ਇੰਡੀਗੋ ਦੇ ਜਹਾਜ਼ ਵਿਚ ਬੰਬ ਦੀ ਸੂਚਨਾ ਅਫ਼ਵਾਹ ਨਿਕਲੀ

ਨਵੀਂ ਦਿੱਲੀ, 28 ਮਈ, ਨਿਰਮਲ : ਮੰਗਲਵਾਰ ਸਵੇਰੇ ਟੇਕਆਫ ਤੋਂ ਪਹਿਲਾਂ ਦਿੱਲੀ ਏਅਰਪੋਰਟ ’ਤੇ ਵਾਰਾਣਸੀ ਜਾ ਰਹੀ ਇੰਡੀਗੋ ਫਲਾਈਟ ’ਚ ਇਕ ਟਿਸ਼ੂ ਪੇਪਰ ਮਿਲਿਆ, ਜਿਸ ’ਚ ‘30 ਮਿੰਟ ’ਚ ਬੰਬ ਧਮਾਕਾ’ ਲਿਖਿਆ ਹੋਇਆ ਸੀ। ਇਸ ਨੂੰ ਖ਼ਤਰੇ ਦੀ ਸੰਭਾਵਨਾ ਮੰਨਿਆ ਗਿਆ ਸੀ। ਇਸ ਤੋਂ ਬਾਅਦ ਚਾਲਕ ਦਲ ਦੇ ਮੈਂਬਰਾਂ ਨੇ ਯਾਤਰੀਆਂ ਨੂੰ ਐਮਰਜੈਂਸੀ ਗੇਟ ਰਾਹੀਂ ਬਾਹਰ ਕੱਢਿਆ। ਕੁਝ ਯਾਤਰੀਆਂ ਨੂੰ ਵਿੰਗ ਰਾਹੀਂ ਜਹਾਜ਼ ਤੋਂ ਉਤਰਦੇ ਦੇਖਿਆ ਗਿਆ। ਫਲਾਈਟ ’ਚ 176 ਯਾਤਰੀ ਸਵਾਰ ਸਨ।

ਕਿਊਆਰਟੀ ਅਤੇ ਬੰਬ ਨਿਰੋਧਕ ਟੀਮ ਨੂੰ ਦਿੱਲੀ ਹਵਾਈ ਅੱਡੇ ’ਤੇ ਬੁਲਾਇਆ ਗਿਆ। ਜਹਾਜ਼ ਦੀ ਤਲਾਸ਼ੀ ਲਈ ਗਈ, ਪਰ ਅਧਿਕਾਰੀਆਂ ਨੂੰ ਕੁਝ ਵੀ ਸ਼ੱਕੀ ਨਹੀਂ ਮਿਲਿਆ। ਹਵਾਈ ਅੱਡੇ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਪਾਇਲਟ ਨੂੰ ਸਵੇਰੇ 5.30 ਵਜੇ ਵਾਸ਼ਰੂਮ ਵਿੱਚ ਟਿਸ਼ੂ ਪੇਪਰ ਮਿਲਿਆ ਸੀ। ਟਿਸ਼ੂ ਪੇਪਰ ਵਾਸ਼ਰੂਮ ਤੱਕ ਕਿਵੇਂ ਪਹੁੰਚਿਆ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਇਸ ਮਹੀਨੇ ਭਾਵ 1 ਮਈ ਤੋਂ ਹੁਣ ਤੱਕ 28 ਦਿਨਾਂ ਵਿੱਚ ਹਵਾਈ ਅੱਡੇ, ਸਕੂਲ, ਹਸਪਤਾਲ ਸਮੇਤ ਬੰਬ ਧਮਾਕੇ ਦੀ ਇਹ ਅੱਠਵੀਂ ਘਟਨਾ ਹੈ। ਇਸ ਤੋਂ ਪਹਿਲਾਂ 23 ਮਈ ਨੂੰ ਦਿੱਲੀ ਦੇ ਲੇਡੀ ਸ਼੍ਰੀ ਰਾਮ ਕਾਲਜ ’ਚ ਬੰਬ ਦੀ ਧਮਕੀ ਦਿੱਤੀ ਗਈ ਸੀ। ਇਸ ਤੋਂ ਪਹਿਲਾਂ ਗ੍ਰਹਿ ਮੰਤਰਾਲੇ ਨੂੰ ਵੀ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਗਈ ਸੀ। ਸਾਰੀਆਂ ਧਮਕੀਆਂ ਝੂਠੀਆਂ ਨਿਕਲੀਆਂ।

ਇਸ ਮਹੀਨੇ ਨਕਲੀ ਬੰਬ ਦੀ ਧਮਕੀ ਦੀਆਂ 7 ਘਟਨਾਵਾਂ ਹੋਈਆਂ : 1 ਮਈ: ਦਿੱਲੀ-ਐਨਸੀਆਰ ਦੇ ਕਰੀਬ 100 ਸਕੂਲਾਂ ਨੂੰ ਬੰਬ ਦੀ ਧਮਕੀ ਦਿੱਤੀ ਗਈ।

