ਕੈਨੇਡਾ ਦੇ ਲੋਕ ਸੁਰੱਖਿਆ ਮੰਤਰੀ ’ਤੇ ਤੀਜੀ ਵਾਰ ਡਿੱਗੀ ਮੁਸੀਬਤ

ਔਟਵਾ : ਕੈਨੇਡਾ ਦੇ ਲੋਕ ਸੁਰੱਖਿਆ ਮੰਤਰੀ ਗੈਰੀ ਆਨੰਦਸਗਰੀ ਮੁੜ ਵਿਵਾਦਾਂ ਵਿਚ ਹਨ ਅਤੇ ਇਸ ਵਾਰ ਪਾਬੰਦੀਸ਼ੁਦਾ ਅਤਿਵਾਦੀ ਜਥੇਬੰਦੀ ਲਿੱਟੇ ਦੀ ਇਕ ਮਹਿਲਾ ਮੈਂਬਰ ਦੀ ਵੀਜ਼ਾ ਅਰਜ਼ੀ ਬਾਰੇ ਵਾਰ-ਵਾਰ ਪੁੱਛ-ਪੜਤਾਲ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਹਾਲਾਂਕਿ ਇਹ ਘਟਨਾ ਗੈਰੀ ਆਨੰਦਸੰਗਰੀ ਦੇ ਮੰਤਰੀ ਬਣਨ ਤੋਂ ਪਹਿਲਾਂ ਵਾਪਰੀ ਪਰ ਉਨ੍ਹਾਂ ਦੇ ਰਾਈਡਿੰਗ ਦਫ਼ਤਰ ਵੱਲੋਂ ਰਜਨੀ ਰਾਜਮਨੋਹਰਨ ਦੀ ਇੰਮੀਗ੍ਰੇਸ਼ਨ ਫਾਈਲ ਬਾਰੇ ਜਾਣਕਾਰੀ ਹਾਸਲ ਕਰਨ ਦੇ ਯਤਨਾਂ ਤੋਂ ਹਾਲ ਹੀ ਵਿਚ ਪਰਦਾ ਉਠਿਆ ਹੈ। ਪਿਛਲੇ ਹਫ਼ਤੇ ਇਕ ਫੈਡਰਲ ਅਦਾਲਤ ਨੇ ਰਜਨੀ ਰਾਜਮਨੋਹਰਨ ਦੀ ਕੈਨੇਡਾ ਵਾਪਸੀ ਦੀ ਸੰਭਾਵਨਾ ਰੱਦ ਕਰ ਦਿਤੀ ਜਿਸ ਨੂੰ ਸ੍ਰੀਲੰਕਾ ਦੇ ਤਾਮਿਲ ਟਾਈਗਰਜ਼ ਦੀ ਮੈਂਬਰ ਹੋਣ ਦੇ ਦੋਸ਼ ਹੇਠ ਡਿਪੋਰਟ ਕਰ ਦਿਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਗਲੋਬਲ ਨਿਊਜ਼ ਦੀ ਰਿਪੋਰਟ ਵਿਚ ਦਾਅਵਾ ਕੀਤਾ ਗਿਆ ਸੀ ਕਿ ਆਨੰਦਸੰਗਰੀ ਵੱਲੋਂ ਸ੍ਰੀਲੰਕਾ ਦੀ ਲਿਬਰੇਸ਼ਨ ਟਾਇਗਰਜ਼ ਆਫ਼ ਤਾਮਿਲ ਇਲਮ ਦੇ ਇਕ ਕਥਿਤ ਮੈਂਬਰ ਨੂੰ ਕੈਨੇਡੀਅਨ ਪੀ.ਆਰ. ਦਿਤੇ ਜਾਣ ਦੀ ਵਕਾਲਤ ਕੀਤੀ ਗਈ।

ਲਿੱਟੇ ਦੀ ਮਹਿਲਾ ਮੈਂਬਰ ਦੀ ਇੰਮੀਗ੍ਰੇਸ਼ਨ ਅਰਜ਼ੀ ਬਾਰੇ ਕੀਤੀ ਸੀ ਪੁੱਛ-ਪੜਤਾਲ

