ਯੂਪੀ ਪੁਲਿਸ ਨੇ ਹੈਪੀ ਪਾਸੀਆ ਬਾਰੇ ਕੀਤਾ ਵੱਡਾ ਖੁਲਾਸਾ

ਹੈਪੀ ਪਾਸੀਆ ਨੇ ਮਹਾਂਕੁੰਭ ​​'ਤੇ ਅੱਤਵਾਦੀ ਹਮਲੇ ਦੀ ਰਚੀ ਸੀ ਸਾਜ਼ਿਸ਼: ਯੂਪੀ ਪੁਲਿਸ 

ਪ੍ਰਯਾਗਰਾਜ/ਨਵੀਂ ਦਿੱਲੀ: ਐਫਬੀਆਈ ਵਲੋਂ ਹਾਲ ਹੀ ਵਿੱਚ ਅਮਰੀਕਾ 'ਚ ਗ੍ਰਿਫ਼ਤਾਰ ਕੀਤਾ ਗਿਆ ਹਰਪ੍ਰੀਤ ਸਿੰਘ ਉਰਫ਼ ਹੈਪੀ ਪਾਸੀਆ, ਜੋ ਕਿ ਬੱਬਰ ਖਾਲਸਾ ਇੰਟਰਨੈਸ਼ਨਲ (BKI) ਨਾਲ ਜੁੜਿਆ ਹੋਇਆ ਹੈ, 'ਤੇ ਹੁਣ ਉੱਤਰ ਪ੍ਰਦੇਸ਼ ਦੇ ਮਹਾਂਕੁੰਭ ​​'ਤੇ ਅੱਤਵਾਦੀ ਹਮਲੇ ਦੀ ਯੋਜਨਾ ਬਣਾਉਣ ਦਾ ਵੀ ਇਲਜ਼ਾਮ ਲੱਗਾ ਹੈ। ਯੂਪੀ ਪੁਲਿਸ ਅਧਿਕਾਰੀਆਂ ਮੁਤਾਬਕ, ਪਾਸੀਆ ISI ਅਤੇ BKI ਦੀ ਮਿਲੀਭਗਤ ਨਾਲ ਇੱਕ ਵੱਡੀ ਸਾਜ਼ਿਸ਼ ਦਾ ਹਿੱਸਾ ਸੀ।

ਐਡੀਜੀ ਅਮਿਤਾਭ ਯਸ਼ ਨੇ ਖੁਲਾਸਾ ਕੀਤਾ ਕਿ: ਹੈਪੀ ਪਾਸੀਆ ਨੇ 13 ਜਨਵਰੀ ਤੋਂ 26 ਫਰਵਰੀ 2025 ਤੱਕ ਚੱਲੇ ਮਹਾਂਕੁੰਭ ​​ਦੌਰਾਨ ਅੱਤਵਾਦੀ ਹਮਲਾ ਕਰਨ ਦੀ ਯੋਜਨਾ ਬਣਾਈ ਸੀ।

ਇਹ ਸਾਜ਼ਿਸ਼ ਜਰਮਨੀ ਵਿਚ ਬੈਠੇ BKI ਆਗੂ ਸਵਰਨ ਸਿੰਘ ਉਰਫ ਜੀਵਨ ਫੌਜੀ ਵਲੋਂ ਚਲਾਈ ਗਈ।

ISI (ਪਾਕਿਸਤਾਨ ਦੀ ਇੰਟੈਲੀਜੈਂਸ ਏਜੰਸੀ) ਅਤੇ BKI ਨੇ ਮਿਲ ਕੇ ਇਹ ਯੋਜਨਾ ਤਿਆਰ ਕੀਤੀ ਸੀ। ਇਸ ਯੋਜਨਾ 'ਚ ਪਾਕਿਸਤਾਨ ਵਿੱਚ ਰਹਿੰਦਾ ਹਰਵਿੰਦਰ ਸਿੰਘ ਉਰਫ ਰਿੰਦਾ ਅਤੇ ਅਮਰੀਕਾ ਵਾਲਾ ਹੈਪੀ ਪਾਸੀਆ ਵੀ ਸ਼ਾਮਲ ਸਨ।

