Millionaire Beggar: ਭਿਖਾਰੀ ਕੋਲ ਮਿਲੀ ਬੇਸ਼ੁਮਾਰ ਦੌਲਤ, ਕਾਰ ਤੇ ਜਾਂਦਾ ਹੈ ਭੀਖ ਮੰਗਣ, ਡਰਾਈਵਰ ਵੀ ਰੱਖਿਆ

Millionaire Beggar In Indore: ਜੇਕਰ ਤੁਸੀਂ ਵੀ ਚੌਰਾਹੇ ਤੇ ਖੜੇ ਭਿਖਾਰੀਆਂ ਨੂੰ ਦੇਖ ਉਹਨਾਂ ਉੱਪਰ ਤਰਸ ਖਾ ਕੇ ਉਹਨਾਂ ਨੂੰ ਭੀਖ ਦਿੰਦੇ ਹੋ ਤਾਂ ਸਾਵਧਾਨ ਹੋ ਜਾਓ। ਕਿਉੰਕਿ ਕੁੱਝ ਲੋਕ ਭਿਖਾਰੀ ਬਣਨ ਦਾ ਸਿਰਫ ਦਿਖਾਵਾ ਕਰਦੇ ਹਨ, ਪਰ ਉਹਨਾਂ ਕੋਲ ਖੁੱਲਾ ਪੈਸਾ ਹੁੰਦਾ ਹੈ। ਹਾਲ ਹੀ ਵਿੱਚ ਸੂਬਾ ਸਰਕਾਰਾਂ ਨੇ ਵੀ ਆਪੋ ਆਪਣੇ ਸੂਬਿਆਂ ਨੂੰ ਭਿਖਾਰੀ ਮੁਕਤ ਬਣਾ ਰਹੇ ਹਨ। ਪਰ ਬਾਵਜੂਦ ਇਸਦੇ ਕੋਈ ਫਰਕ ਨਹੀਂ ਪੈ ਰਿਹਾ ਹੈ। ਤਾਜ਼ਾ ਮਾਮਲਾ ਇੰਦੌਰ ਵਿੱਚ ਸਾਹਮਣੇ ਆਇਆ ਜਿੱਥੇ ਇੱਕ ਭਿਖਾਰੀ ਕੋਲੋਂ ਕਰੋੜਾਂ ਦੀ ਜਾਇਦਾਦ ਮਿਲੀ।

ਇੰਦੌਰ ਵਿੱਚ ਮਿਲਿਆ ਇਹ 50 ਸਾਲਾ ਕੋੜ੍ਹ ਤੋਂ ਪੀੜਤ ਭਿਖਾਰੀ ਨੂੰ ਜਦੋਂ ਦੇਖਿਆ ਗਿਆ ਤਾਂ ਇਹ ਆਮ ਭਿਖਾਰੀਆਂ ਵਾਂਗ ਹੀ ਲੱਗ ਰਿਹਾ ਸੀ। ਪਰ ਜਾਂਚ ਤੋਂ ਪਤਾ ਲੱਗਾ ਕਿ ਭਿਖਾਰੀ ਕੋਲ ਬੇਸ਼ੁਮਾਰ ਜਾਇਦਾਦ ਸੀ। ਉਸਦੇ ਕੋਲ ਤਿੰਨ ਘਰ, ਇੱਕ ਕਾਰ ਅਤੇ ਤਿੰਨ ਆਟੋ-ਰਿਕਸ਼ਾ ਸਨ। ਪ੍ਰਸ਼ਾਸਨ ਨੇ ਇੰਦੌਰ ਵਿੱਚ ਭੀਖ ਮੰਗਣ, ਦਾਨ ਦੇਣ ਅਤੇ ਭਿਖਾਰੀਆਂ ਤੋਂ ਸਮਾਨ ਖਰੀਦਣ 'ਤੇ ਕਾਨੂੰਨੀ ਤੌਰ 'ਤੇ ਪਾਬੰਦੀ ਲਗਾਈ ਹੈ। ਪ੍ਰਸ਼ਾਸਨ ਦਾ ਦਾਅਵਾ ਹੈ ਕਿ ਸ਼ਹਿਰ "ਭਿਖਾਰੀ-ਮੁਕਤ" ਹੈ।

