ਵਾਰ ਡਿੱਗਣ ਤੋਂ ਬਾਅਦ ਉਹ ਮੁੜ ਉੱਠ ਨਹੀਂ ਸਕਦੀਆਂ।
ਪੰਜਾਬ ਵਿਚ ਇਸ ਵਾਰ ਬਦਲਦੇ ਮੌਸਮ ਕਾਰਨ ਕਣਕ ਉੱਤੇ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਵਧ ਰਹੀਆਂ ਹਨ। ਕਿਸਾਨ ਇਸ ਵੇਲੇ ਸਰਕਾਰ ਤੋਂ ਤੁਰੰਤ ਮਦਦ ਅਤੇ ਨੁਕਸਾਨ ਮੁਆਵਜ਼ੇ ਦੀ ਮੰਗ ਕਰ ਰਹੇ ਹਨ ਤਾਂ ਜੋ ਉਨ੍ਹਾਂ ਦਾ ਘਾਟਾ ਘੱਟ ਤੋਂ ਘੱਟ ਹੋ ਸਕੇ।
ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਪੂਰੀ ਰਿਪੋਰਟ ਤਿਆਰ ਕਰਕੇ ਉਪਰੋਂ ਮਦਦ ਲਈ ਭੇਜੀ ਜਾਵੇਗੀ। ਪਰ ਇਸ ਵੇਲੇ ਬਾਲਿਆਂਵਾਲੀ ਅਤੇ ਆਸ-ਪਾਸ ਦੇ ਖੇਤਾਂ ਵਿਚ ਕਿਸਾਨਾਂ ਦੀਆਂ ਆਖਾਂ ਵਿਚ ਉਦਾਸੀ ਅਤੇ ਚਿੰਤਾ ਸਾਫ਼ ਨਜ਼ਰ ਆ ਰਹੀ ਹੈ।
ਇਸ ਤਰ੍ਹਾਂ ਦੀਆਂ ਕੁਦਰਤੀ ਆਫ਼ਤਾਂ ਨੇ ਇੱਕ ਵਾਰ ਫਿਰ ਯਾਦ ਦਿਵਾ ਦਿੱਤਾ ਹੈ ਕਿ ਖੇਤੀ ਇੱਕ ਜੋਖਮ ਭਰਿਆ ਧੰਦਾ ਹੈ ਅਤੇ ਮੌਸਮ ਉੱਤੇ ਨਿਰਭਰ ਰਹਿਣ ਵਾਲੀ ਫਸਲ ਬਚਾਉਣ ਲਈ ਨਵੀਆਂ ਤਕਨੀਕਾਂ ਅਤੇ ਬੀਮਾ ਯੋਜਨਾਵਾਂ ਉੱਤੇ ਵੀ ਧਿਆਨ ਦੇਣ ਦੀ ਲੋੜ ਹੈ।
