ਅਸੀਂ ਸਿਰਫ਼ ਚੋਣਵੇ ਦੇਸ਼ਾਂ ਨਾਲ ਟੈਰਿਫ਼ ਦੀ ਗਲ ਕਰਾਂਗੇ : ਟਰੰਪ

ਸਿਰਫ਼ ਚੋਟੀ ਦੀਆਂ 15 ਅਰਥਵਿਵਸਥਾਵਾਂ ਨਾਲ ਹੀ ਗੱਲਬਾਤ ਹੋਵੇਗੀ, ਭਾਰਤ ਵੀ ਸ਼ਾਮਿਲ

ਵਾਸ਼ਿੰਗਟਨ : ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਦੁਨੀਆ ਭਰ ਦੇ ਦੇਸ਼ਾਂ 'ਤੇ ਲਗਾਏ ਗਏ ਟੈਰਿਫ 90 ਦਿਨਾਂ ਲਈ ਰੋਕ ਦਿੱਤੇ ਹਨ। ਹਾਲਾਂਕਿ ਇਹ ਰੋਕ ਅਸਥਾਈ ਹੈ, ਪਰ ਇਸ ਨਾਲ ਭਾਰਤ ਸਮੇਤ ਕਈ ਵੱਡੀਆਂ ਅਰਥਵਿਵਸਥਾਵਾਂ ਲਈ ਇੱਕ ਮੌਕਾ ਬਣਿਆ ਹੈ। ਟਰੰਪ ਨੇ ਇਹ ਵੀ ਸਾਫ਼ ਕਰ ਦਿੱਤਾ ਹੈ ਕਿ ਅਮਰੀਕਾ ਸਿਰਫ਼ ਚੋਟੀ ਦੀਆਂ 15 ਅਰਥਵਿਵਸਥਾਵਾਂ ਨਾਲ ਹੀ ਟੈਰਿਫ ਮਾਮਲੇ 'ਤੇ ਗੱਲ ਕਰੇਗਾ।

ਚੀਨ ਨਾਲ ਵਪਾਰਕ ਤਣਾਅ ਘੱਟ ਨਹੀਂ ਹੋਇਆ

2 ਅਪ੍ਰੈਲ ਨੂੰ ਟਰੰਪ ਨੇ ਟੈਰਿਫ ਲਗਾ ਕੇ ਇਸਨੂੰ "ਮੁਕਤੀ ਦਿਵਸ" ਵਜੋਂ ਐਲਾਨ ਕੀਤਾ। ਚੀਨ ਇਸਦੇ ਸਭ ਤੋਂ ਵੱਡੇ ਪ੍ਰਭਾਵ ਹੇਠ ਆਇਆ। ਹਾਲਾਂਕਿ ਹੁਣ ਟੈਰਿਫ 90 ਦਿਨ ਲਈ ਰੋਕ ਦਿੱਤੇ ਗਏ ਹਨ, ਪਰ ਚੀਨ ਨਾਲ ਸੰਘਰਸ਼ ਜਾਰੀ ਹੈ। ਅਮਰੀਕਾ ਨੇ ਚੀਨ 'ਤੇ ਕੁੱਲ 245% ਤੱਕ ਦੇ ਟੈਰਿਫ ਲਗਾਏ ਹਨ, ਜਦਕਿ ਚੀਨ ਨੇ ਅਮਰੀਕੀ ਸਾਮਾਨ 'ਤੇ 125% ਤੱਕ ਟੈਕਸ ਲਗਾਇਆ ਹੈ।

ਇਸ ਦੌਰਾਨ, ਦੋਵਾਂ ਦੇਸ਼ਾਂ ਨੇ ਗੱਲਬਾਤ ਦੀ ਇੱਛਾ ਜਤਾਈ ਹੈ। ਟਰੰਪ ਨੇ ਦੱਸਿਆ ਕਿ ਚੀਨ ਵਲੋਂ ਸੰਪਰਕ ਕੀਤਾ ਗਿਆ ਹੈ ਅਤੇ ਗੱਲਬਾਤ ਸ਼ੁਰੂ ਹੋ ਚੁੱਕੀ ਹੈ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਵਪਾਰਕ ਤਣਾਅ ਜਲਦੀ ਘਟੇਗਾ।

ਸਿਰਫ਼ ਚੋਟੀ ਦੀਆਂ 15 ਦੇਸ਼ਾਂ ਨਾਲ ਗੱਲਬਾਤ

ਟਰੰਪ ਨੇ ਸਾਫ਼ ਕਰ ਦਿੱਤਾ ਕਿ ਅਮਰੀਕਾ ਹਰ ਕਿਸੇ ਦੀ ਨਹੀਂ ਸੁਣੇਗਾ। ਸਿਰਫ਼ ਉਹਨਾਂ 15 ਦੇਸ਼ਾਂ ਨਾਲ ਹੀ ਗੱਲਬਾਤ ਕਰੇਗਾ ਜੋ ਵੱਡੀਆਂ ਅਰਥਵਿਵਸਥਾਵਾਂ ਹਨ। ਇਨ੍ਹਾਂ ਵਿੱਚ ਸ਼ਾਮਲ ਹਨ:

