Kapil Sharma ਦੀ ਫਿਟਨੈਸ ਦਾ ਰਾਜ਼: ਬਿਨਾਂ ਜਿੰਮ ਗਏ 63 ਦਿਨਾਂ ਵਿੱਚ ਘਟਾਇਆ 11 ਕਿਲੋ ਭਾਰ

ਮੁੰਬਈ:  ਮਸ਼ਹੂਰ ਕਾਮੇਡੀਅਨ ਕਪਿਲ ਸ਼ਰਮਾ (Kapil Sharma) ਅੱਜ ਆਪਣਾ 45ਵਾਂ ਜਨਮਦਿਨ ਮਨਾ ਰਹੇ ਹਨ। ਪ੍ਰਸ਼ੰਸਕ ਜਿੱਥੇ ਉਨ੍ਹਾਂ ਦੇ ਹਾਸੇ-ਮਜ਼ਾਕ ਦੇ ਦੀਵਾਨੇ ਹਨ, ਉੱਥੇ ਹੀ ਪਿਛਲੇ ਕੁਝ ਸਮੇਂ ਵਿੱਚ ਉਨ੍ਹਾਂ ਦੀ ਸ਼ਾਨਦਾਰ ਫਿਟਨੈਸ ਟ੍ਰਾਂਸਫਾਰਮੇਸ਼ਨ (Fitness Transformation) ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਕਪਿਲ ਦੇ ਫਿਟਨੈਸ ਕੋਚ ਯੋਗੇਸ਼ ਭਟੇਜਾ ਨੇ ਖੁਲਾਸਾ ਕੀਤਾ ਹੈ ਕਿ ਕਪਿਲ ਨੇ ਕਿਸੇ ਭਾਰੀ ਜਿੰਮ ਵਰਕਆਊਟ ਜਾਂ ਕਰੈਸ਼ ਡਾਈਟ (Crash Diet) ਦੀ ਬਜਾਏ ਇੱਕ ਖ਼ਾਸ '21-21-21' ਨਿਯਮ ਦੀ ਪਾਲਣਾ ਕਰਕੇ ਸਿਰਫ਼ 63 ਦਿਨਾਂ ਵਿੱਚ 11 ਕਿਲੋ ਭਾਰ ਘਟਾਇਆ ਹੈ।

ਕੀ ਹੈ 21-21-21 ਦਾ ਫਾਰਮੂਲਾ?

ਯੋਗੇਸ਼ ਅਨੁਸਾਰ, ਕਿਸੇ ਵੀ ਵੱਡੀ ਤਬਦੀਲੀ ਲਈ ਸਰੀਰ ਨੂੰ ਹੌਲੀ-ਹੌਲੀ ਤਿਆਰ ਕਰਨਾ ਜ਼ਰੂਰੀ ਹੈ। ਇਸ ਨਿਯਮ ਨੂੰ ਤਿੰਨ ਪੜਾਵਾਂ ਵਿੱਚ ਵੰਡਿਆ ਗਿਆ ਹੈ:

ਪਹਿਲੇ 21 ਦਿਨ (Movement - ਹਰਕਤ): ਇਸ ਪੜਾਅ ਵਿੱਚ ਜਿੰਮ ਜਾਣ ਦੀ ਲੋੜ ਨਹੀਂ ਹੈ। ਸਿਰਫ਼ ਸਰੀਰ ਦੀਆਂ ਮਾਸਪੇਸ਼ੀਆਂ ਨੂੰ ਸਰਗਰਮ (Active) ਕਰਨ ਲਈ ਹਲਕੀ ਸਟ੍ਰੈਚਿੰਗ (Stretching) ਅਤੇ ਸਰੀਰਕ ਗਤੀਵਿਧੀਆਂ 'ਤੇ ਧਿਆਨ ਦਿੱਤਾ ਜਾਂਦਾ ਹੈ, ਜਿਵੇਂ ਕਿ ਅਸੀਂ ਸਕੂਲ ਵਿੱਚ ਪੀ.ਟੀ. (PT) ਕਰਦੇ ਸੀ। ਇਸ ਦੌਰਾਨ ਖਾਣ-ਪੀਣ 'ਤੇ ਕੋਈ ਸਖ਼ਤ ਪਾਬੰਦੀ ਨਹੀਂ ਲਗਾਈ ਜਾਂਦੀ।

