ਮਲਬੇ ਕਾਰਨ ਯਮੁਨਾ ਨਦੀ ਵਿੱਚ ਬਣੀ ਝੀਲ, ਪਿੰਡ ਦੇ ਸਾਰੇ ਘਰ ਕਰਵਾ'ਤੇ ਖਾਲੀ

ਉੱਤਰਕਾਸ਼ੀ, ਕਵਿਤਾ: ਯਮੁਨਾ ਵੈਲੀ ਦੇ ਸਯਾਨਾ ਚੱਟੀ ਵਿਖੇ ਮਲਬੇ ਕਾਰਨ ਝੀਲ ਬਣ ਗਈ ਹੈ। ਝੀਲ ਦੇ ਪਾਣੀ ਦਾ ਪਧਰ ਬਹੁਤ ਜ਼ਿਆਦਾ ਹੈ ਜਿਸ ਕਰਕੇ ਲੋਕਾਂ ਦੇ ਘਰਾਂਂ ਵਿੱਚ ਵੀ ਪਾਣੀ ਵੜ ਗਿਆ ਹੈ। ਹਾਲਾਂਕਿ ਪ੍ਰਸ਼ਾਸਨ ਨੇ ਆਸ-ਪਾਸ ਦੇ ਪਿੰਡਾਂ ਨੂੰ ਕਹਿ ਕੇ ਘਰ ਖਾਲੀ ਕਰਵਾ ਦਿੱਤੇ ਹਨ ਤਾਂ ਜੋ ਜਾਨੀ ਨੁਕਸਾਨ ਤੋਂ ਬਚਿਆ ਜਾ ਸਕੇ।

ਬੰਦ ਰਾਹ ਨੂੰ ਤੇ ਮਲਬੇ ਨੂੰ ਹਟਾਉਣ ਲਈ NDRF, SDRF, ਸਿਹਤ, ਮਾਲੀਆ, ਪੁਲਿਸ, ਖੁਰਾਕ ਸਪਲਾਈ ਅਤੇ PWD ਟੀਮਾਂ ਸਮੇਤ ਸਾਰੀਆਂ ਏਜੰਸੀਆਂ ਮੌਕੇ 'ਤੇ ਪਹੁੰਚ ਗਈਆਂ ਹਨ। ਜ਼ਿਲ੍ਹਾ ਮੈਜਿਸਟ੍ਰੇਟ ਪ੍ਰਸ਼ਾਂਤ ਆਰੀਆ ਅਤੇ ਯਮੁਨੋਤਰੀ ਦੇ ਵਿਧਾਇਕ ਸੰਜੇ ਡੋਭਾਲ ਨੇ ਮੌਕੇ ਉੱਤੇ ਪਹੁੰਚ ਕੇ ਜਾਇਜ਼ਾ ਵੀ ਲਿਆ ਹੈ।

ਤੁਹਾਨੂੰ ਦੱਸ ਦਈਏ ਕਿ ਜ਼ਿਲ੍ਹਾ ਮੈਜਿਸਟ੍ਰੇਟ ਪ੍ਰਸ਼ਾਂਤ ਆਰੀਆ ਨੇ ਕਿਹਾ ਕਿ ਸਥਾਨਕ ਲੋਕਾਂ ਨੂੰ ਘਬਰਾਉਣ ਦੀ ਕੋਈ ਲੋੜ ਨਹੀਂ ਹੈ। ਪ੍ਰਸ਼ਾਸਨ ਲੋਕਾਂ ਲਈ ਸਾਰੇ ਸੁਰੱਖਿਆ ਉਪਾਅ ਕਰ ਰਿਹਾ ਹੈ। ਨਾਲ ਹੀ, ਮਲਬੇ ਨਾਲ ਬਣੀ ਝੀਲ ਨੂੰ ਖੋਲ੍ਹਣ ਲਈ ਸਾਰੀਆਂ ਸਬੰਧਤ ਏਜੰਸੀਆਂ ਮੌਕੇ 'ਤੇ ਮੌਜੂਦ ਹਨ। ਸਥਿਤੀ ਸਥਿਰ ਹੁੰਦੇ ਹੀ ਝੀਲ ਨੂੰ ਖੋਲ੍ਹਣ ਲਈ ਸਾਰੇ ਜ਼ਰੂਰੀ ਕਦਮ ਚੁੱਕਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

ਤੁਹਾਨੂੰ ਇਹ ਵੀ ਦੱਸ ਦਈਏ ਕਿ ਸਯਾਨਾਚੱਟੀ ਨੇੜੇ ਕੁਪੜਾ ਖਾੜ ਵਿੱਚ ਮਲਬਾ ਡਿੱਗਣ ਕਾਰਨ ਯਮੁਨਾ ਨਦੀ ਵਿੱਚ ਬਣੀ ਝੀਲ ਦੇ ਪਾਣੀ ਦਾ ਪੱਧਰ ਇੱਕ ਵਾਰ ਫਿਰ ਵੱਧ ਗਿਆ ਹੈ। ਇਸ ਕਾਰਨ ਲਗਭਗ 60 ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਭੇਜਿਆ ਗਿਆ ਹੈ। ਇਸ ਦੇ ਨਾਲ ਹੀ ਕੁਠਨੌਰ ਅਤੇ ਖਰਾਦੀ ਦੇ ਨੀਵੇਂ ਇਲਾਕਿਆਂ ਦੇ ਲੋਕ ਵੀ ਆਪਣੇ ਪਿੰਡਾਂ ਵੱਲ ਚਲੇ ਗਏ ਹਨ।

ਮੌਸਮ ਸਾਫ਼ ਹੋਣ ਦੇ ਬਾਵਜੂਦ, ਵੀਰਵਾਰ ਨੂੰ ਕੁਪੜਾ ਖਾੜ ਤੋਂ ਮਲਬਾ ਅਤੇ ਪੱਥਰ ਫਿਰ ਵਹਿਣ ਲੱਗੇ, ਜਿਸ ਨਾਲ ਨਦੀ ਦਾ ਵਹਾਅ ਰੁਕ ਗਿਆ। ਇਸ ਕਾਰਨ, ਇਸਦੇ ਪਿੱਛੇ ਬਣੀ ਝੀਲ ਦਾ ਪਾਣੀ ਦਾ ਪੱਧਰ, ਜੋ ਕਿ ਲਗਭਗ 400 ਮੀਟਰ ਲੰਬੀ ਅਤੇ 300 ਮੀਟਰ ਚੌੜੀ ਸੀ, ਵਧ ਗਿਆ ਅਤੇ ਸਯਾਨਾਚੱਟੀ ਸ਼ਹਿਰ ਵਿੱਚ ਹੜ੍ਹ ਆ ਗਿਆ।