ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ ਹੋਣਗੇ ਅਗਲੇ ਥਲ ਸੈਨਾ ਦੇ ਮੁਖੀ

ਨਵੀਂ ਦਿੱਲੀ: ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ, ਜੋ ਵਰਤਮਾਨ ਵਿੱਚ ਉਪ ਸੈਨਾ ਮੁਖੀ ਦੇ ਰੂਪ ਵਿੱਚ ਸੇਵਾ ਕਰ ਰਹੇ ਹਨ, ਨਵੇਂ ਥਲ ਸੈਨਾ ਮੁਖੀ ਹੋਣਗੇ। ਉਹ 30 ਜੂਨ ਨੂੰ ਦੁਪਹਿਰ ਤੋਂ ਅਗਲੇ ਥਲ ਸੈਨਾ ਮੁਖੀ ਵਜੋਂ ਅਹੁਦਾ ਸੰਭਾਲਣਗੇ। ਮੌਜੂਦਾ ਥਲ ਸੈਨਾ ਮੁਖੀ ਜਨਰਲ ਮਨੋਜ ਸੀ ਪਾਂਡੇ 30 ਜੂਨ ਨੂੰ ਅਹੁਦਾ ਛੱਡ ਰਹੇ ਹਨ। ਪਰਮ ਵਿਸ਼ਿਸ਼ਟ ਸੇਵਾ ਮੈਡਲ (PVSM) ਅਤੇ ਅਤਿ ਵਿਸ਼ਿਸ਼ਟ ਸੇਵਾ ਮੈਡਲ (AVSM) ਨਾਲ ਸਨਮਾਨਿਤ ਲੈਫਟੀਨੈਂਟ ਜਨਰਲ ਦਿਵੇਦੀ ਨੇ ਲੰਬੇ ਸਮੇਂ ਤੱਕ ਜੰਮੂ ਅਤੇ ਕਸ਼ਮੀਰ ਵਿੱਚ ਸੇਵਾ ਕੀਤੀ ਹੈ।

ਸਰਕਾਰ ਨੇ 25 ਮਈ ਨੂੰ ਛੇਵੇਂ ਪੜਾਅ ਦੀਆਂ ਚੋਣਾਂ ਤੋਂ ਬਾਅਦ 26 ਮਈ ਨੂੰ ਥਲ ਸੈਨਾ ਮੁਖੀ ਜਨਰਲ ਮਨੋਜ ਪਾਂਡੇ ਨੂੰ ਇੱਕ ਮਹੀਨੇ ਦਾ ਵਾਧਾ ਦਿੱਤਾ ਸੀ। ਇਸ ਕਾਰਨ ਉਹ 30 ਜੂਨ ਤੱਕ ਇਸ ਅਹੁਦੇ 'ਤੇ ਬਣੇ ਰਹਿਣਗੇ। ਇਸ ਤੋਂ ਪਹਿਲਾਂ ਉਹ 31 ਮਈ ਨੂੰ ਸੇਵਾਮੁਕਤ ਹੋਣ ਵਾਲੇ ਸਨ। ਰੱਖਿਆ ਮੰਤਰਾਲੇ ਨੇ ਕਿਹਾ ਕਿ ਇਹ ਸੇਵਾ ਵਿਸਥਾਰ ਸੈਨਾ ਨਿਯਮ, 1954 ਦੇ ਨਿਯਮ 16ਏ (4) ਦੇ ਤਹਿਤ ਦਿੱਤਾ ਗਿਆ ਸੀ।

ਜਾਣੋ ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ ਬਾਰੇ

ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ ਦਾ ਜਨਮ 1 ਜੁਲਾਈ 1964 ਨੂੰ ਹੋਇਆ ਸੀ। ਉਸਨੂੰ 15 ਦਸੰਬਰ 1984 ਨੂੰ ਭਾਰਤੀ ਫੌਜ ਦੀ ਇਨਫੈਂਟਰੀ ਜੰਮੂ ਅਤੇ ਕਸ਼ਮੀਰ ਰਾਈਫਲਜ਼ ਵਿੱਚ ਕਮਿਸ਼ਨ ਦਿੱਤਾ ਗਿਆ ਸੀ। ਉਸ ਕੋਲ ਲਗਭਗ 40 ਸਾਲਾਂ ਦਾ ਤਜਰਬਾ ਹੈ। ਆਪਣੀ ਲੰਬੀ ਅਤੇ ਵਿਲੱਖਣ ਸੇਵਾ ਦੌਰਾਨ ਉਸਨੇ ਵੱਖ-ਵੱਖ ਕਮਾਂਡਾਂ, ਸਟਾਫ ਅਤੇ ਨਿਰਦੇਸ਼ਕ ਅਹੁਦਿਆਂ 'ਤੇ ਸੇਵਾ ਕੀਤੀ ਹੈ। ਲੈਫਟੀਨੈਂਟ ਉਪੇਂਦਰ ਦਿਵੇਦੀ ਦੀ ਕਮਾਂਡ ਨਿਯੁਕਤੀਆਂ ਵਿੱਚ ਰੈਜੀਮੈਂਟ 18 ਜੰਮੂ ਅਤੇ ਕਸ਼ਮੀਰ ਰਾਈਫਲਜ਼, ਬ੍ਰਿਗੇਡ 26 ਸੈਕਟਰ ਅਸਾਮ ਰਾਈਫਲਜ਼, ਆਈਜੀ, ਅਸਾਮ ਰਾਈਫਲਜ਼ (ਪੂਰਬ) ਅਤੇ 9 ਕੋਰ ਦੀ ਕਮਾਂਡ ਸ਼ਾਮਲ ਹੈ।