ਰੋਜ਼ਾਨਾ ਕਾਰ ਵਿੱਚ ਭੀਖ ਮੰਗਣ ਜਾਂਦਾ ਹੈ ਭਿਖਾਰੀ

ਮਹਿਲਾ ਅਤੇ ਬਾਲ ਵਿਕਾਸ ਵਿਭਾਗ ਦੇ ਅਧਿਕਾਰੀ ਦਿਨੇਸ਼ ਮਿਸ਼ਰਾ ਨੇ ਕਿਹਾ ਕਿ ਜਨਤਾ ਦੁਆਰਾ ਸੂਚਿਤ ਕੀਤੇ ਜਾਣ ਤੋਂ ਬਾਅਦ ਸਰਾਫਾ ਖੇਤਰ ਤੋਂ ਇੱਕ ਕੋੜ੍ਹ ਦੇ ਮਰੀਜ਼ ਨੂੰ ਬਚਾਇਆ ਗਿਆ। ਅਧਿਕਾਰੀ ਨੇ ਕਿਹਾ, "ਸਾਨੂੰ ਪਤਾ ਲੱਗਾ ਕਿ ਇਸ ਵਿਅਕਤੀ ਕੋਲ ਤਿੰਨ ਕੰਕਰੀਟ ਦੇ ਘਰ ਹਨ, ਜਿਸ ਵਿੱਚ ਇੱਕ ਤਿੰਨ ਮੰਜ਼ਿਲਾ ਇਮਾਰਤ ਵੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ, ਉਸਦੇ ਕੋਲ ਤਿੰਨ ਆਟੋ-ਰਿਕਸ਼ਾ ਹਨ ਜੋ ਉਹ ਕਿਰਾਏ 'ਤੇ ਲੈਂਦਾ ਹੈ।" ਉਸਨੇ ਇਹ ਵੀ ਕਿਹਾ ਕਿ ਉਸਦੇ ਕੋਲ ਇੱਕ ਕਾਰ ਵੀ ਹੈ ਜਿਸ ਵਿੱਚ ਉਹ ਭੀਖ ਮੰਗਦਾ ਹੈ ਅਤੇ ਉਸਨੇ ਇੱਕ ਡਰਾਈਵਰ ਵੀ ਰੱਖਿਆ ਹੋਇਆ ਹੈ।

ਪੈਸੇ ਵਿਆਜ ਤੇ ਦੇਣ ਦਾ ਕੰਮ

ਦਿਨੇਸ਼ ਮਿਸ਼ਰਾ ਨੇ ਕਿਹਾ, "ਇਹ ਆਦਮੀ, ਕੋੜ੍ਹ ਤੋਂ ਪੀੜਤ, ਰੇਹੜੇ ਉੱਪਰ ਬੈਠ ਕੇ ਭੀਖ ਮੰਗਦਾ ਹੈ।" ਮਿਸ਼ਰਾ ਦੇ ਅਨੁਸਾਰ, ਇਹ ਆਦਮੀ 2021-22 ਤੋਂ ਭੀਖ ਮੰਗ ਰਿਹਾ ਹੈ। ਇਹ ਵੀ ਖੁਲਾਸਾ ਹੋਇਆ ਹੈ ਕਿ ਉਸਨੇ ਲੋਕਾਂ ਨੂੰ ਚਾਰ ਤੋਂ ਪੰਜ ਲੱਖ ਰੁਪਏ ਵਿਆਜ ਤੇ ਵੀ ਦਿੱਤੇ ਹਨ, ਜਿਨ੍ਹਾਂ ਤੋਂ ਉਹ ਰੋਜ਼ਾਨਾ ਦੇ ਹਿਸਾਬ ਨਾਲ ਵਿਆਜ ਲੈਂਦਾ ਹੈ। ਉਸਨੇ ਅੱਗੇ ਕਿਹਾ, "ਉਹ ਇਸ ਵਿਆਜ ਤੋਂ ਹਰ ਰੋਜ਼ 1,000 ਤੋਂ 2,000 ਰੁਪਏ ਕਮਾਉਂਦਾ ਹੈ। ਇਸ ਤੋਂ ਇਲਾਵਾ, ਉਸਨੂੰ ਰੋਜ਼ਾਨਾ 400 ਤੋਂ 500 ਰੁਪਏ ਭੀਖ ਮਿਲਦੀ ਹੈ।" ਮਿਸ਼ਰਾ ਦੇ ਅਨੁਸਾਰ, ਇਸ ਆਦਮੀ ਨੂੰ ਇੱਕ ਆਸਰਾ ਘਰ ਵਿੱਚ ਰੱਖਿਆ ਗਿਆ ਹੈ।