ਦਿੱਲੀ-ਐੱਨਸੀਆਰ ਦੇ ਸਕੂਲਾਂ ਨੂੰ ਬੰਬ ਦੀ ਧਮਕੀ ਦੇ ਮਾਮਲੇ ’ਚ ਸ਼ੱਕ ਹੈ ਕਿ ਇਹ ਈ-ਮੇਲ ਹੰਗਰੀ ਦੀ ਰਾਜਧਾਨੀ ਬੁਡਾਪੇਸਟ ਤੋਂ ਭੇਜੀ ਗਈ ਸੀ।

1 ਮਈ ਨੂੰ ਇੱਕ ਈ-ਮੇਲ ਭੇਜਿਆ ਗਿਆ ਸੀ ਕਿ ਦਿੱਲੀ-ਐਨਸੀਆਰ ਦੇ 100 ਤੋਂ ਵੱਧ ਸਕੂਲਾਂ ਵਿੱਚ ਬੰਬ ਰੱਖੇ ਗਏ ਹਨ। ਬਾਅਦ ਵਿੱਚ ਪੁਲਿਸ ਨੇ ਇਸ ਸੂਚਨਾ ਨੂੰ ਫਰਜ਼ੀ ਦੱਸਿਆ। ਇਸ ਤੋਂ ਪਹਿਲਾਂ ਐਤਵਾਰ (12 ਮਈ) ਨੂੰ ਦਿੱਲੀ ਹਵਾਈ ਅੱਡੇ, 20 ਹਸਪਤਾਲਾਂ ਅਤੇ ਉੱਤਰੀ ਰੇਲਵੇ ਦੇ ਮੁੱਖ ਲੋਕ ਸੰਪਰਕ ਅਧਿਕਾਰੀ ਦੇ ਦਫ਼ਤਰ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਸੀ। ਇਸ ਦੇ ਨਾਲ ਹੀ 30 ਅਪ੍ਰੈਲ ਨੂੰ ਦਿੱਲੀ ਦੇ ਚਾਚਾ ਨਹਿਰੂ ਹਸਪਤਾਲ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਗਈ ਸੀ

6 ਮਈ ਨੂੰ ਅਹਿਮਦਾਬਾਦ ਦੇ 23 ਸਕੂਲਾਂ ਨੂੰ ਬੰਬ ਦੀ ਧਮਕੀ ਮਿਲੀ ਸੀ। ਇਸ ਤੋਂ ਬਾਅਦ ਸੋਮਵਾਰ ਸਵੇਰੇ ਵਿਦਿਆਰਥੀਆਂ ਅਤੇ ਮਾਪਿਆਂ ਵਿੱਚ ਦਹਿਸ਼ਤ ਫੈਲ ਗਈ। ਈ-ਮੇਲ ਮਿਲਣ ਤੋਂ ਬਾਅਦ ਬੰਬ ਡਿਸਪੋਜ਼ਲ ਸਕੁਐਡ ਅਤੇ ਪੁਲਿਸ ਅਧਿਕਾਰੀਆਂ ਦੀਆਂ ਟੀਮਾਂ ਨੇ ਸਕੂਲਾਂ ਦੀ ਤਲਾਸ਼ੀ ਲਈ।

ਸਕੂਲਾਂ ਨੂੰ ਭੇਜੀ ਗਈ ਈ-ਮੇਲ ਤੌਹੀਦ ਵਾਰੀਅਰ ਦੇ ਨਾਂ ’ਤੇ ਭੇਜੀ ਜਾਂਦੀ ਹੈ। ਈਮੇਲ ਵਿੱਚ ਲਿਖਿਆ ਹੈ…ਇਸਤੀਸ਼ਾਦੀ (ਜੇਹਾਦੀ) ਪੂਰੇ ਸ਼ਹਿਰ ਵਿੱਚ ਫੈਲ ਗਏ ਹਨ ਅਤੇ ਹਮਲਾ ਕਰਨ ਲਈ ਤਿਆਰ ਹਨ। ਤੌਹੀਦ ਦੇ ਯੋਧੇ ਉਨ੍ਹਾਂ ਸਾਰਿਆਂ ਨੂੰ ਮਾਰ ਦੇਣਗੇ ਜੋ ਸਾਡਾ ਵਿਰੋਧ ਕਰਦੇ ਹਨ। ਸਾਡਾ ਉਦੇਸ਼ ਗੁਜਰਾਤ ਵਿੱਚ ਸ਼ਰੀਆ ਕਾਨੂੰਨ ਸਥਾਪਤ ਕਰਨਾ ਹੈ।

