ਟਰੰਪ ਦੀ ਦੁਨੀਆ ਨੂੰ ਨਵੀਂ ਧ-ਮਕੀ, ਪੜ੍ਹੋ ਹੁਣ ਕੀ ਕਿਹਾ ?

ਡਿਜੀਟਲ ਟੈਕਸ ਦੇ ਜਵਾਬ ਵਿੱਚ ਹੋਰ ਟੈਰਿਫ ਲਗਾਉਣ ਦਾ ਐਲਾਨ

ਨਵੀਂ ਦਿੱਲੀ: ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਦੁਨੀਆ ਭਰ ਦੇ ਦੇਸ਼ਾਂ ਨੂੰ ਇੱਕ ਹੋਰ ਚੇਤਾਵਨੀ ਜਾਰੀ ਕੀਤੀ ਹੈ। ਉਨ੍ਹਾਂ ਨੇ ਕਿਹਾ ਹੈ ਕਿ ਜੇਕਰ ਕੋਈ ਦੇਸ਼ ਅਮਰੀਕੀ ਕੰਪਨੀਆਂ 'ਤੇ ਡਿਜੀਟਲ ਸੇਵਾ ਟੈਕਸ ਲਗਾ ਕੇ ਟੈਰਿਫ ਦਾ ਜਵਾਬ ਦਿੰਦਾ ਹੈ, ਤਾਂ ਅਮਰੀਕਾ ਉਸ ਦੇ ਨਿਰਯਾਤ 'ਤੇ ਹੋਰ ਜ਼ਿਆਦਾ ਟੈਰਿਫ ਲਗਾਏਗਾ। ਇਹ ਧਮਕੀ ਉਨ੍ਹਾਂ ਨੇ ਆਪਣੇ 'ਟਰੂਥ ਸੋਸ਼ਲ' ਅਕਾਊਂਟ 'ਤੇ ਪੋਸਟ ਕੀਤੀ ਹੈ।

ਡਿਜੀਟਲ ਸੇਵਾ ਟੈਕਸ ਕੀ ਹੈ?

ਡਿਜੀਟਲ ਸੇਵਾ ਟੈਕਸ (DST) ਇੱਕ ਅਜਿਹਾ ਟੈਕਸ ਹੈ ਜੋ ਮੁੱਖ ਤੌਰ 'ਤੇ ਵੱਡੀਆਂ ਵਿਦੇਸ਼ੀ ਡਿਜੀਟਲ ਕੰਪਨੀਆਂ ਦੀ ਆਮਦਨ 'ਤੇ ਲਗਾਇਆ ਜਾਂਦਾ ਹੈ। ਇਹ ਟੈਕਸ ਉਨ੍ਹਾਂ ਕੰਪਨੀਆਂ ਨੂੰ ਪ੍ਰਭਾਵਿਤ ਕਰਦਾ ਹੈ ਜੋ ਕਿਸੇ ਦੇਸ਼ ਵਿੱਚ ਕੰਮ ਕਰਦੀਆਂ ਹਨ ਪਰ ਉੱਥੇ ਉਨ੍ਹਾਂ ਦਾ ਕੋਈ ਭੌਤਿਕ ਦਫਤਰ ਜਾਂ ਮੌਜੂਦਗੀ ਨਹੀਂ ਹੁੰਦੀ। ਇਸ ਤਰ੍ਹਾਂ ਇਹ ਟੈਕਸ ਉਨ੍ਹਾਂ ਦੀਆਂ ਸਥਾਨਕ ਕਮਾਈਆਂ 'ਤੇ ਲਗਾਇਆ ਜਾਂਦਾ ਹੈ।

ਭਾਰਤ ਅਤੇ ਡਿਜੀਟਲ ਟੈਕਸ ਦਾ ਮਾਮਲਾ

ਭਾਰਤ ਨੇ ਹਾਲਾਂਕਿ ਇਸ ਮਾਮਲੇ 'ਤੇ ਅਜੇ ਤੱਕ ਕੋਈ ਅਧਿਕਾਰਤ ਬਿਆਨ ਨਹੀਂ ਦਿੱਤਾ ਹੈ, ਪਰ ਇਹ ਕਿਆਸ ਲਗਾਏ ਜਾ ਰਹੇ ਹਨ ਕਿ 50% ਟੈਰਿਫ ਦੇ ਜਵਾਬ ਵਿੱਚ ਭਾਰਤ ਗੂਗਲ, ਮੈਟਾ ਅਤੇ ਐਮਾਜ਼ਾਨ ਵਰਗੀਆਂ ਕੰਪਨੀਆਂ 'ਤੇ ਡਿਜੀਟਲ ਸੇਵਾ ਟੈਕਸ ਲਗਾ ਸਕਦਾ ਹੈ। ਇਹ ਧਿਆਨ ਦੇਣ ਯੋਗ ਹੈ ਕਿ ਭਾਰਤ ਨੇ ਅਮਰੀਕਾ ਨਾਲ ਵਪਾਰ ਸਮਝੌਤਾ ਕਰਨ ਲਈ ਪਹਿਲਾਂ ਹੀ 2025-26 ਦੇ ਬਜਟ ਵਿੱਚ ਡਿਜੀਟਲ ਟੈਕਸ ਨੂੰ ਖਤਮ ਕਰ ਦਿੱਤਾ ਸੀ। ਹਾਲਾਂਕਿ, ਟਰੰਪ ਦਾ ਤਾਜ਼ਾ ਰੁਖ਼ ਇਹ ਦਰਸਾਉਂਦਾ ਹੈ ਕਿ ਅਮਰੀਕਾ ਇਸ ਮਾਮਲੇ 'ਤੇ ਕੋਈ ਨਰਮੀ ਦਿਖਾਉਣ ਲਈ ਤਿਆਰ ਨਹੀਂ ਹੈ।