ਤਿੰਨ ਸਗੀਆਂ ਭੈਣਾਂ ਨੇ 9ਵੀਂ ਮੰਜ਼ਿਲ ਤੋਂ ਮਾਰੀ ਛਾਲ, ਮੌਤ

ਗਾਜ਼ੀਆਬਾਦ, 4 ਫਰਵਰੀ, 2026: ਦਿੱਲੀ ਦੇ ਨਾਲ ਲੱਗਦੇ ਗਾਜ਼ੀਆਬਾਦ ਤੋਂ ਰੂਹ ਕੰਬਾਊ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਇੱਕ ਹਾਈ-ਰਾਈਜ਼ ਸੋਸਾਇਟੀ ਦੀ 9ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਕੇ ਤਿੰਨ ਨਾਬਾਲਗ ਸਗੀਆਂ ਭੈਣਾਂ ਨੇ ਖੁਦਕੁਸ਼ੀ ਕਰ ਲਈ। ਇਹ ਦੁਖਦਾਈ ਘਟਨਾ ਬੁੱਧਵਾਰ ਤੜਕੇ 2 ਵਜੇ ਟੀਲਾ ਮੋਡ ਥਾਣਾ ਖੇਤਰ ਦੇ 'ਭਾਰਤ ਸਿਟੀ' ਟਾਊਨਸ਼ਿਪ ਵਿੱਚ ਵਾਪਰੀ। ਮ੍ਰਿਤਕ ਭੈਣਾਂ ਦੀ ਪਛਾਣ ਵਿਸ਼ਿਕਾ (16), ਪ੍ਰਾਚੀ (14) ਅਤੇ ਪਾਖੀ (12) ਵਜੋਂ ਹੋਈ ਹੈ। ਸੂਚਨਾ ਮਿਲਦੇ ਹੀ ਪੁਲਿਸ ਨੇ ਲਾਸ਼ਾਂ ਨੂੰ ਕਬਜ਼ੇ ਵਿੱਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ ਅਤੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਪੁਲਿਸ ਦੀ ਸ਼ੁਰੂਆਤੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਤਿੰਨੋਂ ਭੈਣਾਂ ਮੋਬਾਈਲ ਗੇਮਾਂ, ਖਾਸ ਕਰਕੇ ਇੱਕ 'ਕੋਰੀਅਨ ਲਵ ਗੇਮਿੰਗ ਐਪ' ਦੀਆਂ ਬੁਰੀ ਤਰ੍ਹਾਂ ਆਦੀ ਸਨ। ਇਹ ਇੱਕ ਟਾਸਕ-ਅਧਾਰਤ ਗੇਮ ਸੀ, ਜਿਸ ਨੇ ਉਨ੍ਹਾਂ ਦੇ ਦਿਮਾਗ 'ਤੇ ਡੂੰਘਾ ਅਸਰ ਪਾਇਆ ਹੋਇਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਕੋਵਿਡ ਮਹਾਂਮਾਰੀ ਤੋਂ ਬਾਅਦ ਉਨ੍ਹਾਂ ਨੇ ਸਕੂਲ ਜਾਣਾ ਵੀ ਬੰਦ ਕਰ ਦਿੱਤਾ ਸੀ ਅਤੇ ਉਹ ਆਪਣਾ ਜ਼ਿਆਦਾਤਰ ਸਮਾਂ ਮੋਬਾਈਲ 'ਤੇ ਹੀ ਬਿਤਾਉਂਦੀਆਂ ਸਨ। ਉਨ੍ਹਾਂ ਦੀ ਇਸ ਲਤ ਕਾਰਨ ਮਾਪੇ ਅਕਸਰ ਉਨ੍ਹਾਂ ਨੂੰ ਝਿੜਕਦੇ ਸਨ, ਜਿਸ ਕਾਰਨ ਉਹ ਕਾਫੀ ਪਰੇਸ਼ਾਨ ਰਹਿੰਦੀਆਂ ਸਨ।

ਘਟਨਾ ਵਾਲੀ ਰਾਤ ਤਿੰਨੋਂ ਭੈਣਾਂ ਫਲੈਟ ਦੇ ਮੰਦਰ ਵਾਲੇ ਕਮਰੇ ਵਿੱਚ ਇਕੱਠੀਆਂ ਸਨ। ਪੁਲਿਸ ਅਨੁਸਾਰ ਉਨ੍ਹਾਂ ਨੇ ਖਿੜਕੀ ਤੱਕ ਪਹੁੰਚਣ ਲਈ ਕੁਰਸੀ ਦਾ ਸਹਾਰਾ ਲਿਆ ਅਤੇ ਇੱਕ-ਇੱਕ ਕਰਕੇ 9ਵੀਂ ਮੰਜ਼ਿਲ ਤੋਂ ਹੇਠਾਂ ਛਾਲ ਮਾਰ ਦਿੱਤੀ। ਏਸੀਪੀ ਅਤੁਲ ਕੁਮਾਰ ਸਿੰਘ ਨੇ ਦੱਸਿਆ ਕਿ ਤਿੰਨੋਂ ਭੈਣਾਂ ਆਪਸ ਵਿੱਚ ਬਹੁਤ ਨੇੜੇ ਸਨ ਅਤੇ ਹਰ ਕੰਮ ਇਕੱਠੇ ਕਰਦੀਆਂ ਸਨ। ਉਨ੍ਹਾਂ ਨੇ ਇਕੱਠੇ ਜਿਉਣ ਅਤੇ ਮਰਨ ਦੀ ਕਥਿਤ ਸਹੁੰ ਵੀ ਖਾਧੀ ਹੋਈ ਸੀ। ਇਸ ਘਟਨਾ ਨੇ ਸੋਸਾਇਟੀ ਦੇ ਲੋਕਾਂ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ ਅਤੇ ਮਾਪਿਆਂ ਲਈ ਬੱਚਿਆਂ ਦੀ ਮੋਬਾਈਲ ਪ੍ਰਤੀ ਲਤ ਨੂੰ ਲੈ ਕੇ ਇੱਕ ਵੱਡੀ ਚੇਤਾਵਨੀ ਦਿੱਤੀ ਹੈ।