ਸਿਰਫ਼ ਐਨਾ ਹੀ ਨਹੀਂ ਮੀਡੀਆ ਰਿਪੋਰਟ ਵਿਚ ਇਥੋਂ ਤੱਕ ਦਾਅਵਾ ਕੀਤਾ ਗਿਆ ਕਿ ਸੇਲਵਾਕੁਮਾਰਨ ਦੀ ਪਤਨੀ ਆਨੰਦਸੰਗਰੀ ਦੇ ਹਲਕੇ ਵਿਚ ਨਹੀਂ ਰਹਿੰਦੀ ਅਤੇ ਇਸ ਦੇ ਬਾਵਜੂਦ ਉਸ ਨੂੰ ਕੈਨੇਡੀਅਨ ਪੀ.ਆਰ. ਦੀ ਸਿਫ਼ਾਰਸ਼ ਕੀਤੀ ਗਈ। ਸੇਲਵਾਕੁਮਾਰਨ ਦੀ ਪਤਨੀ ਦੇ ਇੰਮੀਗ੍ਰੇਸ਼ਨ ਰਿਕਾਰਡ, ਟੈਕਸ ਰਿਟਰਨਾਂ ਅਤੇ ਹੋਰਨਾਂ ਰਸੀਦਾਂ ਵਿਚ ਮਾਰਖਮ ਦਾ ਪਤਾ ਲਿਖਿਆ ਹੋਇਆ ਹੈ। ਸੇਲਵਾਕੁਮਾਰਨ ਦੀ ਪਤਨੀ ਵੱਲੋਂ ਆਪਣੇ ਪਤੀ ਦੀ ਹਮਾਇਤ ਵਿਚ ਇੰਮੀਗ੍ਰੇਸ਼ਨ ਮੰਤਰਾਲੇ ਨੂੰ ਲਿਖਵਾਏ ਗਏ ਦੋ ਪੱਤਰ ਮਾਰਖਮ ਦੇ ਕੌਂਸਲਰ ਅਤੇ ਵਿਧਾਇਕ ਨੇ ਜਾਰੀ ਕੀਤੇ। ਸੇਲਵਾਕੁਮਾਰਨ ਦੀ ਪਤਨੀ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਸ ਨੇ ਆਪਣੇ ਵਕੀਲ ਦਾ ਨੰਬਰ ਦੇ ਦਿਤਾ ਅਤੇ ਵਕੀਲ ਨੇ ਤਸਦੀਕ ਕਰ ਦਿਤਾ ਕਿ ਉਸ ਦੀ ਮੁਵੱਕਲ 2016 ਤੋਂ ਮਾਰਖਮ ਵਿਖੇ ਰਹਿ ਰਹੀ ਹੈ। ਸੇਲਵਾਕੁਮਾਰਨ ਦੇ ਵਕੀਲ ਲੌਰਨ ਵਾਲਡਮੈਨ ਨੇ ਕਿਹਾ ਸੀ ਕਿ ਇਕ ਐਮ.ਪੀ. ਅਜਿਹੇ ਸਿਫ਼ਾਰਸ਼ੀ ਪੱਤਰ ਉਸ ਵੇਲੇ ਲਿਖਦਾ ਹੈ ਜਦੋਂ ਹਲਕੇ ਦੇ ਲੋਕਾਂ ਵੱਲੋਂ ਆਪਣੇ ਚੁਣੇ ਹੋਏ ਨੁਮਾਇੰਦੇ ਨਾਲ ਸੰਪਰਕ ਕਰਦਿਆਂ ਅਜਿਹਾ ਕਰਨ ਲਈ ਦਬਾਅ ਪਾਇਆ ਜਾਂਦਾ ਹੈ ਅਤੇ ਅਜਿਹਾ ਕਰਨ ਵਿਚ ਕੁਝ ਗਲਤ ਵੀ ਨਹੀਂ ਹੁੰਦਾ।

