ਹਵਾਈ ਸਫ਼ਰ ਕਰਨ ਵਾਲਿਆਂ ਨੂੰ ਝਟਕਾ: Air India ਨੇ ਕਿਰਾਏ ਵਿੱਚ ਕੀਤਾ ਭਾਰੀ ਵਾਧਾ

ਨਵੀਂ ਦਿੱਲੀ: ਈਰਾਨ ਅਤੇ ਇਜ਼ਰਾਈਲ ਵਿਚਕਾਰ ਚੱਲ ਰਹੀ ਜੰਗ ਦਾ ਖ਼ਾਮਿਆਜ਼ਾ ਹੁਣ ਹਵਾਈ ਯਾਤਰੀਆਂ ਨੂੰ ਭੁਗਤਣਾ ਪਵੇਗਾ। ਵਿਸ਼ਵ ਪੱਧਰ 'ਤੇ ਜੈੱਟ ਫਿਊਲ (ATF) ਦੀਆਂ ਕੀਮਤਾਂ ਵਿੱਚ ਆਏ ਭਾਰੀ ਉਛਾਲ ਕਾਰਨ ਦੇਸ਼ ਦੀ ਦਿੱਗਜ ਏਅਰਲਾਈਨ ਏਅਰ ਇੰਡੀਆ (Air India) ਨੇ ਫਿਊਲ ਸਰਚਾਰਜ (Fuel Surcharge) ਵਧਾਉਣ ਦਾ ਵੱਡਾ ਫੈਸਲਾ ਲਿਆ ਹੈ। ਇਹ ਨਵੀਆਂ ਦਰਾਂ ਘਰੇਲੂ ਉਡਾਣਾਂ (Domestic Flights) 'ਤੇ 8 ਅਪ੍ਰੈਲ ਤੋਂ ਅਤੇ ਅੰਤਰਰਾਸ਼ਟਰੀ ਰੂਟਾਂ (International Routes) 'ਤੇ 10 ਅਪ੍ਰੈਲ ਤੋਂ ਲਾਗੂ ਹੋ ਜਾਣਗੀਆਂ। ਇਸ ਫੈਸਲੇ ਨਾਲ ਘਰੇਲੂ ਯਾਤਰੀਆਂ 'ਤੇ 899 ਰੁਪਏ ਤੱਕ ਅਤੇ ਅੰਤਰਰਾਸ਼ਟਰੀ ਯਾਤਰੀਆਂ 'ਤੇ 280 ਡਾਲਰ ($280) ਤੱਕ ਦਾ ਵਾਧੂ ਵਿੱਤੀ ਬੋਝ ਪਵੇਗਾ।

ਪਿਛਲੇ ਕੁਝ ਹਫ਼ਤਿਆਂ ਵਿੱਚ ਜੈੱਟ ਈਂਧਨ ਦੀਆਂ ਕੀਮਤਾਂ ਲਗਭਗ ਦੁੱਗਣੀਆਂ ਹੋ ਗਈਆਂ ਹਨ। ਇੰਟਰਨੈਸ਼ਨਲ ਏਅਰ ਟ੍ਰਾਂਸਪੋਰਟ ਐਸੋਸੀਏਸ਼ਨ (IATA) ਦੇ ਡੇਟਾ ਅਨੁਸਾਰ ਫਰਵਰੀ ਵਿੱਚ ਜੋ ਈਂਧਨ 99 ਡਾਲਰ ਪ੍ਰਤੀ ਬੈਰਲ ਸੀ, ਉਹ ਮਾਰਚ ਦੇ ਅਖੀਰ ਤੱਕ 195 ਡਾਲਰ ਤੱਕ ਪਹੁੰਚ ਗਿਆ ਹੈ। ਏਅਰ ਇੰਡੀਆ ਨੇ ਹੁਣ ਫਲੈਟ ਸਰਚਾਰਜ ਦੀ ਬਜਾਏ ਦੂਰੀ (Distance) ਦੇ ਆਧਾਰ 'ਤੇ ਚਾਰਜ ਲਗਾਉਣ ਦਾ ਨਵਾਂ ਨਿਯਮ ਪੇਸ਼ ਕੀਤਾ ਹੈ। ਇਸ ਤਹਿਤ 500 ਕਿਲੋਮੀਟਰ ਤੱਕ ਦੇ ਸਫ਼ਰ ਲਈ 299 ਰੁਪਏ ਅਤੇ 2000 ਕਿਲੋਮੀਟਰ ਤੋਂ ਵੱਧ ਦੀ ਦੂਰੀ ਲਈ 899 ਰੁਪਏ ਸਰਚਾਰਜ ਦੇਣੇ ਹੋਣਗੇ। ਇਹ ਨਿਯਮ ਏਅਰ ਇੰਡੀਆ ਐਕਸਪ੍ਰੈਸ (Air India Express) ਸਮੇਤ ਗਰੁੱਪ ਦੀਆਂ ਸਾਰੀਆਂ ਉਡਾਣਾਂ 'ਤੇ ਲਾਗੂ ਹੋਵੇਗਾ।