ਅਮਰੀਕਾ, ਚੀਨ, ਜਾਪਾਨ, ਜਰਮਨੀ, ਭਾਰਤ, ਯੂ.ਕੇ., ਫਰਾਂਸ, ਇਟਲੀ, ਬ੍ਰਾਜ਼ੀਲ, ਕੈਨੇਡਾ, ਰੂਸ, ਦੱਖਣੀ ਕੋਰੀਆ, ਆਸਟ੍ਰੇਲੀਆ, ਸਪੇਨ ਅਤੇ ਮੈਕਸੀਕੋ।

ਅਮਰੀਕੀ ਖਜ਼ਾਨਾ ਸਕੱਤਰ ਸਕਾਟ ਬੇਸੈਂਟ ਨੇ ਦੱਸਿਆ ਕਿ ਇਹ ਚੋਣ ਕੁੱਲ ਘਰੇਲੂ ਉਤਪਾਦ (GDP) ਦੇ ਆਧਾਰ 'ਤੇ ਕੀਤੀ ਗਈ ਹੈ। ਇਹ ਉਹ ਦੇਸ਼ ਹਨ ਜੋ ਵਿਸ਼ਵ ਵਪਾਰ ਅਤੇ ਨਿਵੇਸ਼ 'ਚ ਅਹੰਮ ਭੂਮਿਕਾ ਨਿਭਾਉਂਦੇ ਹਨ।

ਭਾਰਤ ਨਾਲ ਰਵੱਈਆ ਤੇਜ਼ੀ ਨਾਲ ਸਕਾਰਾਤਮਕ

ਭਾਰਤ ਨਾਲ ਟੈਰਿਫ ਮਾਮਲੇ 'ਤੇ ਗੱਲਬਾਤ “ਤੇਜ਼ੀ ਨਾਲ ਅੱਗੇ ਵਧ ਰਹੀ ਹੈ”। ਟਰੰਪ ਨੇ ਜਾਪਾਨ, ਦੱਖਣੀ ਕੋਰੀਆ ਅਤੇ ਯੂਰਪੀ ਸੰਘ ਨਾਲ ਵੀ ਗੱਲਬਾਤ ਦੀ ਪੁਸ਼ਟੀ ਕੀਤੀ। ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਵੀ ਟਰੰਪ ਨਾਲ ਮੁਲਾਕਾਤ ਕੀਤੀ, ਜਿਸ ਦੌਰਾਨ ਇਹ ਰਣਨੀਤੀ ਮੁੜ ਚਰਚਾ ਵਿੱਚ ਆਈ।

ਬੇਸੈਂਟ ਨੇ ਕਿਹਾ, "ਅਸੀਂ ਇੱਕੋ ਸਮੇਂ ਸਾਰਿਆਂ ਦੀ ਗੱਲ ਨਹੀਂ ਸੁਣ ਸਕਦੇ। ਅਸੀਂ ਪਹਿਲਾਂ ਚੋਟੀ ਦੀਆਂ 15 ਅਰਥਵਿਵਸਥਾਵਾਂ ਨਾਲ ਕੰਮ ਕਰ ਰਹੇ ਹਾਂ।"

ਭਾਰਤ ਲਈ ਸੁਨਹਿਰੀ ਮੌਕਾ

IMF ਵਰਗੀਆਂ ਸੰਸਥਾਵਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਟੈਰਿਫ ਨਾਲ ਮਹਿੰਗਾਈ ਵਧੇਗੀ ਤੇ ਆਰਥਿਕਤਾ ਨੁਕਸਾਨ ਵਿੱਚ ਆ ਸਕਦੀ ਹੈ, ਪਰ ਇਹ ਭਾਰਤ ਵਰਗੇ ਵਿਕਾਸਸ਼ੀਲ ਦੇਸ਼ਾਂ ਲਈ ਨਵੀਆਂ ਮੌਕਿਆਂ ਦੇ ਦਰਵਾਜ਼ੇ ਖੋਲ੍ਹ ਸਕਦਾ ਹੈ।

ਟਰੰਪ ਦੀ ਨਵੀਂ ਨੀਤੀ, ਜੇਕਰ ਭਾਰਤ ਸਮਝਦਾਰੀ ਨਾਲ ਡੀਲ ਕਰੇ, ਤਾਂ ਉਨ੍ਹਾਂ ਲਈ ਵਪਾਰ, ਨਿਰਯਾਤ ਅਤੇ ਨਿਵੇਸ਼ ਦੇ ਨਵੇਂ ਰਾਹ ਖੋਲ੍ਹ ਸਕਦੀ ਹੈ।