ਇਸ ਰਾਜ ਵਿੱਚ ਬਾਲ ਵਿਆਹ ਦੇ ਮਾਮਲਿਆਂ ਵਿੱਚ ਤੇਜ਼ੀ ਨਾਲ ਗਿਰਾਵਟ ਆਈ

ਇੱਕ ਤਾਜ਼ਾ ਸਰਵੇਖਣ ਮੁਤਾਬਕ, ਭਾਰਤ ਵਿੱਚ ਬਾਲ ਵਿਆਹਾਂ ਦੀ ਗਿਣਤੀ ਵਿੱਚ ਕਮੀ ਆਈ ਹੈ, ਜਿਸ ਵਿੱਚ ਅਸਾਮ ਨੇ ਸਭ ਤੋਂ ਅੱਗੇ ਰਹਿ ਕੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। 'ਜਸਟ ਰਾਈਟਸ ਫਾਰ ਚਿਲਡਰਨ' ਨਾਲ ਸਬੰਧਤ 'ਸੈਂਟਰ ਫਾਰ ਲੀਗਲ ਐਕਸ਼ਨ ਐਂਡ ਬਿਹੇਵੀਅਰ ਚੇਂਜ ਫਾਰ ਚਿਲਡਰਨ (ਸੀ-ਲੈਬ)' ਦੁਆਰਾ ਤਿਆਰ ਕੀਤੀ ਗਈ ਇੱਕ ਰਿਪੋਰਟ 'ਚ ਇਹ ਖੁਲਾਸਾ ਹੋਇਆ ਹੈ। ਇਹ ਰਿਪੋਰਟ ਅਪ੍ਰੈਲ 2022 ਤੋਂ ਮਾਰਚ 2025 ਦਰਮਿਆਨ ਤਿਆਰ ਕੀਤੀ ਗਈ ਹੈ।

ਅਸਾਮ ਦੀ ਸਫਲਤਾ ਦਾ ਰਾਜ਼

ਰਿਪੋਰਟ ਦੇ ਅਨੁਸਾਰ, ਅਸਾਮ ਵਿੱਚ ਪਿਛਲੇ ਤਿੰਨ ਸਾਲਾਂ ਵਿੱਚ ਕੁੜੀਆਂ ਦੇ ਬਾਲ ਵਿਆਹਾਂ ਵਿੱਚ 84 ਪ੍ਰਤੀਸ਼ਤ ਅਤੇ ਮੁੰਡਿਆਂ ਦੇ ਬਾਲ ਵਿਆਹਾਂ ਵਿੱਚ 91 ਪ੍ਰਤੀਸ਼ਤ ਦੀ ਗਿਰਾਵਟ ਦਰਜ ਕੀਤੀ ਗਈ ਹੈ। ਇਹ ਕਮੀ ਰਾਸ਼ਟਰੀ ਔਸਤ ਤੋਂ ਬਹੁਤ ਜ਼ਿਆਦਾ ਹੈ, ਜਿੱਥੇ ਕੁੜੀਆਂ ਵਿੱਚ 69% ਅਤੇ ਮੁੰਡਿਆਂ ਵਿੱਚ 72% ਦੀ ਗਿਰਾਵਟ ਆਈ ਹੈ।

ਇਸ ਸਫ਼ਲਤਾ ਦਾ ਮੁੱਖ ਕਾਰਨ ਰਾਜ ਸਰਕਾਰ ਦੀਆਂ ਹੇਠ ਲਿਖੀਆਂ ਨੀਤੀਆਂ ਹਨ:

ਜ਼ੀਰੋ-ਟੌਲਰੈਂਸ ਨੀਤੀ: ਅਸਾਮ ਸਰਕਾਰ ਨੇ ਬਾਲ ਵਿਆਹ ਵਿਰੁੱਧ ਸਖ਼ਤ ਰੁਖ਼ ਅਪਣਾਇਆ ਹੈ।

ਕਾਨੂੰਨੀ ਕਾਰਵਾਈ: ਸਰਵੇਖਣ ਅਨੁਸਾਰ, ਐਫਆਈਆਰ ਅਤੇ ਗ੍ਰਿਫ਼ਤਾਰੀਆਂ ਨੂੰ ਬਾਲ ਵਿਆਹ ਨੂੰ ਰੋਕਣ ਦਾ ਇੱਕ ਬਹੁਤ ਪ੍ਰਭਾਵਸ਼ਾਲੀ ਉਪਾਅ ਮੰਨਿਆ ਗਿਆ ਹੈ।

ਜਾਗਰੂਕਤਾ ਮੁਹਿੰਮਾਂ: ਸਰਵੇਖਣ ਵਿੱਚ ਸ਼ਾਮਲ ਜ਼ਿਆਦਾਤਰ ਲੋਕਾਂ ਨੇ ਜਾਗਰੂਕਤਾ ਮੁਹਿੰਮਾਂ ਨੂੰ ਬਾਲ ਵਿਆਹ ਘਟਾਉਣ ਦਾ ਸਭ ਤੋਂ ਮਹੱਤਵਪੂਰਨ ਤਰੀਕਾ ਦੱਸਿਆ।

ਹੋਰ ਰਾਜਾਂ ਦਾ ਪ੍ਰਦਰਸ਼ਨ

ਜਿਨ੍ਹਾਂ ਪੰਜ ਰਾਜਾਂ ਵਿੱਚ ਸਰਵੇਖਣ ਕੀਤਾ ਗਿਆ, ਉਨ੍ਹਾਂ ਵਿੱਚੋਂ ਅਸਾਮ ਤੋਂ ਬਾਅਦ ਕੁੜੀਆਂ ਦੇ ਬਾਲ ਵਿਆਹ ਨੂੰ ਘਟਾਉਣ ਵਿੱਚ ਮਹਾਰਾਸ਼ਟਰ ਅਤੇ ਬਿਹਾਰ (70%), ਰਾਜਸਥਾਨ (66%), ਅਤੇ ਕਰਨਾਟਕ (55%) ਦਾ ਨੰਬਰ ਆਉਂਦਾ ਹੈ। ਇਸ ਸਫਲਤਾ ਲਈ, 'ਜਸਟ ਰਾਈਟਸ ਫਾਰ ਚਿਲਡਰਨ' ਨੇ ਅਸਾਮ ਦੇ ਮੁੱਖ ਮੰਤਰੀ ਹਿਮੰਤ ਬਿਸਵਾ ਸਰਮਾ ਨੂੰ 'ਚੈਂਪੀਅਨਜ਼ ਆਫ਼ ਚੇਂਜ ਅਵਾਰਡ' ਨਾਲ ਸਨਮਾਨਿਤ ਕਰਨ ਦਾ ਐਲਾਨ ਕੀਤਾ ਹੈ।