ਟਰੰਪ ਨੇ 14 ਦੇਸ਼ਾਂ 'ਤੇ ਲਗਾਏ ਵੱਡੇ ਟੈਰਿਫ, ਕੁਝ 'ਤੇ 40% ਤੱਕ ਦੀ ਡਿਊਟੀ

ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਯਾਤ 'ਤੇ ਨਵੇਂ ਟੈਰਿਫ ਲਗਾ ਕੇ ਦੁਨੀਆ ਭਰ ਵਿੱਚ ਵਪਾਰਕ ਹਲਚਲ ਪੈਦਾ ਕਰ ਦਿੱਤੀ ਹੈ। ਸੋਮਵਾਰ, 7 ਜੁਲਾਈ 2025 ਨੂੰ ਟਰੰਪ ਨੇ 14 ਦੇਸ਼ਾਂ ਨੂੰ ਪੱਤਰ ਭੇਜ ਕੇ ਇਹ ਜਾਣਕਾਰੀ ਦਿੱਤੀ ਕਿ 1 ਅਗਸਤ ਤੋਂ ਉਨ੍ਹਾਂ ਦੇਸ਼ਾਂ ਤੋਂ ਆਉਣ ਵਾਲੇ ਸਮਾਨ 'ਤੇ 25% ਤੋਂ 40% ਤੱਕ ਟੈਰਿਫ ਲਾਗੂ ਹੋਣਗੇ। ਟਰੰਪ ਨੇ ਇਹ ਵੀ ਚੇਤਾਵਨੀ ਦਿੱਤੀ ਕਿ ਜੇਕਰ ਕੋਈ ਦੇਸ਼ ਜਵਾਬੀ ਕਾਰਵਾਈ ਵਜੋਂ ਆਪਣੇ ਟੈਰਿਫ ਵਧਾਉਂਦਾ ਹੈ, ਤਾਂ ਅਮਰੀਕਾ ਵੀ ਉਨ੍ਹਾਂ ਉੱਤੇ ਹੋਰ ਵਧੇਰੇ ਟੈਰਿਫ ਲਗਾ ਦੇਵੇਗਾ।

ਟਰੰਪ ਦੀ ਚੇਤਾਵਨੀ

ਟਰੰਪ ਨੇ ਆਪਣੇ ਪੱਤਰਾਂ ਵਿੱਚ ਸਾਫ ਲਿਖਿਆ:

"ਜੇਕਰ ਤੁਸੀਂ ਕਿਸੇ ਵੀ ਕਾਰਨ ਕਰਕੇ ਆਪਣਾ ਟੈਰਿਫ ਵਧਾਉਣ ਦਾ ਫੈਸਲਾ ਕਰਦੇ ਹੋ, ਤਾਂ ਤੁਸੀਂ ਜੋ ਵੀ ਅੰਕੜਾ ਚੁਣਦੇ ਹੋ, ਉਹ ਤੁਹਾਡੇ 'ਤੇ ਲਾਗੂ ਟੈਰਿਫ ਵਿੱਚ ਜੋੜਿਆ ਜਾਵੇਗਾ।"

ਕਿਸ ਦੇਸ਼ 'ਤੇ ਕਿੰਨਾ ਟੈਰਿਫ ਲਗਾਇਆ ਗਿਆ?