ਅੰਤਰਰਾਸ਼ਟਰੀ ਸਫ਼ਰ ਕਰਨ ਵਾਲਿਆਂ ਲਈ ਮੁਸ਼ਕਲਾਂ ਹੋਰ ਵੀ ਵਧ ਗਈਆਂ ਹਨ ਕਿਉਂਕਿ ਉੱਥੇ ਈਂਧਨ ਦੀਆਂ ਕੀਮਤਾਂ ਨਿਯੰਤ੍ਰਿਤ (Unregulated) ਨਹੀਂ ਹਨ। ਸਭ ਤੋਂ ਵੱਧ ਪ੍ਰਭਾਵ ਉੱਤਰੀ ਅਮਰੀਕਾ ਅਤੇ ਆਸਟ੍ਰੇਲੀਆ ਜਾਣ ਵਾਲੀਆਂ ਉਡਾਣਾਂ 'ਤੇ ਪਵੇਗਾ ਜਿੱਥੇ 280 ਡਾਲਰ ਦਾ ਸਰਚਾਰਜ ਵਸੂਲਿਆ ਜਾਵੇਗਾ, ਜਦੋਂ ਕਿ ਯੂਰਪ ਅਤੇ ਯੂਕੇ (UK) ਲਈ ਇਹ ਚਾਰਜ 205 ਡਾਲਰ ਨਿਰਧਾਰਤ ਕੀਤਾ ਗਿਆ ਹੈ। ਹਾਲਾਂਕਿ, ਉਨ੍ਹਾਂ ਯਾਤਰੀਆਂ ਲਈ ਰਾਹਤ ਦੀ ਖ਼ਬਰ ਹੈ ਜਿਨ੍ਹਾਂ ਨੇ 8 ਜਾਂ 10 ਅਪ੍ਰੈਲ ਤੋਂ ਪਹਿਲਾਂ ਆਪਣੀਆਂ ਟਿਕਟਾਂ ਬੁੱਕ (Booking) ਕਰ ਲਈਆਂ ਹਨ, ਕਿਉਂਕਿ ਉਨ੍ਹਾਂ 'ਤੇ ਇਹ ਵਾਧੂ ਫੀਸ ਲਾਗੂ ਨਹੀਂ ਹੋਵੇਗੀ। ਏਅਰਲਾਈਨ ਦਾ ਕਹਿਣਾ ਹੈ ਕਿ ਵਧਦੀ ਲਾਗਤ (Cost) ਦਾ ਇੱਕ ਹਿੱਸਾ ਉਹ ਅਜੇ ਵੀ ਖ਼ੁਦ ਸਹਿ ਰਹੀ ਹੈ ਤਾਂ ਜੋ ਯਾਤਰੀਆਂ 'ਤੇ ਬਹੁਤ ਜ਼ਿਆਦਾ ਬੋਝ ਨਾ ਪਵੇ।