ਅਗਲੇ 21 ਦਿਨ (Dietary Changes - ਖ਼ੁਰਾਕ ਵਿੱਚ ਬਦਲਾਅ): ਜਦੋਂ ਸਰੀਰ ਹਰਕਤ ਵਿੱਚ ਆ ਜਾਂਦਾ ਹੈ, ਤਾਂ ਅਗਲੇ 21 ਦਿਨ ਖਾਣ-ਪੀਣ ਦੀਆਂ ਆਦਤਾਂ ਨੂੰ ਸੁਧਾਰਨ 'ਤੇ ਲਗਾਏ ਜਾਂਦੇ ਹਨ। ਇਸ ਦਾ ਮਤਲਬ ਭੁੱਖੇ ਰਹਿਣਾ ਨਹੀਂ, ਸਗੋਂ ਗਲਤ ਚੀਜ਼ਾਂ (ਜਿਵੇਂ ਮੱਖਣ, ਸਮੋਸੇ, ਚਾਹ) ਨੂੰ ਸਿਹਤਮੰਦ ਵਿਕਲਪਾਂ ਨਾਲ ਬਦਲਣਾ ਹੈ। ਕੈਲੋਰੀ (Calories) ਵਿੱਚ ਮਾਮੂਲੀ ਕਟੌਤੀ ਕੀਤੀ ਜਾਂਦੀ ਹੈ।

ਆਖਰੀ 21 ਦਿਨ (Breaking Bad Habits - ਬੁਰੀਆਂ ਆਦਤਾਂ ਦਾ ਤਿਆਗ): ਇਸ ਅੰਤਿਮ ਪੜਾਅ ਵਿੱਚ ਸਿਗਰਟਨੋਸ਼ੀ, ਸ਼ਰਾਬ ਜਾਂ ਬਹੁਤ ਜ਼ਿਆਦਾ ਕੈਫੀਨ (Caffeine) ਵਰਗੀਆਂ ਆਦਤਾਂ 'ਤੇ ਕਾਬੂ ਪਾਇਆ ਜਾਂਦਾ ਹੈ। 42 ਦਿਨਾਂ ਦੀ ਅਨੁਸ਼ਾਸਿਤ ਜੀਵਨ ਸ਼ੈਲੀ ਤੋਂ ਬਾਅਦ, ਵਿਅਕਤੀ ਖ਼ੁਦ ਵਿੱਚ ਬਦਲਾਅ ਦੇਖ ਕੇ ਪ੍ਰੇਰਿਤ (Motivated) ਮਹਿਸੂਸ ਕਰਦਾ ਹੈ ਅਤੇ ਫਿਰ ਜਿੰਮ ਵਰਗੀ ਸਖ਼ਤ ਕਸਰਤ ਸ਼ੁਰੂ ਕੀਤੀ ਜਾ ਸਕਦੀ ਹੈ।

ਸਹੀ ਜੀਵਨ ਸ਼ੈਲੀ ਹੈ ਕਾਮਯਾਬੀ ਦੀ ਕੁੰਜੀ

ਕੋਚ ਯੋਗੇਸ਼ ਦਾ ਕਹਿਣਾ ਹੈ ਕਿ ਭਾਰਤੀ ਘਰਾਂ ਵਿੱਚ ਨਾਸ਼ਤੇ ਦੌਰਾਨ ਬਹੁਤ ਜ਼ਿਆਦਾ ਕਾਰਬੋਹਾਈਡਰੇਟ (Carbohydrates) ਲਏ ਜਾਂਦੇ ਹਨ। ਫਿਟਨੈਸ ਉਦੋਂ ਹੀ ਸ਼ੁਰੂ ਹੁੰਦੀ ਹੈ ਜਦੋਂ ਅਸੀਂ ਆਪਣੇ ਪਾਣੀ ਦੇ ਸੇਵਨ (Water Intake), ਸਾਹ ਲੈਣ ਦੇ ਤਰੀਕੇ ਅਤੇ ਰੋਜ਼ਾਨਾ ਰੁਟੀਨ ਪ੍ਰਤੀ ਜਾਗਰੂਕ ਹੁੰਦੇ ਹਾਂ। ਕਪਿਲ ਸ਼ਰਮਾ ਨੇ ਇਸੇ ਸਾਦਗੀ ਅਤੇ ਨਿਰੰਤਰਤਾ (Consistency) ਨੂੰ ਅਪਣਾ ਕੇ ਇਹ ਮੁਕਾਮ ਹਾਸਲ ਕੀਤਾ ਹੈ।