ਜਪਾਨ 25%

ਦੱਖਣੀ ਕੋਰੀਆ 25%

ਮਲੇਸ਼ੀਆ 25%

ਕਜ਼ਾਕਿਸਤਾਨ 25%

ਟਿਊਨੀਸ਼ੀਆ 25%

ਲਾਓਸ 40%

ਮਿਆਂਮਾਰ 40%

ਦੱਖਣੀ ਅਫਰੀਕਾ 30%

ਬੋਸਨੀਆ ਅਤੇ ਹਰਜ਼ੇਗੋਵਿਨਾ 30%

ਇੰਡੋਨੇਸ਼ੀਆ 32%

ਬੰਗਲਾਦੇਸ਼ 35%

ਸਰਬੀਆ 35%

ਕੰਬੋਡੀਆ 36%

ਥਾਈਲੈਂਡ 36%

ਭਾਰਤ ਇਸ ਸ਼ੁਰੂਆਤੀ ਸੂਚੀ ਵਿੱਚ ਸ਼ਾਮਲ ਨਹੀਂ ਹੈ, ਪਰ ਟਰੰਪ ਨੇ BRICS ਦੇਸ਼ਾਂ ਨੂੰ ਵੀ 10% ਵਾਧੂ ਟੈਰਿਫ ਦੀ ਧਮਕੀ ਦਿੱਤੀ ਹੈ ਜੇਕਰ ਉਹ ਅਮਰੀਕਾ ਵਿਰੋਧੀ ਨੀਤੀਆਂ 'ਤੇ ਚੱਲਦੇ ਹਨ।

ਟਰੰਪ ਦੀ ਵਜ੍ਹਾ

ਟਰੰਪ ਨੇ ਦਲੀਲ ਦਿੱਤੀ ਕਿ ਇਹ ਟੈਰਿਫ ਅਮਰੀਕਾ ਦੇ ਵਪਾਰ ਅਸੰਤੁਲਨ ਨੂੰ ਦੂਰ ਕਰਨ ਅਤੇ ਅਮਰੀਕੀ ਉਦਯੋਗਾਂ ਦੀ ਰਾਖੀ ਲਈ ਲਗਾਏ ਜਾ ਰਹੇ ਹਨ। ਜਪਾਨ ਅਤੇ ਦੱਖਣੀ ਕੋਰੀਆ ਵਰਗੇ ਮੁੱਖ ਸਹਿਯੋਗੀਆਂ ਨੂੰ ਵੀ ਛੱਡਿਆ ਨਹੀਂ ਗਿਆ। ਦੋਵਾਂ ਦੇਸ਼ਾਂ ਦੇ ਆਯਾਤ 'ਤੇ 25% ਟੈਰਿਫ ਲਗਾਇਆ ਗਿਆ ਹੈ ਅਤੇ ਉਨ੍ਹਾਂ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਜੇਕਰ ਉਨ੍ਹਾਂ ਨੇ ਜਵਾਬੀ ਟੈਕਸ ਲਗਾਇਆ ਤਾਂ ਅਮਰੀਕਾ ਵੱਲੋਂ ਹੋਰ ਵਾਧੂ ਟੈਰਿਫ ਲਗ ਸਕਦੇ ਹਨ।

ਨਵੇਂ ਟੈਰਿਫ ਕਦੋਂ ਲਾਗੂ ਹੋਣਗੇ?

ਇਹ ਨਵੀਆਂ ਦਰਾਂ 1 ਅਗਸਤ 2025 ਤੋਂ ਲਾਗੂ ਹੋਣਗੀਆਂ। ਟਰੰਪ ਨੇ ਕਿਹਾ ਕਿ ਜੇਕਰ ਕਿਸੇ ਦੇਸ਼ ਨੇ ਅਮਰੀਕਾ ਨਾਲ ਵਪਾਰਕ ਸਮਝੌਤਾ ਕਰ ਲਿਆ ਤਾਂ ਉਹ ਟੈਰਿਫ ਹਟਾਏ ਜਾਂ ਘਟਾਏ ਵੀ ਜਾ ਸਕਦੇ ਹਨ।

ਇਹ ਟੈਰਿਫ ਨੀਤੀਆਂ ਦੁਨੀਆ ਭਰ ਵਿੱਚ ਵਪਾਰਕ ਸੰਕਟ ਅਤੇ ਚਿੰਤਾ ਦਾ ਕਾਰਨ ਬਣ ਰਹੀਆਂ ਹਨ। ਅਗਲੇ ਹਫ਼ਤਿਆਂ ਵਿੱਚ ਹੋਰ ਦੇਸ਼ਾਂ 'ਤੇ ਵੀ ਟੈਰਿਫ ਲਗਣ ਦੀ ਸੰਭਾਵਨਾ ਹੈ।