ਤਰੀਫਾਂ ਮਗਰੋਂ ਬੌਬੀ ਦਿਓਲ ਦਾ ਵਿਰੋਧ ਸ਼ੁਰੂ, ਜਬਰ ਜਨਾਹ ਵਾਲੇ ਸੀਨ ’ਤੇ ਉੱਠੇ ਸਵਾਲ!

ਮੁੰਬਈ, 11 ਦਸੰਬਰ: ਸ਼ੇਖਰ ਰਾਏ- ਹੁਣ ਤੱਕ ਫਿਲਮ ‘ਐਨੀਮਲ’ ਵਿਚ ਬੌਬੀ ਦਿਓਲ ਵੱਲੋਂ ਨਿਭਾਏ ਗਏ ਕਿਰਦਾਰ ਦੀਆਂ ਲੋਕ ਤਰੀਫ਼ਾਂ ਕਰ ਰਹੇ ਸੀ। ਲੰਬੇ ਸਮੇਂ ਮਗਰੋਂ ਬੌਬੀ ਦਿਓਲ ਨੂੰ ਵੱਡੇ ਪਰਦੇ ਉੱਪਰ ਦੇਖ ਕੇ ਲੋਕਾਂ ਵਿਚ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲ ਰਿਹਾ ਸੀ ਪਰ ਹੁਣ ਫਿਲਮ ਦੇ ਰਿਲੀਜ਼ ਤੋਂ 10-11 ਦਿਨਾਂ ਮਗਰੋਂ ਅਚਾਨਕ ਲੋਕਾਂ ਨੂੰ ਬੌਬੀ ਦਿਓਲ ਦਾ ਕਿਰਦਾਰ ਰੜਕਣਾ ਸ਼ੁਰੂ ਹੋ ਗਿਆ ਹੈ। ਜੀ ਹਾਂ ਹੁਣ ਬੌਬੀ ਦਿਓਲ ਵੱਲੋਂ ਨਿਭਾਏ ਗਏ ਅਬਰਾਰ ਹੱਕ ਦੇ ਕਿਰਦਾਰ ਦੇ ਇਕ ਦ੍ਰਿਸ਼ ਨੂੰ ਲੈ ਕੇ ਸਵਾਲ ਖੜੇ ਹੋ ਰਹੇ ਹਨ। ਜਿਸਦੇ ਵਿਚ ਬੌਬੀ ਦਿਓਲ ਆਪਣੇ ਤੋਂ 29 ਸਾਲ ਛੋਟੀ ਅਦਾਕਾਰਾ ਨਾਲ ਵਿਆਹ ਕਰਵਾਉਣ ਮਗਰੋਂ ਲੋਕਾਂ ਦੀ ਭੀੜ ਵਿਚ ਉਸ ਨਾਲ ਜਬਰ ਜਨਾਹ ਕਰਦਾ ਦਿਖਾਈ ਦਿੰਦਾ ਹੈ। ਇਨ੍ਹਾਂ ਸਵਾਲਾਂ ਮਗਰੋਂ ਹੁਣ ਬੌਬੀ ਦਿਓਲ ਅਤੇ ਅਦਾਕਾਰਾ ਮਾਨਸੀ ਤਸ਼ਕ ਨੇ ਇਸ ਦ੍ਰਿਸ਼ ਉੱਪਰ ਆਪਣੀ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਕੀ ਕਿਹਾ ਦੋਵਾਂ ਨੇ ਆਓ ਤੁਹਾਨੂੰ ਵੀ ਦੱਸਦੇ ਹਾਂ।
ਫਿਲਮ ‘ਐਨੀਮਲ’ ਨੂੰ ਰਿਲੀਜ਼ ਹੋਏ 10 ਦਿਨਾਂ ਤੋਂ ਉੱਪਰ ਸਮਾਂ ਹੋ ਗਿਆ ਹੈ ਪਰ ਇਸ ਫਿਲਮ ਦਾ ਕ੍ਰੇਜ਼ ਅਜੇ ਵੀ ਲੋਕਾਂ ਵਿਚ ਬਰਕਰਾਰ ਹੈ। ਲੋਕਾਂ ਵਿਚ ਫਿਲਮ ਦੇ ਕਿਰਦਾਰਾਂ ਅਤੇ ਇਸ ਦੇ ਸੀਨਜ਼ ਨੂੰ ਲੈ ਕੇ ਚਰਚਾ ਜ਼ੋਰਾਂ ’ਤੇ ਹੈ। ਕੋਈ ਇਸ ਫਿਲਮ ਵਿਚਲੇ ਕਿਰਦਾਰਾਂ ਨੂੰ ਚੰਗਾ ਦੱਸ ਰਿਹਾ ਹੈ ਕੋਈ ਮਾੜਾ। ਉਸੇ ਤਰ੍ਹਾਂ ਕੋਈ ਇਸਦੇ ਸੀਨਜ਼ ਦੀ ਤਰੀਫ਼ ਕਰਦਾ ਹੈ ਅਤੇ ਕੋਈ ਇਨ੍ਹਾਂ ਨੂੰ ਮਾੜਾ ਦੱਸਦਾ ਹੈ। ਇਸ ਫਿਲਮ ਦੇ ਨਾਮ ਐਕਟਰ ਬੌਬੀ ਦਿਓਲ ਨੇ ਲੰਬੇ ਸਮੇਂ ਮਗਰੋਂ ਵੱਡੇ ਪਰਦੇ ਉੱਪਰ ਵਾਪਸੀ ਕੀਤੀ ਹੈ। ਲੋਕਾਂ ਨੇ ਉਨ੍ਹਾਂ ਵੱਲੋਂ ਨਿਭਾਏ ਅਬਰਾਰ ਹੱਕ ਦੇ ਕਿਰਦਾਰ ਨੂੰ ਕਾਫੀ ਪਸੰਦ ਵੀ ਕੀਤਾ ਪਰ ਹੁਣ ਅਚਾਨਕ ਬੌਬੀ ਦਿਓਲ ਉੱਪਰ ਫਿਲਮਾਏ ਗਏ ਇਕ ਸੀਨ ਨੂੰ ਲੈ ਕੇ ਸਵਾਲ ਖੜੇ ਹੋਣੇ ਸ਼ੁਰੂ ਹੋ ਗਏ ਹਨ। ਇਸ ਸੀਨ ਵਿਚ ਬੌਬੀ ਦਿਓਲ ਅਤੇ ਉਨ੍ਹਾਂ ਦੀ ਪਤਨੀ ਦਾ ਕਿਰਦਾਰ ਨਿਭਾਅ ਰਹੀ ਅਭਿਨੇਤਰੀ ਮਾਨਸੀ ਤਸ਼ਕ ਵਿਚਾਲੇ ਵਿਆਹੁਤਾ ਬਲਾਤਕਾਰ ਦਾ ਸੀਨ ਦਿਖਾਇਆ ਗਿਆ ਹੈ। ਕਿਉਂਕਿ ਮਾਨਸੀ ਬੌਬੀ ਤੋਂ 29 ਸਾਲ ਛੋਟੀ ਹੈ, ਲੋਕ ਕਹਿੰਦੇ ਹਨ ਕਿ ਬੌਬੀ ਨੂੰ ਆਪਣੇ ਤੋਂ ਇੰਨੀ ਛੋਟੀ ਕੁੜੀ ਨਾਲ ਅਜਿਹਾ ਸੀਨ ਕਰਨਾ ਅਜੀਬ ਨਹੀਂ ਲੱਗਾ। ਇਸ ’ਤੇ ਬੌਬੀ ਨੇ ਜਵਾਬ ਦਿੱਤਾ ਕਿ ਇਸ ਸੀਨ ਦੀ ਸ਼ੂਟਿੰਗ ਦੌਰਾਨ ਉਨ੍ਹਾਂ ਨੂੰ ਕਿਸੇ ਤਰ੍ਹਾਂ ਦਾ ਡਰ ਨਹੀਂ ਲੱਗਾ। ਕੋਈ ਝਿਜਕ ਨਹੀਂ ਸੀ।
ਬੌਬੀ ਦਿਓਲ ਨੇ ਕਿਹਾ ਕਿ ਇਹ ਕਿਰਦਾਰ ਇੱਕ ਜ਼ਾਲਮ ਪਤੀ ਦਾ ਸੀ ਜੋ ਆਪਣੀ ਪਤਨੀ ਨਾਲ ਦੁਰਵਿਵਹਾਰ ਕਰਦਾ ਹੈ। ਮੈਂ ਸਿਰਫ ਉਸ ਕਿਰਦਾਰ ਨੂੰ ਸਹੀ ਤਰੀਕੇ ਨਾਲ ਨਿਭਾਇਆ ਹੈ। ਆਪਣੀ ਗੱਲ ਨੂੰ ਹੋਰ ਅੱਗੇ ਲੈਂਦਿਆਂ ਉਸ ਨੇ ਕਿਹਾ ਕਿ ਮੈਨੂੰ ਇਹ ਸੀਨ ਕਰਨ ਵਿੱਚ ਕੋਈ ਦਿੱਕਤ ਨਹੀਂ ਆਈ।
ਫਿਲਮ ’ਚ ਬੌਬੀ ਦਿਓਲ (ਅਬਰਾਰ ਹੱਕ) ਅਤੇ ਮਾਨਸੀ ਦੇ ਵਿਆਹ ਦਾ ਸੀਨ ਚੱਲ ਰਿਹਾ ਹੈ। ਉਸੇ ਸਮੇਂ ਅਬਰਾਰ ਨੂੰ ਆਪਣੇ ਭਰਾ ਦੀ ਮੌਤ ਬਾਰੇ ਪਤਾ ਲੱਗਾ। ਉਹ ਗੁੱਸੇ ਨਾਲ ਪਾਗਲ ਹੋ ਜਾਂਦਾ ਹੈ। ਇਹ ਸੁਣ ਕੇ ਸਭ ਤੋਂ ਪਹਿਲਾਂ ਉਹ ਆਪਣੇ ਮੈਨੇਜਰ ਨੂੰ ਬੇਰਹਿਮੀ ਨਾਲ ਮਾਰ ਦਿੰਦਾ ਹੈ। ਇਸ ਤੋਂ ਬਾਅਦ ਉਹ ਲਾੜੀ ਮਾਨਸੀ ’ਤੇ ਹਮਲਾ ਕਰ ਦਿੰਦਾ ਹੈ। ਇੰਨਾ ਹੀ ਨਹੀਂ, ਇਸ ਤੋਂ ਬਾਅਦ ਉਹ ਆਪਣੀਆਂ ਦੋਹਾਂ ਪਤਨੀਆਂ ਨੂੰ ਵੀ ਬੁਲਾ ਲੈਂਦਾ ਹੈ ਅਤੇ ਜਦੋਂ ਉਨ੍ਹਾਂ ਨੇ ਉਸ ਦੀ ਗੱਲ ਨਹੀਂ ਸੁਣੀ ਤਾਂ ਉਹ ਉਨ੍ਹਾਂ ’ਤੇ ਹੱਥ ਚੁੱਕਦਾ ਹੈ।
ਇਸੇ ਦ੍ਰਿਸ਼ ਨੂੰ ਲੈ ਕੇ ਅਦਾਕਾਰਾ ਮਾਨਸੀ ਤਸ਼ਕ ਨੇ ਵੀ ਇਕ ਇੰਟਰਵਿਊ ਦਿੰਦੇ ਹੋਏ ਕਾਫੀ ਕੁਝ ਕਿਹਾ ਹੈ। ਅਦਾਕਾਰਾ ਨੇ ਕਿਹਾ ਕਿ ਸਪੱਸ਼ਟ ਤੌਰ ’ਤੇ ਇਹ ਕਾਫੀ ਹੈਰਾਨ ਕਰਨ ਵਾਲਾ ਹੈ। ਕਿਸੇ ਨੂੰ ਉਮੀਦ ਨਹੀਂ ਸੀ ਕਿ ਅਬਰਾਰ ਦਾ ਵਿਆਹ ਇਸ ਤਰ੍ਹਾਂ ਖਤਮ ਹੋ ਜਾਵੇਗਾ। ਜਦੋਂ ਵਿਆਹ ਦਾ ਸਿਲਸਿਲਾ ਖਤਮ ਹੋਵੇਗਾ ਤਾਂ ਤੁਸੀਂ ਰੋਸ਼ਨੀ ਦੇਖੋਗੇ। ਇੱਕ ਸੰਗੀਤ ਚੱਲ ਰਿਹਾ ਹੈ, ਜਿਸ ਦੀ ਧੁਨ ਹੁਣ ਇੰਸਟਾਗ੍ਰਾਮ ’ਤੇ ਵੀ ਵਾਇਰਲ ਹੋ ਰਹੀ ਹੈ।
ਉਹ ਅੱਗੇ ਕਹਿੰਦੀ ਹੈ ਕਿ ਜੇਕਰ ਤੁਸੀਂ ਸੋਚਦੇ ਹੋ ਕਿ ਰਣਬੀਰ ਕਪੂਰ ਇਸ ਤਰ੍ਹਾਂ ਦੇ ਸਨ, ਤਾਂ ਤੁਸੀਂ ਯਕੀਨੀ ਤੌਰ ’ਤੇ ਵਿਲੇਨ ਤੋਂ ਬੁਰੇ ਤੋਂ ਬਦਤਰ ਹੋਣ ਦੀ ਉਮੀਦ ਕਰ ਸਕਦੇ ਹੋ। ਬੌਬੀ ਸਰ ਦੇ ਕਿਰਦਾਰ ਨੂੰ ਦਿਖਾਉਣ ਦਾ ਇਹ ਇੱਕ ਵਧੀਆ ਤਰੀਕਾ ਸੀ ਕਿ ਅਸੀਂ ਅਸਲ ਵਿੱਚ ਕਿਸ ਐਨੀਮਲ ਬਾਰੇ ਗੱਲ ਕਰ ਰਹੇ ਹਾਂ।
ਮਾਨਸੀ ਨੇ ਇਸ ਗੱਲ ਤੋਂ ਇਨਕਾਰ ਕੀਤਾ ਕਿ ਸੀਨ ਵਿੱਚ ਕੋਈ ਸ਼ੋਸ਼ਣ ਹੋਇਆ ਹੈ, ਪਰ ਉਸਨੇ ਮੰਨਿਆ ਕਿ ਅਬਰਾਰ ਸੀਨ ਵਿੱਚ ਐਨੀਮਲ ਸੀ, ਜਿਸ ਕਾਰਨ ਉਸਨੇ ਆਪਣੀ ਨਵੀਂ ਲਾੜੀ ਨਾਲ ਅਜਿਹਾ ਕੀਤਾ।
ਹਾਲਾਂਕਿ ਦਰਸ਼ਕਾਂ ਨੇ ਇਸ ਸੀਨ ਦੀ ਸਖ਼ਤ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਹਿੰਸਾ ਵਧਣ ਵਾਲੀ ਹੈ।