ਕਈ ਸੰਭਾਲੀਆਂ ਅਹਿਮ ਜ਼ਿੰਮੇਵਾਰੀਆਂ

ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ ਨੇ ਥਲ ਸੈਨਾ ਦੇ ਉਪ ਮੁਖੀ ਵਜੋਂ ਨਿਯੁਕਤ ਹੋਣ ਤੋਂ ਪਹਿਲਾਂ 2022-2024 ਤੱਕ ਡਾਇਰੈਕਟਰ ਜਨਰਲ ਇਨਫੈਂਟਰੀ ਅਤੇ ਜਨਰਲ ਆਫਿਸਰ ਕਮਾਂਡਿੰਗ ਇਨ ਚੀਫ (ਐਚਕਿਊ ਨਾਰਦਰਨ ਕਮਾਂਡ) ਸਮੇਤ ਕਈ ਅਹਿਮ ਜ਼ਿੰਮੇਵਾਰੀਆਂ ਨਿਭਾਈਆਂ ਹਨ।

ਲੈਫਟੀਨੈਂਟ ਦਿਵੇਦੀ ਦਾ ਪਿਛੋਕੜ

ਲੈਫਟੀਨੈਂਟ ਦਿਵੇਦੀ ਨੇ ਸੈਨਿਕ ਸਕੂਲ ਰੀਵਾ, ਨੈਸ਼ਨਲ ਡਿਫੈਂਸ ਕਾਲਜ ਅਤੇ ਯੂਐਸ ਆਰਮੀ ਵਾਰ ਕਾਲਜ ਤੋਂ ਪੜ੍ਹਾਈ ਕੀਤੀ ਹੈ। ਉਸਨੇ DSSC ਵੈਲਿੰਗਟਨ ਅਤੇ ਆਰਮੀ ਵਾਰ ਕਾਲਜ (ਮਹੂ) ਤੋਂ ਕੋਰਸ ਵੀ ਕੀਤੇ ਹਨ। ਇਸ ਤੋਂ ਇਲਾਵਾ ਉਸਨੂੰ USAWC, Carlisle, USA ਵਿਖੇ ਵੱਕਾਰੀ NDC ਬਰਾਬਰ ਕੋਰਸ ਵਿੱਚ 'ਡਿਸਟਿੰਗੁਇਸ਼ਡ ਫੈਲੋ' ਨਾਲ ਸਨਮਾਨਿਤ ਕੀਤਾ ਗਿਆ। ਉਸਨੇ ਰੱਖਿਆ ਅਤੇ ਪ੍ਰਬੰਧਨ ਅਧਿਐਨ ਵਿੱਚ ਐਮ.ਫਿਲ ਅਤੇ ਰਣਨੀਤਕ ਅਧਿਐਨ ਅਤੇ ਮਿਲਟਰੀ ਸਾਇੰਸ ਵਿੱਚ ਦੋ ਮਾਸਟਰ ਡਿਗਰੀਆਂ ਪ੍ਰਾਪਤ ਕੀਤੀਆਂ ਹਨ।

ਪੀਵੀਐਸਐਮ, ਏਵੀਐਸਐਮ ਸਮੇਤ ਕਈ ਸਨਮਾਨ ਕੀਤੇ ਪ੍ਰਾਪਤ

ਲੈਫਟੀਨੈਂਟ ਜਨਰਲ ਉਪੇਂਦਰ ਦਿਵੇਦੀ ਨੂੰ ਪਰਮ ਵਿਸ਼ਿਸ਼ਟ ਸੇਵਾ ਮੈਡਲ (PVSM), ਅਤਿ ਵਿਸ਼ਿਸ਼ਟ ਸੇਵਾ ਮੈਡਲ (AVSM) ਅਤੇ ਤਿੰਨ ਜੀਓਸੀ-ਇਨ-ਸੀ ਪ੍ਰਸ਼ੰਸਾ ਪੱਤਰ ਦਿੱਤੇ ਗਏ ਹਨ।