ਅਮਰੀਕਾ ਵਿਚ ਭਾਰਤੀ ਨੌਜਵਾਨ ਦੀ ਡੁੱਬਣ ਕਾਰਨ ਮੌਤ

ਫਰਿਜ਼ਨੋ : ਅਮਰੀਕਾ ਵਿਚ ਇਕ ਭਾਰਤੀ ਨੌਜਵਾਨ ਦੀ ਨਦੀ ਵਿਚ ਡੁੱਬਣ ਕਾਰਨ ਮੌਤ ਹੋ ਗਈ ਜਿਸ ਦੀ ਸ਼ਨਾਖਤ ਹਰਿਆਣਾ ਦੇ ਜੀਂਦ ਜ਼ਿਲ੍ਹੇ ਨਾਲ ਸਬੰਧਤ ਸੰਦੀਪ ਬੂਰਾ ਵਜੋਂ ਕੀਤੀ ਗਈ ਹੈ। ਕੈਲੇਫੋਰਨੀਆ ਦੀ ਕਿੰਗਜ਼ ਰਿਵਰ ਵਿਚ ਵਾਪਰੇ ਹਾਦਸੇ ਦੌਰਾਨ ਸੰਦੀਪ ਬੂਰਾ ਦੇ ਦੋਸਤ ਉਸ ਨੂੰ ਪਾਣੀ ਵਿਚੋਂ ਕੱਢਣ ਵਿਚ ਸਫ਼ਲ ਰਹੇ ਪਰ ਸਰੀਰ ਅੰਦਰ ਬਹੁਤ ਜ਼ਿਆਦਾ ਪਾਣੀ ਜਾਣ ਕਰ ਕੇ ਉਸ ਨੂੰ ਬਚਾਇਆ ਨਾ ਜਾ ਸਕਿਆ। ਸੰਦੀਪ ਦੇ ਛੋਟੇ ਭਰਾ ਪ੍ਰਦੀਪ ਸਿੰਘ ਨੇ ਦੱਸਿਆ ਕਿ ਪਰਵਾਰ ਨੇ ਤਿੰਨ ਸਾਲ ਪਹਿਲਾਂ 60 ਲੱਖ ਰੁਪਏ ਖਰਚ ਕਰਦਿਆਂ ਸੰਦੀਪ ਨੂੰ ਅਮਰੀਕਾ ਭੇਜਿਆ।

