ਜੁੜਵਾਂ ਭੈਣ ਦੀ ਹੱਤਿਆ ਕਰਨ ਵਾਲੇ ਅਮਰੀਕੀ ਨੂੰ ਮਿਲੀ ਲੰਮੀ ਕੈਦ

ਹਿਊਸਟਨ ਦੇ ਇੱਕ ਨੌਜਵਾਨ ਨੂੰ 29 ਸਤੰਬਰ 2021 ਨੂੰ ਆਪਣੀ ਜੁੜਵਾਂ ਭੈਣ ਦੀ ਚਾਕੂ ਮਾਰ ਕੇ ਹੱਤਿਆ ਕਰਨ ਦੇ ਦੋਸ਼ 'ਚ 15 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈ। ਬੈਂਜਾਮਿਨ ਐਲੀਅਟ, ਜੋ ਹੁਣ 21 ਸਾਲ ਦਾ ਹੈ, ਨੇ ਘਟਨਾ ਸਮੇਂ 911 ਦੇ ਇੱਕ ਆਪਰੇਟਰ ਨੂੰ ਦੱਸਿਆ ਕਿ ਉਸਨੂੰ ਲੱਗ ਰਿਹਾ ਸੀ ਕਿ ਉਹ "ਸੁਪਨਾ" ਦੇਖ ਰਿਹਾ ਹੈ।

ਐਲੀਅਟ ਨੇ ਕਿਹਾ ਕਿ ਉਹ ਆਪਣੀ ਭੈਣ ਮੇਘਨ ਦੇ ਕਮਰੇ ਵਿੱਚ ਜਾਗਿਆ ਤੇ ਉਹਨੂੰ ਗਰਦਨ ਵਿੱਚ ਚਾਕੂ ਲੱਗਾ ਹੋਇਆ ਮਿਲਿਆ। ਅਦਾਲਤੀ ਦਸਤਾਵੇਜ਼ਾਂ ਅਨੁਸਾਰ, ਗ੍ਰਿਫਤਾਰੀ ਤੋਂ ਬਾਅਦ ਐਲੀਅਟ ਨੇ ਦੱਸਿਆ ਕਿ ਜਦੋਂ ਉਸਨੂੰ ਇਹ ਸਮਝ ਆਈ ਕਿ ਉਹ ਸੁਪਨਾ ਨਹੀਂ ਸੀ, ਤਾਂ ਉਸਨੇ ਤੁਰੰਤ ਚਾਕੂ ਹਟਾ ਦਿੱਤਾ ਅਤੇ ਜ਼ਖ਼ਮ 'ਤੇ ਦਬਾਅ ਪਾਉਣ ਦੀ ਕੋਸ਼ਿਸ਼ ਕੀਤੀ। ਫਿਰ, ਉਸਨੇ 911 'ਤੇ ਕਾਲ ਕਰਕੇ ਮਦਦ ਮੰਗੀ।

ਜਦੋਂ ਪੁਲਿਸ ਮੌਕੇ 'ਤੇ ਪਹੁੰਚੀ, ਤਾਂ ਐਲੀਅਟ ਆਪਣੀ ਭੈਣ 'ਤੇ ਸੀਪੀਆਰ ਕਰ ਰਿਹਾ ਸੀ, ਪਰ ਈਐਮਐਸ ਨੇ ਮੇਘਨ ਨੂੰ ਮੌਕੇ 'ਤੇ ਹੀ ਮ੍ਰਿਤਕ ਐਲਾਨ ਦਿੱਤਾ। ਰਿਪੋਰਟ ਅਨੁਸਾਰ, ਉਹਨੂੰ ਚਾਕੂ ਦੇ ਕਈ ਜ਼ਖ਼ਮ ਲੱਗੇ ਹੋਏ ਸਨ।

KHOU 11 ਮੁਤਾਬਕ, ਐਲੀਅਟ ਨੇ ਇੱਕ ਪੁਲਿਸ ਅਧਿਕਾਰੀ ਨੂੰ ਕਿਹਾ ਕਿ ਉਹ "ਕੋਈ ਸਤਿਕਾਰ ਦੇ ਹੱਕਦਾਰ ਨਹੀਂ" ਹੈ, ਕਿਉਂਕਿ ਉਸਨੇ "ਆਪਣੀ ਭੈਣ ਨੂੰ ਮਾਰ ਦਿੱਤਾ"। ਇੱਕ ਵੀਡੀਓ, ਜੋ ਮਾਮਲੇ ਦੌਰਾਨ ਜਿਊਰੀ ਨੂੰ ਵਿਖਾਈ ਗਈ, ਵਿੱਚ ਐਲੀਅਟ ਨੇ ਦੱਸਿਆ, "ਮੈਂ ਘਬਰਾ ਗਿਆ, ਚਾਕੂ ਹੇਠਾਂ ਰੱਖ ਦਿੱਤਾ ਅਤੇ ਖੂਨ ਰੋਕਣ ਲਈ ਮੇਘਨ ਦੇ ਉੱਤੇ ਸਿਰਹਾਣਾ ਰੱਖ ਦਿੱਤਾ। ਫਿਰ, ਮੈਂ ਆਪਣੇ ਫ਼ੋਨ ਤੋਂ 911 'ਤੇ ਕਾਲ ਕੀਤੀ।"

ਇਸਤਗਾਸਾ ਅਤੇ ਬਚਾਅ ਪੱਖ ਦੋਵਾਂ ਨੇ ਨੀਂਦ ਸੰਬੰਧੀ ਵਿਘਨਾਂ (parasomnias) ਬਾਰੇ ਮਾਹਿਰਾਂ ਦੀ ਗਵਾਹੀ ਪੇਸ਼ ਕੀਤੀ, ਜੋ ਨੀਂਦ ਵਿੱਚ ਤੁਰਨ ਜਾਂ ਹੋਰ ਅਣਚਾਹੇ ਵਿਹਾਰਾਂ ਲਈ ਕਾਰਨ ਬਣ ਸਕਦੇ ਹਨ।

ਬਚਾਅ ਪੱਖ ਵੱਲੋਂ ਗਵਾਹੀ ਦੇਣ ਵਾਲੇ ਨਿਊਰੋਲੋਜਿਸਟ ਡਾਕਟਰ ਜੇਰਾਲਡ ਸਿਮੰਸ ਨੇ ABC13 ਨੂੰ ਦੱਸਿਆ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਜਿਊਰੀ ਨੇ ਗਲਤ ਫੈਸਲਾ ਲਿਆ। "ਜੇ ਇਹ ਸੰਭਵ ਨਾ ਹੁੰਦਾ, ਤਾਂ ਮੈਂ ਇਹ ਦਲੀਲ ਨਾ ਦਿੰਦਾ। ਅਜੇਹੇ ਹੋਰ ਵੀ ਮਾਮਲੇ ਹੋਏ ਹਨ, ਜਿਹੜੇ ਘੱਟ ਮਿਲਦੇ ਹਨ, ਪਰ ਸੰਭਵ ਹਨ।"

The American who killed the twin sister got a long prison term