"Bumrah ਵਰਗਾ ਕੋਈ ਨਹੀਂ": ਮਾਈਕਲ ਕਲਾਰਕ ਨੇ ਜੱਸੀ ਨੂੰ ਦੱਸਿਆ ਦੁਨੀਆ ਦਾ ਸਭ ਤੋਂ ਘਾਤਕ ਗੇਂਦਬਾਜ਼

ਨਵੀਂ ਦਿੱਲੀ: 14 ਮਾਰਚ, 2026

ਭਾਰਤੀ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਦੀ ਘਾਤਕ ਗੇਂਦਬਾਜ਼ੀ ਦਾ ਲੋਹਾ ਹੁਣ ਪੂਰੀ ਦੁਨੀਆ ਮੰਨ ਰਹੀ ਹੈ। ਆਸਟ੍ਰੇਲੀਆ ਦੇ ਸਾਬਕਾ ਕਪਤਾਨ ਮਾਈਕਲ ਕਲਾਰਕ ਨੇ ਬੁਮਰਾਹ ਦੀ ਜੰਮ ਕੇ ਤਾਰੀਫ਼ ਕਰਦਿਆਂ ਉਸ ਨੂੰ ਮੌਜੂਦਾ ਸਮੇਂ ਦਾ ਸਰਵੋਤਮ ਗੇਂਦਬਾਜ਼ ਕਰਾਰ ਦਿੱਤਾ ਹੈ। ਕਲਾਰਕ ਦਾ ਮੰਨਣਾ ਹੈ ਕਿ 145 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ, ਨਵੀਂ ਗੇਂਦ ਨੂੰ ਸਵਿੰਗ ਕਰਨ ਦਾ ਹੁਨਰ ਅਤੇ ਦੁਨੀਆ ਦਾ ਸਭ ਤੋਂ ਸਟੀਕ 'ਯਾਰਕਰ' ਬੁਮਰਾਹ ਨੂੰ ਇੱਕ ਵਿਲੱਖਣ ਖਿਡਾਰੀ ਬਣਾਉਂਦਾ ਹੈ।

ਕਮਿੰਸ, ਸਟਾਰਕ ਅਤੇ ਹੇਜ਼ਲਵੁੱਡ ਤੋਂ ਵੀ ਉੱਪਰ

ਮਾਈਕਲ ਕਲਾਰਕ ਨੇ ਬੁਮਰਾਹ ਦੀ ਤੁਲਨਾ ਆਸਟ੍ਰੇਲੀਆਈ ਦਿੱਗਜ ਗੇਂਦਬਾਜ਼ਾਂ—ਪੈਟ ਕਮਿੰਸ, ਮਿਸ਼ੇਲ ਸਟਾਰਕ ਅਤੇ ਜੋਸ਼ ਹੇਜ਼ਲਵੁੱਡ ਨਾਲ ਕਰਦਿਆਂ ਇੱਕ ਵੱਡਾ ਬਿਆਨ ਦਿੱਤਾ। ਉਨ੍ਹਾਂ ਕਿਹਾ ਕਿ ਭਾਵੇਂ ਇਹ ਤਿੰਨੋਂ ਮਹਾਨ ਗੇਂਦਬਾਜ਼ ਹਨ, ਪਰ ਉਨ੍ਹਾਂ ਕੋਲ ਬੁਮਰਾਹ ਵਰਗੀ ਵਿਭਿੰਨਤਾ (Variety) ਨਹੀਂ ਹੈ। ਕਲਾਰਕ ਨੇ ਸਵਾਲ ਚੁੱਕਿਆ ਕਿ ਕੀ ਕਦੇ ਇਨ੍ਹਾਂ ਤਿੰਨਾਂ ਨੇ ਕਿਸੇ ਫਾਰਮੈਟ ਵਿੱਚ ਸਿਰਫ਼ 'ਸਲੋਅਰ ਗੇਂਦਾਂ' (Slow balls) ਨਾਲ 3-4 ਵਿਕਟਾਂ ਲਈਆਂ ਹਨ? ਉਨ੍ਹਾਂ ਬੁਮਰਾਹ ਦੀ ਹੌਲੀ ਗੇਂਦ ਦੀ ਤੁਲਨਾ ਬੇਸਬਾਲ ਦੀ 'ਕਰਵਬਾਲ' ਨਾਲ ਕੀਤੀ, ਜੋ ਹਵਾ ਵਿੱਚ ਆਪਣਾ ਰਸਤਾ ਬਦਲ ਲੈਂਦੀ ਹੈ।