ਮੰਤਰੀ ਬਣਨ ਤੋਂ ਪਹਿਲਾਂ ਵਾਲਾ ਇਕ ਹੋਰ ਸੰਜੀਦਾ ਮਾਮਲਾ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੇ ਦਫ਼ਤਰ ਵੱਲੋਂ ਤਾਜ਼ਾ ਮਾਮਲੇ ਬਾਰੇ ਕੋਈ ਟਿੱਪਣੀ ਨਹੀਂ ਸੀ ਕੀਤੀ ਗਈ ਪਰ ਲੋਕ ਸੁਰੱਖਿਆ ਮੰਤਰੀ ਦੇ ਦਫ਼ਤਰ ਨੇ ਇਕ ਬਿਆਨ ਜਾਰੀ ਕਰਦਿਆਂ ਕਿਹਾ, ‘‘ਮੈਂਬਰ ਪਾਰਲੀਮੈਂਟ ਵੱਲੋਂ ਆਪਣੇ ਹਲਕੇ ਤੋਂ ਬਾਹਰ ਰਹਿੰਦੇ ਕੈਨੇਡੀਅਨ ਨਾਗਰਿਕਾਂ ਦੀ ਮਦਦ ਕਰਨਾ ਕੋਈ ਨਵੀਂ ਗੱਲ ਨਹੀਂ, ਖਾਸ ਤੌਰ ’ਤੇ ਉਨ੍ਹਾਂ ਹਾਲਾਤ ਵਿਚ ਜਦੋਂ ਸਥਾਨਕ ਐਮ.ਪੀ., ਮੰਤਰੀ ਹੋਣ ਕਰ ਕੇ ਅਜਿਹਾ ਕਰਨ ਤੋਂ ਅਸਮਰੱਥ ਹੋਵੇ।’’ ਗੈਰੀ ਆਨੰਦਸੰਗਰੀ ਨੇ 2016 ਅਤੇ 2023 ਵਿਚ ਪੀ.ਆਰ. ਦੇ ਸਿਫ਼ਾਰਸ਼ੀ ਪੱਤਰ ਲਿਖੇ ਅਤੇ ਉਸ ਵੇਲੇ ਉਹ ਮੰਤਰੀ ਮੰਡਲ ਵਿਚ ਸ਼ਾਮਲ ਨਹੀਂ ਸਨ। ਆਨੰਦਸੰਗਰੀ ਦੀਆਂ ਚਿੱਠੀਆਂ ਵਿਚ ਵਰਤੀ ਸ਼ਬਦਾਵਲੀ ਨੂੰ ਗੌਰ ਨਾਲ ਪੜ੍ਹਿਆ ਜਾਵੇ ਤਾਂ ਇਨ੍ਹਾਂ ਵਿਚ ਲਿਖਿਆ ਹੈ ਕਿ ਸੇਲਵਾਕੁਮਾਰਨ ਬਾਰੇ ਸੀ.ਬੀ.ਐਸ.ਏ. ਦੀਆਂ ਚਿੰਤਾਵਾਂ ਬੇਤੁਕੀਆਂ ਹਨ। ਲੋਕ ਸੁਰੱਖਿਆ ਮੰਤਰੀ ਨੇ ਉਸ ਵੇਲੇ ਦਾਅਵਾ ਕੀਤਾ ਸੀ ਕਿ ਸੇਲਵਾਕੁਮਾਰਨ ਨੂੰ ਕੈਨੇਡਾ ਆਉਣ ਦੇ ਅਯੋਗ ਮੰਨਣ ਦਾ ਕੋਈ ਆਧਾਰ ਨਹੀਂ ਜਦਕਿ ਸੀ.ਬੀ.ਐਸ.ਏ. ਵੱਲੋਂ ਆਪਣੇ ਫੈਸਲੇ ਦੇ ਹੱਕ ਵਿਚ ਵਿਸਤਾਤਰ ਰਿਪੋਰਟ ਨੱਥੀ ਕੀਤੀ ਗਈ ਜਿਸ ਵਿਚ ਸਾਫ਼ ਤੌਰ ’ਤੇ ਲਿਖਿਆ ਕਿ ਸੇਲਵਾਕੁਮਾਰਨ ਨੇ 1992 ਵਿਚ ਲਿੱਟੇ ਵਾਸਤੇ ਕੰਮ ਕਰਨਾ ਸ਼ੁਰੂ ਕੀਤਾ ਅਤੇ 1998 ਤੱਕ ਜਾਰੀ ਰੱਖਿਆ। ਚੇਤੇ ਰਹੇ ਕਿ ਲਿੱਟੇ ਦਾ ਮਈ 2009 ਵਿਚ ਸ੍ਰੀਲੰਕਾ ਦੀ ਫੌਜ ਵੱਲੋਂ ਖਾਤਮਾ ਕਰ ਦਿਤਾ ਗਿਆ ਸੀ।