ਭਿਖਾਰੀ-ਮੁਕਤ ਸ਼ਹਿਰ ਹੈ ਇੰਦੌਰ

ਜ਼ਿਲ੍ਹਾ ਮੈਜਿਸਟਰੇਟ ਸ਼ਿਵਮ ਵਰਮਾ ਨੇ ਕਿਹਾ ਕਿ ਇੰਦੌਰ ਇੱਕ "ਭਿਖਾਰੀ-ਮੁਕਤ ਸ਼ਹਿਰ" ਹੈ, ਅਤੇ ਭੀਖ ਮੰਗਣ ਬਾਰੇ ਜਾਣਕਾਰੀ ਮਿਲਣ 'ਤੇ, ਭਿਖਾਰੀਆਂ ਦੇ ਪੁਨਰਵਾਸ ਲਈ ਮੁਹਿੰਮਾਂ ਚਲਾਈਆਂ ਜਾਂਦੀਆਂ ਹਨ। ਉਸਨੇ ਕਿਹਾ ਕਿ ਪ੍ਰਸ਼ਾਸਨ ਨੂੰ ਸਰਾਫਾ ਖੇਤਰ ਵਿੱਚ ਭੀਖ ਮੰਗਣ ਤੋਂ ਬਚਾਏ ਗਏ ਵਿਅਕਤੀ ਦੀ ਜਾਇਦਾਦ ਬਾਰੇ ਮੁੱਢਲੀ ਜਾਣਕਾਰੀ ਮਿਲੀ ਹੈ ਅਤੇ, ਤੱਥਾਂ ਦੀ ਪੁਸ਼ਟੀ ਕਰਨ ਤੋਂ ਬਾਅਦ, ਢੁਕਵੀਂ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।

ਭਿਖਾਰੀ ਕੋਲ ਕਿੰਨੀ ਜਾਇਦਾਦ ਹੈ?

1. ਤਿੰਨ ਪੱਕੇ ਘਰ

2. ਤਿੰਨ ਤਿੰਨ ਮੰਜ਼ਿਲਾ ਘਰ

3. 600 ਵਰਗ ਫੁੱਟ ਦਾ ਘਰ

4. ਇੱਕ 1-BHK ਸਰਕਾਰ ਦੁਆਰਾ ਦਿੱਤਾ ਗਿਆ ਘਰ

5. ਕਿਰਾਏ ਲਈ ਤਿੰਨ ਆਟੋ ਰਿਕਸ਼ਾ

6. ਇੱਕ ਡਿਜ਼ਾਇਰ ਕਾਰ

7. ਪੈਸੇ ਵਿਆਜ ਤੇ ਦੇਣ ਦਾ ਕੰਮ

ਪਹਿਲਾਂ ਮਕੈਨਿਕ ਵਜੋਂ ਕਰਦਾ ਸੀ ਕੰਮ

ਜਾਣਕਾਰੀ ਮੁਤਾਬਕ ਇਹ ਵਿਅਕਤੀ ਕੁਝ ਸਾਲ ਪਹਿਲਾਂ ਮਿਸਤਰੀ ਵਜੋਂ ਕੰਮ ਕਰਦਾ ਸੀ, ਪਰ ਕੋੜ੍ਹ ਕਾਰਨ ਆਪਣੀਆਂ ਉਂਗਲਾਂ ਅਤੇ ਪੈਰਾਂ ਨੂੰ ਖੋਹ ਬੈਠਿਆ, ਉਹ ਇਹ ਕੰਮ ਜਾਰੀ ਨਹੀਂ ਰੱਖ ਸਕਿਆ ਅਤੇ ਸਮਾਜਿਕ ਅਤੇ ਪਰਿਵਾਰਕ ਵਿਤਕਰੇ ਦਾ ਸ਼ਿਕਾਰ ਹੋਣ ਤੋਂ ਬਾਅਦ, ਉਸਨੇ ਸਰਾਫਾ ਖੇਤਰ ਦੇ ਮਸ਼ਹੂਰ ਚਾਟ-ਚੌਪੱਟੀ ਦੇ ਨੇੜੇ ਰਾਤ ਨੂੰ ਭੀਖ ਮੰਗਣੀ ਸ਼ੁਰੂ ਕਰ ਦਿੱਤੀ।