ਵੱਡੇ ਮੈਚਾਂ ਦਾ ਅਸਲੀ 'ਮੈਚ ਜੇਤੂ'

ਟੀ-20 ਵਿਸ਼ਵ ਕੱਪ ਦੇ ਫਾਈਨਲ ਵਿੱਚ ਨਿਊਜ਼ੀਲੈਂਡ ਵਿਰੁੱਧ 15 ਦੌੜਾਂ ਦੇ ਕੇ 4 ਵਿਕਟਾਂ ਲੈਣ ਦੇ ਬੁਮਰਾਹ ਦੇ ਪ੍ਰਦਰਸ਼ਨ ਦਾ ਜ਼ਿਕਰ ਕਰਦਿਆਂ ਕਲਾਰਕ ਨੇ ਕਿਹਾ ਕਿ ਬੁਮਰਾਹ ਦੀ ਸਭ ਤੋਂ ਵੱਡੀ ਤਾਕਤ ਦਬਾਅ ਨੂੰ ਸਹਿਣ ਦੀ ਸਮਰੱਥਾ ਹੈ। ਉਨ੍ਹਾਂ ਕਿਹਾ, "ਬੁਮਰਾਹ ਦਾ ਹੁਨਰ ਅਜਿਹਾ ਹੈ ਕਿ ਉਸ ਦਾ ਪ੍ਰਦਰਸ਼ਨ 100 ਵਿੱਚੋਂ 99 ਵਾਰ ਬਿਲਕੁਲ ਸੰਪੂਰਨ ਹੁੰਦਾ ਹੈ। ਉਹ ਪਿੱਚ ਨੂੰ ਪੜ੍ਹਨ ਵਿੱਚ ਮਾਹਰ ਹੈ ਅਤੇ ਜਾਣਦਾ ਹੈ ਕਿ ਕਦੋਂ ਕਿਹੜਾ ਹਥਿਆਰ ਵਰਤਣਾ ਹੈ।"

ਮਲਿੰਗਾ ਨਾਲ ਤੁਲਨਾ

ਕਲਾਰਕ ਨੇ ਬੁਮਰਾਹ ਨੂੰ ਸ੍ਰੀਲੰਕਾ ਦੇ ਮਹਾਨ ਗੇਂਦਬਾਜ਼ ਲਸਿਥ ਮਲਿੰਗਾ ਦੇ ਸਭ ਤੋਂ ਨੇੜੇ ਦੱਸਿਆ। ਉਨ੍ਹਾਂ ਮੁਤਾਬਕ ਬੁਮਰਾਹ ਦਾ ਅਜੀਬੋ-ਗਰੀਬ ਗੇਂਦਬਾਜ਼ੀ ਐਕਸ਼ਨ ਅਤੇ ਕੰਟਰੋਲ ਉਸ ਨੂੰ ਮਲਿੰਗਾ ਵਾਂਗ ਹੀ ਖ਼ਤਰਨਾਕ ਬਣਾਉਂਦਾ ਹੈ, ਜਿਸ ਨੂੰ ਪੜ੍ਹਨਾ ਕਿਸੇ ਵੀ ਬੱਲੇਬਾਜ਼ ਲਈ ਲਗਭਗ ਅਸੰਭਵ ਹੈ। ਕਲਾਰਕ ਨੇ ਸਾਫ਼ ਕਿਹਾ ਕਿ ਭਾਵੇਂ ਨਵੀਂ ਗੇਂਦ ਹੋਵੇ ਜਾਂ ਡੈਥ ਓਵਰ, ਬੁਮਰਾਹ ਇਸ ਸਮੇਂ ਵਿਸ਼ਵ ਕ੍ਰਿਕਟ ਵਿੱਚ ਇੱਕ ਵੱਖਰੇ ਹੀ ਮੁਕਾਮ 'ਤੇ ਹੈ।