ਮਹੱਤਵਪੂਰਨ ਕੜੀਆਂ:

ਯੂਪੀ ਐਸਟੀਐਫ ਨੇ 6 ਮਾਰਚ ਨੂੰ ਲਾਜ਼ਰ ਮਸੀਹ ਨਾਂ ਦੇ BKI ਅੱਤਵਾਦੀ ਨੂੰ ਗ੍ਰਿਫ਼ਤਾਰ ਕੀਤਾ ਸੀ, ਜਿਸ ਨੇ ਦੌਰਾਨੇ ਪੁੱਛਗਿੱਛ ਪਾਸੀਆ ਦਾ ਨਾਮ ਲਿਆ।

ਲਾਜ਼ਰ ਮਸੀਹ 45 ਦਿਨਾਂ ਤੱਕ ਕੌਸ਼ਾਂਬੀ ਵਿੱਚ ਭੇਸ ਬਦਲ ਕੇ ਰਹਿ ਰਿਹਾ ਸੀ ਅਤੇ ਹਮਲੇ ਦੀ ਤਿਆਰੀ ਵਿੱਚ ਸੀ।

ਲਾਜ਼ਰ ਨੇ ਦੱਸਿਆ ਕਿ ਉਹ ਪਾਸੀਆ ਅਤੇ ਰਾਹੁਲ ਉਰਫ ਕਾਕਾ (ਅਮਰੀਕਾ ਵਾਸੀ) ਨਾਲ ਨਿਰੰਤਰ ਸੰਪਰਕ ਵਿੱਚ ਸੀ।

ਹੈਪੀ ਪਾਸੀਆ ਦੀ ਪਛਾਣ:

ਅੱਤਵਾਦੀ ਹੈਪੀ ਪਾਸੀਆ ਦਾ ਨਾਮ ਪੰਜਾਬ ਵਿੱਚ 14 ਵੱਖ-ਵੱਖ ਅੱਤਵਾਦੀ ਹਮਲਿਆਂ ਨਾਲ ਜੋੜਿਆ ਜਾਂਦਾ ਹੈ।

ਐਨਆਈਏ ਵਲੋਂ ਉਸ ਲਈ ਇਨਾਮ ਵੀ ਰੱਖਿਆ ਗਿਆ ਹੈ।

ਫਿਲਹਾਲ ਪਾਸੀਆ ਐਫਬੀਆਈ ਅਤੇ ਯੂਐਸ ਇਮੀਗ੍ਰੇਸ਼ਨ ਅਥਾਰਿਟੀ ਦੀ ਹਿਰਾਸਤ ਵਿੱਚ ਹੈ ਅਤੇ ਭਾਰਤ ਵਾਪਸੀ ਦੀ ਸੰਭਾਵਨਾ 'ਤੇ ਕੰਮ ਚੱਲ ਰਿਹਾ ਹੈ।

ਯੂਪੀ ਪੁਲਿਸ ਅਤੇ ਐਸਟੀਐਫ ਹੁਣ ਪਾਸੀਆ ਦੀ ਭੂਮਿਕਾ ਅਤੇ ISI-BKI ਨਾਲ ਉਸਦੇ ਗਠਜੋੜ ਦੀ ਪੂਰੀ ਜਾਂਚ ਕਰ ਰਹੀ ਹੈ। ਜੇਕਰ ਉਹ ਭਾਰਤ ਆਉਂਦਾ ਹੈ, ਤਾਂ ਉਸ ਤੋਂ ਲੰਬੀ ਪੁੱਛਗਿੱਛ ਹੋਵੇਗੀ।