ਕੈਨੇਡਾ ਵਿਚ ਨਵੇਂ ਤਰੀਕੇ ਨਾਲ ਪੈਣਗੀਆਂ ਵੋਟਾਂ

ਕੈਲਗਰੀ : ਇਲੈਕਸ਼ਨਜ਼ ਕੈਨੇਡਾ ਨੇ 200 ਤੋਂ ਵੱਧ ਉਮੀਦਵਾਰਾਂ ਵਾਲੇ ਹਲਕੇ ਵਿਚ ਵੋਟਰਾਂ ਨੂੰ ਦਰਪੇਸ਼ ਸਮੱਸਿਆ ਦਾ ਹੱਲ ਪੇਸ਼ ਕਰ ਦਿਤਾ ਹੈ। ਜੀ ਹਾਂ, ਐਲਬਰਟਾ ਦੇ ਬੈਟਲ ਰਿਵਰ-ਕ੍ਰੋਅਫੂਟ ਪਾਰਲੀਮਾਨੀ ਹਲਕੇ ਵਿਚ ਵੋਟਰਾਂ ਨੂੰ ਇਕ ਪਰਚੀ ਦਿਤੀ ਜਾਵੇਗੀ ਜਿਸ ਉਤੇ ਉਨ੍ਹਾਂ ਨੂੰ ਆਪਣੇ ਮਨਪਸੰਦ ਉਮੀਦਵਾਰ ਦਾ ਨਾਂ ਲਿਖਣਾ ਹੋਵੇਗਾ ਅਤੇ ਲੰਮੀ ਚੌੜੀ ਵੋਟਰ ਸੂਚੀ ਵਿਚੋਂ ਨਾਂ ਲੱਭ ਕੇ ਟਿਕ ਮਾਰਕ ਕਰਨ ਦੀ ਜ਼ਰੂਰਤ ਨਹੀਂ ਪਵੇਗੀ। ਕਿਤਾਬਚੇ ਦੇ ਰੂਪ ਵਿਚ ਉਮੀਦਵਾਰਾਂ ਦੀ ਸੂਚੀ ਦੀਆਂ ਕਈ ਕਾਪੀਆਂ ਹਰ ਪੋÇਲੰਗ ਸਟੇਸ਼ਨ ’ਤੇ ਮੁਹੱਈਆ ਕਰਵਾਈਆਂ ਜਾਣਗੀਆਂ ਤਾਂਕਿ ਵੋਟਰ ਆਪਣੇ ਪਸੰਦੀਦਾ ਉਮੀਦਵਾਰਾਂ ਦਾ ਨਾਂ ਦੇਖ ਕੇ ਪਰਚੀ ’ਤੇ ਲਿਖ ਸਕਣ।

ਪਰਚੀ ’ਤੇ ਮਨਪਸੰਦ ਉਮੀਦਵਾਰ ਦਾ ਨਾਂ ਲਿਖਣਗੇ ਵੋਟਰ

ਦੱਸ ਦੇਈਏ ਕਿ ਕੈਨੇਡਾ ਦਾ ਚੋਣ ਕਾਨੂੰਨ ਹਾਲਾਤ ਦੇ ਮੱਦੇਨਜ਼ਰ ਇਲੈਕਸ਼ਨਜ਼ ਕੈਨੇਡਾ ਨੂੰ ਆਰਜ਼ੀ ਤਬਦੀਲੀਆਂ ਕਰਨ ਦੀ ਇਜਾਜ਼ਤ ਦਿੰਦਾ ਹੈ ਅਤੇ ਇਸੇ ਤਹਿਤ ਪਰਚੀਆਂ ’ਤੇ ਨਾਂ ਲਿਖਣ ਵਾਲਾ ਤਰੀਕਾ ਅਪਣਾਇਆ ਗਿਆ ਹੈ। ਦੂਜੇ ਪਾਸੇ ਚੋਣ ਸੁਧਾਰਾਂ ਦੀ ਵਕਾਲਤ ਕਰਨ ਵਾਲੀ ਜਥੇਬੰਦੀ ਲੌਂਗੈਸਟ ਬੈਲਟ ਕਮੇਟੀ ਵੱਲੋਂ ਪਰਚੀ ’ਤੇ ਨਾਂ ਲਿਖਣ ਵਾਲੇ ਤਰੀਕੇ ਨੂੰ ਵਾਜਬ ਮੰਨਿਆ ਜਾ ਰਿਹਾ ਹੈ ਪਰ ਇਲੈਕਸ਼ਨਜ਼ ਕੈਨੇਡਾ ਨੇ ਪਹਿਲਾਂ ਹੀ ਸੁਚੇਤ ਕਰ ਦਿਤਾ ਹੈ ਕਿ ਵੋਟਾਂ ਦੀ ਗਿਣਤੀ ਕਰਨ ਵਿਚ ਹੁਣ ਵੀ ਵਾਧੂ ਸਮਾਂ ਲੱਗ ਸਕਦਾ ਹੈ। ਮਾਹਰਾਂ ਦਾ ਕਹਿਣਾ ਹੈ ਕਿ ਜੇ ਵੋਟਰ ਪਰਚੀ ’ਤੇ ਸਾਰੇ ਨਾਂ ਛਾਪ ਕੇ ਲੋਕਾਂ ਨੂੰ ਦਿਤੇ ਜਾਂਦੇ ਤਾਂ ਇਸ ਦੀ ਲੰਬਾਈ ਇਕ ਮੀਟਰ ਤੋਂ ਵਧ ਜਾਣੀ ਸੀ ਅਤੇ ਅਜਿਹੇ ਵਿਚ ਨਾ ਸਿਰਫ਼ ਵੋਟ ਪਾਉਣ ਵੇਲੇ ਦਿੱਕਤਾਂ ਆਉਂਦੀਆਂ ਸਗੋਂ ਵੋਟਾਂ ਦੀ ਗਿਣਤੀ ਵਿਚ ਬਹੁਤ ਜ਼ਿਆਦਾ ਸਮਾਂ ਲਗਦਾ। ਦਿਲਚਸਪ ਗੱਲ ਇਹ ਹੈ ਕਿ ਕੰਜ਼ਰਵੇਟਿਵ ਪਾਰਟੀ ਦੇ ਐਮ.ਪੀ. ਡੈਮੀਅਨ ਕੁਰੇਕ ਵੱਲੋਂ ਪਾਰਟੀ ਆਗੂ ਪਿਅਰੇ ਪੌਇਲੀਐਵ ਨੂੰ ਹਾਊਸ ਆਫ ਕਾਮਨਜ਼ ਵਿਚ ਪਹੁੰਚਾਉਣ ਲਈ ਅਸਤੀਫ਼ਾ ਦਿਤਾ ਸੀ ਪਰ ਮੌਜੂਦਾ ਹਾਲਾਤ ਪੌਇਲੀਐਵ ਦੀ ਯਕੀਨੀ ਜਿੱਤ ਵੱਲ ਇਸ਼ਾਰਾ ਨਹੀਂ ਕਰ ਰਹੇ।