12 ਮਈ ਯਾਨੀ ਕਿ ਬੀਤੇ ਐਤਵਾਰ ਨੂੰ ਦੇਸ਼ ਦੇ ਕਈ ਹਵਾਈ ਅੱਡਿਆਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਦਿੱਤੀ ਗਈ ਸੀ। ਈਮੇਲ ਵਿੱਚ ਲਿਖਿਆ ਗਿਆ ਸੀ ਕਿ ਦਿੱਲੀ, ਜੈਪੁਰ, ਦਿੱਲੀ, ਅਹਿਮਦਾਬਾਦ, ਗੁਹਾਟੀ, ਜੰਮੂ, ਲਖਨਊ, ਪਟਨਾ, ਅਗਰਤਲਾ, ਔਰੰਗਾਬਾਦ, ਬਾਗਡੋਗਰਾ, ਭੋਪਾਲ ਅਤੇ ਕਾਲੀਕਟ ਹਵਾਈ ਅੱਡੇ ਦੀਆਂ ਇਮਾਰਤਾਂ ਵਿੱਚ ਬੰਬ ਲੁਕਾਏ ਗਏ ਹਨ।

ਮੇਲ ’ਚ ਲਿਖਿਆ ਸੀ- ਕੁਝ ਘੰਟਿਆਂ ’ਚ ਧਮਾਕਾ ਹੋਵੇਗਾ। ਇਸ ਮੇਲ ਨੂੰ ਖ਼ਤਰਾ ਨਾ ਸਮਝੋ। ਬੰਬ ਨੂੰ ਡਿਫਿਊਜ਼ ਕਰੋ, ਨਹੀਂ ਤਾਂ ਕਈ ਬੇਕਸੂਰ ਮਰ ਜਾਣਗੇ। ਐਤਵਾਰ ਦੁਪਹਿਰ ਨੂੰ ਅਧਿਕਾਰਤ ਆਈਡੀ ’ਤੇ ਮਿਲੀ ਈ-ਮੇਲ ਤੋਂ ਬਾਅਦ ਹਵਾਈ ਅੱਡਾ ਪ੍ਰਸ਼ਾਸਨ ਅਤੇ ਸੁਰੱਖਿਆ ਕਰਮਚਾਰੀਆਂ ਨੂੰ ਚੌਕਸ ਕਰ ਦਿੱਤਾ ਗਿਆ। ਹਵਾਈ ਅੱਡਿਆਂ ਦੀ ਤਲਾਸ਼ੀ ਲਈ ਗਈ, ਪਰ ਕੁਝ ਵੀ ਸ਼ੱਕੀ ਨਹੀਂ ਮਿਲਿਆ।

ਸੋਮਵਾਰ 13 ਮਈ ਨੂੰ ਸਵੇਰੇ ਲਖਨਊ ਦੇ 4 ਸਕੂਲਾਂ ਨੂੰ ਈ-ਮੇਲ ਭੇਜ ਕੇ ਬੰਬ ਦੀ ਧਮਕੀ ਦਿੱਤੀ ਗਈ ਸੀ। ਇਨ੍ਹਾਂ ਵਿੱਚ ਵਿਬਗਿਓਰ, ਸੇਂਟ ਮੈਰੀਜ਼, ਗੋਮਤੀਨਗਰ ਦਾ ਪੀਜੀਆਈ ਅਤੇ ਆਲਮਬਾਗ ਦਾ ਐਲਪੀਐਸ ਸਕੂਲ ਸ਼ਾਮਲ ਹੈ। ਸਕੂਲ ਪ੍ਰਬੰਧਕਾਂ ਨੇ ਤੁਰੰਤ ਸਕੂਲਾਂ ਵਿੱਚ ਛੁੱਟੀ ਦਾ ਐਲਾਨ ਕਰ ਦਿੱਤਾ। ਬੱਚਿਆਂ ਨੂੰ ਕੈਂਪਸ ਤੋਂ ਬਾਹਰ ਕੱਢ ਦਿੱਤਾ ਗਿਆ। ਮਾਪਿਆਂ ਨੂੰ ਸੁਨੇਹਾ ਭੇਜਿਆ ਗਿਆ ਕਿ ਉਹ ਬੱਚਿਆਂ ਨੂੰ ਤੁਰੰਤ ਘਰ ਲੈ ਜਾਣ।

ਡੀਸੀਪੀ ਪੂਰਬੀ ਨੇ ਦੱਸਿਆ ਕਿ ਸਾਰੇ ਸਕੂਲਾਂ ਦਾ ਨਿਰੀਖਣ ਕੀਤਾ ਗਿਆ। ਅਜੇ ਤੱਕ ਕਿਸੇ ਵੀ ਤਰ੍ਹਾਂ ਦੀ ਕੋਈ ਸ਼ੱਕੀ ਵਸਤੂ ਨਹੀਂ ਮਿਲੀ ਹੈ। ਸਾਰੀਆਂ ਧਮਕੀਆਂ ਇੱਕੋ ਮੇਲ ਆਈਡੀ ਤੋਂ ਮਿਲੀਆਂ ਹਨ। ਸਾਈਬਰ ਮਾਹਿਰ, ਏਟੀਐਸ ਅਤੇ ਪੁਲਿਸ ਦੀਆਂ ਟੀਮਾਂ ਜਾਂਚ ਵਿੱਚ ਜੁਟੀਆਂ ਹੋਈਆਂ ਹਨ।