ਆਹ ਹੁਣ ਕੀ ਬੋਲ ਗਈ ਕੰਗਣਾ ਰਨੌਤ ?

ਹਿਮਾਚਲ ਪ੍ਰਦੇਸ਼ ਦੇ ਮੰਡੀ ਤੋਂ ਭਾਜਪਾ ਸੰਸਦ ਮੈਂਬਰ ਅਤੇ ਬਾਲੀਵੁੱਡ ਅਦਾਕਾਰਾ ਕੰਗਨਾ ਰਣੌਤ ਨੇ ਹਾਲ ਹੀ ਵਿੱਚ ਇੱਕ ਪੋਡਕਾਸਟ ਵਿੱਚ ਆਪਣੇ ਰਾਜਨੀਤਿਕ ਅਨੁਭਵ ਬਾਰੇ ਖੁੱਲ੍ਹ ਕੇ ਗੱਲ ਕੀਤੀ। ਕੰਗਨਾ ਨੇ ਕਿਹਾ ਕਿ ਉਸਨੂੰ ਸੰਸਦ ਮੈਂਬਰ ਹੋਣ ਦਾ ਮਜ਼ਾ ਨਹੀਂ ਆ ਰਿਹਾ, ਕਿਉਂਕਿ ਲੋਕ ਅਕਸਰ ਟੁੱਟੀਆਂ ਨਾਲੀਆਂ ਅਤੇ ਸੜਕਾਂ ਵਰਗੀਆਂ ਸਮੱਸਿਆਵਾਂ ਦੀਆਂ ਸ਼ਿਕਾਇਤਾਂ ਲੈ ਕੇ ਆਉਂਦੇ ਹਨ। ਉਸਨੇ ਮੰਨਿਆ ਕਿ ਇਹ ਅਨੁਭਵ ਓਨਾ ਸੁਹਾਵਣਾ ਨਹੀਂ ਜਿੰਨਾ ਲੋਕ ਸੋਚਦੇ ਹਨ।

ਕੰਗਨਾ ਨੇ ਦੱਸਿਆ ਕਿ ਰਾਜਨੀਤੀ ਉਸਦੇ ਲਈ ਇੱਕ ਨਵਾਂ ਅਤੇ ਚੁਣੌਤੀਪੂਰਨ ਖੇਤਰ ਹੈ। ਉਸਨੇ ਕਿਹਾ, "ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਲੋਕਾਂ ਦੀ ਸੇਵਾ ਕਰਾਂਗੀ। ਇਹ ਸਮਾਜ ਸੇਵਾ ਵਰਗਾ ਕੰਮ ਹੈ, ਜੋ ਕਿ ਮੇਰਾ ਪਿਛੋਕੜ ਨਹੀਂ ਹੈ। ਮੈਂ ਇਸਦੀ ਆਦਤ ਪਾ ਰਹੀ ਹਾਂ, ਪਰ ਮੈਨੂੰ ਇਸਦਾ ਆਨੰਦ ਨਹੀਂ ਆ ਰਿਹਾ।"

ਉਸਨੇ ਹਲਕੇ-ਫੁਲਕੇ ਅੰਦਾਜ਼ ਵਿੱਚ ਕਿਹਾ ਕਿ ਲੋਕ ਉਨ੍ਹਾਂ ਕੋਲ ਅਜਿਹੀਆਂ ਸਮੱਸਿਆਵਾਂ ਲੈ ਕੇ ਆਉਂਦੇ ਹਨ, ਜੋ ਪੰਚਾਇਤ ਜਾਂ ਵਿਧਾਇਕ ਦੇ ਅਧਿਕਾਰ ਖੇਤਰ ਵਿੱਚ ਆਉਂਦੀਆਂ ਹਨ।

"ਕੋਈ ਆ ਕੇ ਕਹਿੰਦਾ ਹੈ, 'ਮੇਰਾ ਨਾਲਾ ਟੁੱਟ ਗਿਆ ਹੈ, ਇਸਨੂੰ ਠੀਕ ਕਰਵਾਓ।' ਮੈਂ ਕਹਿੰਦੀ ਹਾਂ, 'ਮੈਂ ਇੱਕ ਸੰਸਦ ਮੈਂਬਰ ਹਾਂ, ਇਹ ਪੰਚਾਇਤ ਦਾ ਕੰਮ ਹੈ।' ਪਰ ਲੋਕ ਕਹਿੰਦੇ ਹਨ, 'ਤੁਹਾਡੇ ਕੋਲ ਪੈਸੇ ਹਨ, ਤੁਸੀਂ ਇਸਨੂੰ ਕਰਵਾਓ।' ਉਨ੍ਹਾਂ ਨੂੰ ਕੋਈ ਪਰਵਾਹ ਨਹੀਂ ਕਿ ਮੇਰਾ ਕੰਮ ਕੀ ਹੈ।"

ਪ੍ਰਧਾਨ ਮੰਤਰੀ ਬਣਨ ਦੇ ਸਵਾਲ 'ਤੇ ਕੰਗਨਾ ਨੇ ਸਪੱਸ਼ਟ ਕੀਤਾ ਕਿ ਉਹ ਭਵਿੱਖ ਵਿੱਚ ਪ੍ਰਧਾਨ ਮੰਤਰੀ ਨਹੀਂ ਬਣਨਾ ਚਾਹੁੰਦੀ। ਉਸਨੇ ਕਿਹਾ,

"ਮੈਨੂੰ ਨਹੀਂ ਲੱਗਦਾ ਕਿ ਮੇਰੇ ਵਿੱਚ ਇੰਨਾ ਸਬਰ ਜਾਂ ਜਨੂੰਨ ਹੈ ਕਿ ਮੈਂ ਇਸ ਰਸਤੇ 'ਤੇ ਲੰਬੇ ਸਮੇਂ ਤੱਕ ਚੱਲ ਸਕਾਂ।"

ਹਾਲ ਹੀ ਵਿੱਚ ਮੰਡੀ ਵਿੱਚ ਹੜ੍ਹਾਂ ਕਾਰਨ ਹੋਈ ਤਬਾਹੀ ਦੌਰਾਨ, ਕੰਗਨਾ ਦੀ ਗੈਰਹਾਜ਼ਰੀ 'ਤੇ ਵੀ ਚਰਚਾ ਹੋਈ। ਉਸਨੇ ਸਪੱਸ਼ਟ ਕੀਤਾ ਕਿ ਸੜਕ ਸੰਪਰਕ ਦੀਆਂ ਸਮੱਸਿਆਵਾਂ ਕਰਕੇ ਉਹ ਪ੍ਰਭਾਵਿਤ ਖੇਤਰਾਂ ਵਿੱਚ ਨਹੀਂ ਪਹੁੰਚ ਸਕੀ, ਪਰ ਹਾਲਾਤ ਆਮ ਹੋਣ 'ਤੇ ਲੋਕਾਂ ਦੀ ਮਦਦ ਲਈ ਜ਼ਰੂਰ ਪਹੁੰਚੇਗੀ।