ਜੁੱਤੀਆਂ ਵਿਚ ਲੁਕਾ ਕੇ ਅਮਰੀਕਾ ਭੇਜੀ ਜਾ ਰਹੀ ਅਫੀਮ ਫੜੀ

ਗੁਰੂਗਰਾਮ, 5 ਅਕਤੂਬਰ, ਨਿਰਮਲ : ਹਰਿਆਣਾ ਦੇ ਗੁਰੂਗ੍ਰਾਮ ਵਿੱਚ ਅਮਰੀਕੀ ਕੋਰੀਅਰ ਕੰਪਨੀ ਡੀਐਚਐਲ ਰਾਹੀਂ ਜੁੱਤੀਆਂ ਵਿੱਚ ਛੁਪਾ ਕੇ ਅਮਰੀਕਾ ਭੇਜੀ ਜਾ ਰਹੀ 155 ਗ੍ਰਾਮ ਅਫੀਮ ਬਰਾਮਦ ਹੋਈ ਹੈ। ਦਰਅਸਲ ਬੁੱਧਵਾਰ ਨੂੰ ਗੁਰੂਗ੍ਰਾਮ ਦੇ ਉਦਯੋਗ ਵਿਹਾਰ ਸਥਿਤ ਕੋਰੀਅਰ ਕੰਪਨੀ ਦੇ ਦਫਤਰ ’ਚ ਕੋਰੀਅਰਾਂ ਦੀ ਚੈਕਿੰਗ ਦੌਰਾਨ ਇਹ ਅਫੀਮ ਬਰਾਮਦ ਹੋਈ। ਨਾਰਕੋਟਿਕਸ ਵਿਭਾਗ ਨੇ ਸਬੰਧਤ ਧਾਰਾਵਾਂ ਤਹਿਤ ਥਾਣਾ ਸਦਰ ਵਿੱਚ ਕੇਸ ਦਰਜ ਕਰ ਲਿਆ ਹੈ।

ਕੋਰੀਅਰ ਕੰਪਨੀ ਦੇ ਸੁਰੱਖਿਆ ਅਧਿਕਾਰੀ ਵਰਿੰਦਰ ਨੇ ਨਾਰਕੋਟਿਕਸ ਵਿਭਾਗ ਨੂੰ ਦਿੱਤੀ ਜਾਣਕਾਰੀ ਵਿੱਚ ਦੱਸਿਆ ਕਿ ਉਹ ਐਕਸਰੇ ਮਸ਼ੀਨ ਵਿੱਚ ਕੋਰੀਅਰ ਦੀ ਜਾਂਚ ਕਰ ਰਹੇ ਸਨ। ਇਸ ਦੌਰਾਨ ਇੱਕ ਪੈਕਟ ਵਿੱਚ ਨਸ਼ੀਲਾ ਪਦਾਰਥ ਹੋਣ ਦਾ ਸ਼ੱਕ ਜਤਾਇਆ ਗਿਆ। ਉਸ ਦੀ ਸੂਚਨਾ ਮਿਲਣ ’ਤੇ ਵਿਭਾਗ ਦੀ ਟੀਮ ਮੌਕੇ ’ਤੇ ਪਹੁੰਚ ਗਈ। ਜਦੋਂ ਸ਼ੱਕੀ ਪੈਕੇਟ ਨੂੰ ਖੋਲ੍ਹ ਕੇ ਚੈੱਕ ਕੀਤਾ ਗਿਆ ਤਾਂ ਉਸ ਵਿੱਚੋਂ ਇੱਕ ਲੋਅਰ, ਇੱਕ ਟੀ-ਸ਼ਰਟ, ਕਾਲੇ ਚਮੜੇ ਦੀਆਂ ਜੁੱਤੀਆਂ ਦੇ ਦੋ ਜੋੜੇ ਅਤੇ ਭੂਰੇ ਰੰਗ ਦੀਆਂ ਜੁੱਤੀਆਂ ਦਾ ਇੱਕ ਜੋੜਾ ਮਿਲਿਆ।

ਜੁੱਤੀਆਂ ਦੀ ਜਾਂਚ ਕਰਨ ’ਤੇ ਪੈਰਾਂ ਹੇਠੋਂ ਚਾਰ ਵੱਖ-ਵੱਖ ਛੋਟੇ ਪਲਾਸਟਿਕ ਦੇ ਬੈਗ ਮਿਲੇ। ਇਸ ਵਿੱਚੋਂ 155 ਗ੍ਰਾਮ ਅਫੀਮ ਬਰਾਮਦ ਹੋਈ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਹਰਦੀਪ ਸਿੰਘ ਵਾਸੀ ਫਤਿਹਪੁਰ ਸਾਹਿਬ ਨੇ ਇਹ ਕੋਰੀਅਰ ਚੰਡੀਗੜ੍ਹ ਤੋਂ ਬੁੱਕ ਕਰਵਾਇਆ ਸੀ।

ਇਹ ਕੋਰੀਅਰ ਅਮਰੀਕਾ ਦੇ ਓਹਾਇਉ ਮਿਡਲ ਟਾਊਨ ਦੇ ਗੁਰਿੰਦਰ ਸਿੰਘ ਨੂੰ ਭੇਜਿਆ ਜਾ ਰਿਹਾ ਸੀ। ਇਸ ਤੋਂ ਪਹਿਲਾਂ ਵੀ ਕਈ ਵਾਰ ਕੋਰੀਅਰ ਕੰਪਨੀਆਂ ਰਾਹੀਂ ਭੇਜੇ ਜਾਣ ਵਾਲੇ ਨਸ਼ੀਲੇ ਪਦਾਰਥ ਫੜੇ ਜਾ ਚੁੱਕੇ ਹਨ। ਹਰ ਵਾਰ ਕਿਸੇ ਨਾ ਕਿਸੇ ਕੋਰੀਅਰ ਰਾਹੀਂ ਭੇਜੇ ਗਏ ਸਾਮਾਨ ਵਿੱਚ ਨਸ਼ਾ ਛੁਪਾ ਕੇ ਭੇਜਿਆ ਜਾ ਰਿਹਾ ਸੀ।