ਔਰਤ ਨੇ ਖੋਲ੍ਹਿਆ ਪਾਰਸਲ, ਮਿਲੀ ਲਾਸ਼ ਅਤੇ ਫਿਰੌਤੀ ਦੀ ਚਿੱਠੀ

ਆਂਧਰਾ ਪ੍ਰਦੇਸ਼: : ਆਂਧਰਾ ਪ੍ਰਦੇਸ਼ ਦੇ ਪੱਛਮੀ ਗੋਦਾਵਰੀ ਜ਼ਿਲੇ ਦੇ ਉਂਡੀ ਮੰਡਲ ਦੇ ਯੇਂਦਾਗਾਂਡੀ ਪਿੰਡ ਵਿੱਚ ਇੱਕ ਹੈਰਾਨ ਕਰਨ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਵੀਰਵਾਰ ਰਾਤ ਇੱਕ ਔਰਤ ਨੂੰ ਇਕ ਪਾਰਸਲ ਮਿਲਿਆ ਜਿਸ ਵਿੱਚ ਇੱਕ ਅਣਪਛਾਤੇ ਵਿਅਕਤੀ ਦੀ ਲਾਸ਼ ਅਤੇ ਫਿਰੌਤੀ ਦੀ ਚਿੱਠੀ ਪਾਈ ਗਈ।

ਸਮਾਚਾਰ ਏਜੰਸੀ ਦੀ ਰਿਪੋਰਟ ਅਨੁਸਾਰ, ਇਹ ਘਟਨਾ ਪਿੰਡ ਵਿੱਚ ਘਟੀ, ਜਿੱਥੇ ਇੱਕ ਔਰਤ, ਨਾਗਾ ਤੁਲਸੀ, ਨੇ ਆਪਣੇ ਘਰ ਦੀ ਉਸਾਰੀ ਲਈ ਆਰਥਿਕ ਮਦਦ ਦੀ ਗੁਹਾਰ ਲਾਈ ਸੀ। ਉਸ ਨੇ ਕਸ਼ੱਤਰੀ ਸੇਵਾ ਸਮਿਤੀ ਤੋਂ ਮਦਦ ਦੀ ਅਰਜ਼ੀ ਦਿੱਤੀ ਸੀ, ਜਿਸ ਦੇ ਬਦਲੇ ਸਮਿਤੀ ਨੇ ਉਸ ਨੂੰ ਟਾਈਲਾਂ ਭੇਜੀਆਂ। ਬਾਅਦ ਵਿੱਚ, ਉਸ ਨੇ ਫਿਰ ਹੋਰ ਮਦਦ ਦੀ ਮੰਗ ਕੀਤੀ ਸੀ, ਜਿਸ ਤੇ ਕਮੇਟੀ ਨੇ ਉਸ ਨੂੰ ਇਲੈਕਟ੍ਰਿਕਲ ਸਾਮਾਨ ਭੇਜਣ ਦਾ ਵਾਅਦਾ ਕੀਤਾ ਸੀ।

ਇਸ ਸੱਭ ਤੋਂ ਬਾਅਦ ਪਾਰਸਲ ਆਉਣ ਤੋਂ ਪਹਿਲਾਂ, ਤੁਲਸੀ ਨੂੰ ਇੱਕ ਸੁਨੇਹਾ ਮਿਲਿਆ ਸੀ ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਉਸ ਨੂੰ ਲਾਈਟਾਂ, ਪੱਖੇ ਅਤੇ ਸਵਿੱਚ ਵਰਗਾ ਸਾਮਾਨ ਭੇਜਿਆ ਜਾ ਰਿਹਾ ਹੈ।