209 ਉਮੀਦਵਾਰਾਂ ਵਾਲੇ ਹਲਕੇ ਵਿਚ ਜ਼ਿਮਨੀ ਚੋਣ 18 ਅਗਸਤ ਨੂੰ

ਚੋਣ ਮੈਦਾਨ ਵਿਚ 209 ਉਮੀਦਵਾਰ ਨਿੱਤਰ ਚੁੱਕੇ ਹਨ ਅਤੇ ਉਨਟਾਰੀਓ ਦੇ ਕਾਰਲਟਨ ਹਲਕੇ ਵਿਚ 90 ਤੋਂ ਵੱਧ ਉਮੀਦਵਾਰਾਂ ਨਾਲ ਬਣਿਆ ਰਿਕਾਰਡ ਬਹੁਤ ਪਿੱਛੇ ਰਹਿ ਗਿਆ ਹੈ। ਬੈਟਲ ਰਿਵਰ-ਕ੍ਰੋਅਫੂਟ ਹਲਕਾ 2004 ਤੋਂ ਕੰਜ਼ਰਵੇਟਿਵ ਪਾਰਟੀ ਦਾ ਗੜ੍ਹ ਬਣਿਆ ਹੋਇਆ ਹੈ ਅਤੇ ਅਪ੍ਰੈਲ ਵਿਚ ਹੋਈਆਂ ਆਮ ਚੋਣਾਂ ਦੌਰਾਨ ਡੈਮੀਅਨ ਕੁਰੇਕ ਨੇ 83 ਫੀ ਸਦੀ ਵੋਟਾਂ ਹਾਸਲ ਕਰਦਿਆਂ ਜਿੱਤ ਦਰਜ ਕੀਤੀ ਸੀ। ਪੇਸ਼ੇ ਵਜੋਂ ਕਿਸਾਨ ਡੈਮੀਅਨ ਕੁਰੇਕ 2019 ਤੋਂ ਐਮ.ਪੀ. ਸਨ ਪਰ ਸੰਸਦ ਵਿਚ ਪਾਰਟੀ ਆਗੂ ਦੀ ਗੈਰਹਾਜ਼ਰੀ ਨੇ ਉਨ੍ਹਾਂ ਨੂੰ ਨਿਰਾਸ਼ ਕਰ ਦਿਤਾ। 20 ਸਾਲ ਤੋਂ ਕਾਰਲਟਨ ਸੀਟ ’ਤੇ ਕਾਬਜ਼ ਪੌਇਲੀਐਵ ਦੀ ਹਾਰ ਤੋਂ ਹਰ ਕੋਈ ਹੈਰਾਨ ਸੀ ਜੋ ਲਿਬਰਲ ਪਾਰਟੀ ਦੇ ਨਵੇਂ ਨਕੋਰ ਉਮੀਦਵਾਰ ਤੋਂ ਹਾਰ ਗਏ ਅਤੇ ਹਾਰ ਦਾ ਇਕ ਵੱਡਾ ਕਾਰਨ ਉਮੀਦਵਾਰਾਂ ਦੀ ਲੰਮੀ ਸੂਚੀ ਨੂੰ ਵੀ ਮੰਨਿਆ ਗਿਆ। ਕਾਰਲਟਨ ਹਲਕੇ ਵਿਚ 91 ਉਮੀਦਵਾਰਾਂ ਨੇ ਚੋਣ ਲੜੀ ਸੀ ਅਤੇ ਉਥੇ ਵੀ ਲੌਂਗੈਸਟ ਬੈਲਟ ਕਮੇਟੀ ਵਾਲੇ ਹੁੰਮ ਹੁਮਾ ਕੇ ਪੁੱਜੇ ਸਨ। ਉਧਰ ਕੁਝ ਆਜ਼ਾਦ ਉਮੀਦਵਾਰਾਂ ਦਾ ਕਹਿਣਾ ਹੈ ਕਿ ਡੈਮੀਅਨ ਦੇ ਅਸਤੀਫ਼ੇ ਕਰ ਕੇ ਹੀ ਉਹ ਮੈਦਾਨ ਵਿਚ ਨਿੱਤਰੇ ਕਿਉਂਕਿ ਡੈਮੀਅਨ ਨੇ ਇਲਾਕੇ ਦੇ ਲੋਕਾਂ ਦਾ ਭਰੋਸਾ ਤੋੜਿਆ ਹੈ। ਇਥੇ ਦਸਣਾ ਬਣਦਾ ਹੈਕਿ ਬੈਟਲ ਰਿਵਰ-ਕ੍ਰੋਅਫੂਟ ਪਾਰਲੀਮਾਨੀ ਹਲਕੇ ਵਿਚ 18 ਅਗਸਤ ਨੂੰ ਵੋਟਾਂ ਪੈਣੀਆਂ ਹਨ।