Ukraine ਨੇ ਰੂਸ ਦੇ ਬੈਲਿਸਟਿਕ ਮਿਜ਼ਾਈਲ ਪਲਾਂਟ ਨੂੰ ਬਣਾਇਆ ਨਿਸ਼ਾਨਾ
ਜਵਾਬੀ ਹਮਲੇ 'ਚ ਬੱਚਿਆਂ ਸਮੇਤ 9 ਜ਼ਖਮੀ
ਰੂਸ-ਯੂਕਰੇਨ ਜੰਗ ਦੇ 4 ਸਾਲ ਪੂਰੇ
ਮਾਸਕੋ/ਕੀਵ: 22 ਫਰਵਰੀ, 2026
ਰੂਸ ਅਤੇ ਯੂਕਰੇਨ ਵਿਚਕਾਰ ਚੱਲ ਰਹੀ ਭਿਆਨਕ ਜੰਗ ਨੂੰ ਅੱਜ ਚਾਰ ਸਾਲ ਮੁਕੰਮਲ ਹੋ ਗਏ ਹਨ। ਇਸ ਮੌਕੇ ਯੂਕਰੇਨ ਨੇ ਰੂਸ ਦੇ ਅੰਦਰੂਨੀ ਹਿੱਸੇ ਵਿੱਚ ਇੱਕ ਵੱਡਾ ਹਵਾਈ ਹਮਲਾ ਕਰਕੇ ਆਪਣੀ ਤਾਕਤ ਦਾ ਪ੍ਰਦਰਸ਼ਨ ਕੀਤਾ ਹੈ। ਯੂਕਰੇਨੀ ਫੌਜ ਨੇ ਰੂਸ ਦੇ ਉਦਮੁਰਤ ਗਣਰਾਜ ਵਿੱਚ ਸਥਿਤ ਇੱਕ ਅਹਿਮ ਬੈਲਿਸਟਿਕ ਮਿਜ਼ਾਈਲ ਪਲਾਂਟ ਨੂੰ ਡਰੋਨਾਂ ਅਤੇ ਮਿਜ਼ਾਈਲਾਂ ਨਾਲ ਨਿਸ਼ਾਨਾ ਬਣਾਇਆ, ਜਿਸ ਨਾਲ ਉੱਥੇ ਭਾਰੀ ਤਬਾਹੀ ਹੋਈ ਹੈ।
ਉਦਮੁਰਤ ਦੇ ਮੁਖੀ ਅਲੈਗਜ਼ੈਂਡਰ ਬ੍ਰੇਚਾਲੋਵ ਨੇ ਹਮਲੇ ਦੀ ਪੁਸ਼ਟੀ ਕਰਦਿਆਂ ਦੱਸਿਆ ਕਿ ਯੂਕਰੇਨ ਤੋਂ ਲਗਭਗ 1,400 ਕਿਲੋਮੀਟਰ ਦੂਰ ਸਥਿਤ 'ਵੋਟਕਿੰਸਕ ਮਸ਼ੀਨ-ਬਿਲਡਿੰਗ ਪਲਾਂਟ' 'ਤੇ ਇਹ ਹਮਲਾ ਹੋਇਆ। ਇਸ ਪਲਾਂਟ ਵਿੱਚ ਰੂਸ ਦੀਆਂ ਅਤਿ-ਆਧੁਨਿਕ ਬੈਲਿਸਟਿਕ ਅਤੇ ਇੰਟਰਕੌਂਟੀਨੈਂਟਲ ਬੈਲਿਸਟਿਕ ਮਿਜ਼ਾਈਲਾਂ (ICBM) ਤਿਆਰ ਕੀਤੀਆਂ ਜਾਂਦੀਆਂ ਹਨ। ਹਮਲੇ ਲਈ ਯੂਕਰੇਨ ਨੇ ਆਪਣੀ ਸਵਦੇਸ਼ੀ 'ਫਲੇਮਿੰਗੋ' ਮਿਜ਼ਾਈਲ ਦੀ ਵਰਤੋਂ ਕੀਤੀ, ਜਿਸ ਕਾਰਨ ਪਲਾਂਟ ਵਿੱਚ ਭਿਆਨਕ ਅੱਗ ਲੱਗ ਗਈ। ਇਸ ਤੋਂ ਇਲਾਵਾ ਯੂਕਰੇਨ ਨੇ ਸਮਾਰਾ ਖੇਤਰ ਵਿੱਚ ਇੱਕ ਰੂਸੀ ਗੈਸ ਪਲਾਂਟ 'ਤੇ ਵੀ ਹਮਲਾ ਕਰਨ ਦਾ ਦਾਅਵਾ ਕੀਤਾ ਹੈ।
ਦੂਜੇ ਪਾਸੇ, ਰੂਸ ਨੇ ਵੀ ਯੂਕਰੇਨ 'ਤੇ ਪਲਟਵਾਰ ਕਰਦਿਆਂ 29 ਮਿਜ਼ਾਈਲਾਂ ਅਤੇ 400 ਡਰੋਨ ਦਾਗੇ ਹਨ। ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਅਨੁਸਾਰ, ਰੂਸੀ ਹਮਲੇ ਵਿੱਚ ਬੱਚਿਆਂ ਸਮੇਤ ਨੌਂ ਲੋਕ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ ਹਨ। ਉਨ੍ਹਾਂ ਕਿਹਾ ਕਿ ਯੂਕਰੇਨੀ ਹਵਾਈ ਰੱਖਿਆ ਪ੍ਰਣਾਲੀ ਨੇ 29 ਵਿੱਚੋਂ 25 ਰੂਸੀ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਹੀ ਮਾਰ ਗਿਰਾਇਆ, ਪਰ ਰੂਸ ਦੇ ਇਹ ਹਮਲੇ ਉਸ ਦੇ ਅਸਲ ਇਰਾਦਿਆਂ ਨੂੰ ਜ਼ਾਹਰ ਕਰਦੇ ਹਨ।
ਇਹ ਤਾਜ਼ਾ ਹਮਲੇ ਅਜਿਹੇ ਸਮੇਂ ਹੋਏ ਹਨ ਜਦੋਂ ਹਾਲ ਹੀ ਵਿੱਚ ਜੇਨੇਵਾ ਵਿੱਚ ਅਮਰੀਕਾ ਦੀ ਵਿਚੋਲਗੀ ਹੇਠ ਹੋਈ ਸ਼ਾਂਤੀ ਵਾਰਤਾ ਬਿਨਾਂ ਕਿਸੇ ਨਤੀਜੇ ਦੇ ਖਤਮ ਹੋਈ ਹੈ। ਜੰਗ ਦੇ ਚੌਥੇ ਸਾਲ ਵਿੱਚ ਦਾਖਲ ਹੋਣ ਦੇ ਨਾਲ ਹੀ ਦੋਵਾਂ ਦੇਸ਼ਾਂ ਵਿਚਾਲੇ ਤਣਾਅ ਇੱਕ ਵਾਰ ਫਿਰ ਸਿਖਰ 'ਤੇ ਪਹੁੰਚ ਗਿਆ ਹੈ।