ਹਰਿਆਣਾ ਦੇ ਜੀਂਦ ਜ਼ਿਲ੍ਹੇ ਨਾਲ ਸਬੰਤ ਸੀ ਸੰਦੀਪ ਬੂਰਾ

ਅਮਰੀਕਾ ਪੁੱਜਣ ਤੋਂ ਪਹਿਲਾਂ ਉਹ ਪੰਜ-ਛੇ ਮਹੀਨੇ ਪਨਾਮਾ ਦੇ ਜੰਗਲਾਂ ਵਿਚ ਵੀ ਰਿਹਾ ਅਤੇ ਲੰਮਾ ਸੰਘਰਸ਼ ਕਰਦਿਆਂ ਅਮਰੀਕਾ ਦਾ ਬਾਰਡਰ ਪਾਰ ਕਰਨ ਵਿਚ ਸਫ਼ਲ ਹੋਇਆ। ਅਮਰੀਕਾ ਵਿਚ ਦਾਖਲ ਹੋਣ ਮਗਰੋਂ ਵੀ ਮੁਸ਼ਕਲਾਂ ਖ਼ਤਮ ਨਾ ਹੋਈਆਂ ਅਤੇ ਉਸ ਨੂੰ ਇੰਮੀਗ੍ਰੇਸ਼ਨ ਡਿਟੈਨਸ਼ਨ ਸੈਂਟਰ ਵਿਚ ਰੱਖਿਆ ਗਿਆ। ਆਖਰਕਾਰ ਫਾਈਲ ਪ੍ਰੋਸੈਸਿੰਗ ਸ਼ੁਰੂ ਹੋਈ ਤਾਂ ਸੰਦੀਪ ਕੰਮ ਕਰਨ ਲੱਗਾ ਅਤੇ ਇਸ ਦੇ ਨਾਲ ਟਰੱਕ ਡਰਾਈਵਿੰਗ ਦੀ ਸਿਖਲਾਈ ਵੀ ਲੈਣੀ ਸ਼ੁਰੂ ਕਰ ਦਿਤੀ। ਇਸ ਵੇਲੇ ਉਹ ਫਰਿਜ਼ਨੋ ਸ਼ਹਿਰ ਵਿਚ ਰਹਿ ਰਿਹਾ ਸੀ ਅਤੇ 4 ਅਗਸਤ ਨੂੰ ਆਪਣੇ ਦੋਸਤਾਂ ਨਾਲ ਝੀਲ ਵੱਲ ਚਲਾ ਗਿਆ। ਪ੍ਰਦੀਪ ਨੇ ਅੱਗੇ ਦੱਸਿਆ ਕਿ ਝੀਲ ਵਿਚ ਨਹਾਉਂਦਿਆ ਸੰਦੀਪ ਪਾਣੀ ਦੀਆਂ ਛੱਲਾਂ ਵਿਚ ਘਿਰ ਗਿਆ ਅਤੇ ਬਾਹਰ ਨਾ ਨਿਕਲ ਸਕਿਆ। ਐਮਰਜੰਸੀ ਕਾਮਿਆਂ ਵੱਲੋਂ ਸੰਦੀਪ ਨੂੰ ਨੇੜਲੇ ਹਸਪਤਾਲ ਲਿਜਾਇਆ ਗਿਆ ਪਰ ਡਾਕਟਰਾਂ ਨੇ ਮ੍ਰਿਤਕ ਕਰਾਰ ਦੇ ਦਿਤਾ।

ਫਰਿਜ਼ਨੋ ਕਾਊਂਟੀ ਦੀ ਕਿੰਗਜ਼ ਰਿਵਰ ਵਿਚ ਵਾਪਰਿਆ ਹਾਦਸਾ

ਪਿੰਡ ਘੋਘੜੀਆਂ ਨਾਲ ਸਬੰਧਤ ਦੋ ਹੋਰ ਨੌਜਵਾਨ ਸੰਦੀਪ ਦੇ ਘਰ ਨੇੜੇ ਰਹਿੰਦੇ ਹਨ ਜਿਨ੍ਹਾਂ ਨੇ ਪਰਵਾਰ ਨੂੰ ਦੁਖਦਾਈ ਖਬਰ ਦਿਤੀ। ਸੰਦੀਪ ਆਪਣੇ ਪਿੱਛੇ ਬਜ਼ੁਰਗ ਮਾਪੇ, ਪਤਨੀ ਅਤੇ ਦੋ ਬੱਚੇ ਛੱਡ ਗਿਆ ਹੈ। ਉਸ ਦੇ ਪਿਤਾ ਲੰਮੇ ਸਮੇਂ ਤੋਂ ਬਿਮਾਰ ਹਨ ਅਤੇ ਇਸ ਸਦਮੇ ਨੇ ਬਿਲਕੁਲ ਤੋੜ ਕੇ ਰੱਖ ਦਿਤਾ ਹੈ। ਸੰਦੀਪ ਦੀ ਦੇਹ ਭਾਰਤ ਲਿਆਉਣ ਲਈ ਗੋਫੰਡਮੀ ਪੇਜ ਸਥਾਪਤ ਕੀਤਾ ਗਿਆ ਹੈ ਜਦਕਿ ਗੈਰ ਮੁਨਾਫ਼ੇ ਵਾਲੀ ਜਥੇਬੰਦੀ ਯਾਰੀ ਇੰਟਰਨੈਸ਼ਨਲ ਵੱਲੋਂ ਵੀ ਆਪਣੇ ਪੱਧਰ ’ਤੇ ਯਤਨ ਕੀਤੇ ਜਾ ਰਹੇ ਹਨ। ਇਥੇ ਦਸਣਾ ਬਣਦਾ ਹੈ ਕਿ 2 ਦਿਨ ਪਹਿਲਾਂ ਹੀ ਉਨਟਾਰੀਓ ਦੀ ਇਕ ਝੀਲ ਵਿਚ ਦੋ ਭਾਰਤੀ ਨੌਜਵਾਨ ਡੁੱਬ ਗਏ ਸਨ।