ਪਾਰਸਲ ਆਉਣ ਮਗਰੋਂ ਜਦੋਂ ਤੁਲਸੀ ਨੇ ਪਾਰਸਲ ਖੋਲ੍ਹਿਆ, ਉਸ ਨੂੰ ਹੈਰਾਨੀ ਦਾ ਸਾਹਮਣਾ ਕਰਨਾ ਪਿਆ ਕਿਉਂਕਿ ਉਸ ਵਿੱਚ ਇੱਕ ਵਿਅਕਤੀ ਦੀ ਲਾਸ਼ ਪਾਈ ਗਈ ਸੀ। ਉਸ ਨੇ ਤੁਰੰਤ ਇਸ ਦੀ ਜਾਣਕਾਰੀ ਆਪਣੇ ਪਰਿਵਾਰਕ ਮੈਂਬਰਾਂ ਨੂੰ ਦਿੱਤੀ, ਜੋ ਫਿਰ ਪੁਲਸ ਨੂੰ ਸੂਚਨਾ ਦੇਣ ਲਈ ਪੁੱਜੇ। ਪੁਲਿਸ ਨੇ ਮੌਕੇ 'ਤੇ ਪਹੁੰਚ ਕੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਸਰਕਾਰੀ ਹਸਪਤਾਲ ਭੇਜ ਦਿੱਤਾ।

ਪੁਲਿਸ ਨੇ ਕਿਹਾ ਕਿ ਲਾਸ਼ ਕਰੀਬ 45 ਸਾਲ ਦੇ ਵਿਅਕਤੀ ਦੀ ਹੈ ਅਤੇ ਉਸ ਦੀ ਮੌਤ ਚਾਰ ਜਾਂ ਪੰਜ ਦਿਨ ਪਹਿਲਾਂ ਹੋਈ ਹੋਵੇਗੀ। ਇਸ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ ਅਤੇ ਪੁਲਿਸ ਨੇ ਮਾਮਲੇ ਨਾਲ ਜੁੜੇ ਹੋਰ ਤੱਥਾਂ ਨੂੰ ਖੋਜਣ ਦੀ ਕੋਸ਼ਿਸ਼ ਸ਼ੁਰੂ ਕੀਤੀ ਹੈ।

ਫਿਰੌਤੀ ਦੀ ਚਿੱਠੀ: 1.3 ਕਰੋੜ ਰੁਪਏ ਦੀ ਮੰਗ

ਪਾਰਸਲ ਵਿੱਚ ਇਕ ਫਿਰੌਤੀ ਦੀ ਚਿੱਠੀ ਵੀ ਮਿਲੀ, ਜਿਸ ਵਿੱਚ 1.3 ਕਰੋੜ ਰੁਪਏ ਦੀ ਮੰਗ ਕੀਤੀ ਗਈ ਸੀ। ਚਿੱਠੀ ਵਿੱਚ ਇਹ ਵੀ ਚਿਤਾਵਨੀ ਦਿੱਤੀ ਗਈ ਸੀ ਕਿ ਜੇ ਮੰਗ ਪੂਰੀ ਨਾ ਕੀਤੀ ਗਈ ਤਾਂ ਪਰਿਵਾਰ ਨੂੰ ਗੰਭੀਰ ਨਤੀਜੇ ਭੁਗਤਣ ਪੈਣਗੇ।

ਪੁਲਿਸ ਨੇ ਕਿਹਾ ਕਿ ਉਹ ਉਸ ਵਿਅਕਤੀ ਦਾ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਜਿਸ ਨੇ ਪਾਰਸਲ ਡਿਲੀਵਰ ਕੀਤਾ। ਪੁਲਿਸ ਨੇ ਖੱਤਰੀ ਸੇਵਾ ਸਮਿਤੀ ਦੇ ਨੁਮਾਇੰਦਿਆਂ ਨੂੰ ਵੀ ਪੁੱਛਗਿੱਛ ਲਈ ਬੁਲਾਇਆ ਹੈ। ਇਸਦੇ ਨਾਲ ਹੀ, ਪੁਲਿਸ ਨੇ ਆਸਪਾਸ ਦੇ ਖੇਤਰਾਂ ਵਿੱਚ ਲਾਪਤਾ ਵਿਅਕਤੀਆਂ ਦੀਆਂ ਸ਼ਿਕਾਇਤਾਂ ਦੀ ਵੀ ਪੁਸ਼ਟੀ ਕਰਨੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਮਾਮਲੇ ਵਿੱਚ ਪੁਲਿਸ ਨੇ ਜਾਂਚ ਵਿੱਚ ਤੀਬਰਤਾ ਵਧਾ ਦਿੱਤੀ ਹੈ ਅਤੇ ਹਰ ਪੱਖ ਤੋਂ ਖੋਜ ਜਾਰੀ ਰੱਖੀ ਹੈ।