ਪੁਲਾੜ ਇਤਿਹਾਸ ਵਿੱਚ ਨਵਾਂ ਅਧਿਆਏ: Artemis II ਨੇ ਤੋੜਿਆ Apollo-13 ਦਾ 56 ਸਾਲ ਪੁਰਾਣਾ ਰਿਕਾਰਡ

ਧਰਤੀ ਤੋਂ 4 ਲੱਖ ਕਿਲੋਮੀਟਰ ਦੂਰ ਪਹੁੰਚੇ ਚਾਰ ਪੁਲਾੜ ਯਾਤਰੀ

ਵਾਸ਼ਿੰਗਟਨ: ਨਾਸਾ (NASA) ਦੇ ਆਰਟੇਮਿਸ II (Artemis II) ਮਿਸ਼ਨ ਨੇ ਮਨੁੱਖੀ ਪੁਲਾੜ ਯਾਤਰਾ ਦੇ ਇਤਿਹਾਸ ਵਿੱਚ ਇੱਕ ਬੇਮਿਸਾਲ ਮੀਲ ਪੱਥਰ ਸਥਾਪਤ ਕਰਦਿਆਂ 1970 ਦੇ ਅਪੋਲੋ 13 ਮਿਸ਼ਨ ਦਾ ਸਭ ਤੋਂ ਵੱਧ ਦੂਰੀ ਵਾਲਾ ਰਿਕਾਰਡ ਮਾਤ ਦੇ ਦਿੱਤਾ ਹੈ। 6 ਅਪ੍ਰੈਲ ਨੂੰ ਭਾਰਤੀ ਸਮੇਂ ਅਨੁਸਾਰ ਰਾਤ 11:26 ਵਜੇ ਓਰੀਅਨ (Orion) ਪੁਲਾੜ ਯਾਨ ਵਿੱਚ ਸਵਾਰ ਚਾਰ ਪੁਲਾੜ ਯਾਤਰੀਆਂ ਨੇ ਧਰਤੀ ਤੋਂ 4,00,171 ਕਿਲੋਮੀਟਰ ਦੀ ਪੁਰਾਣੀ ਸੀਮਾ ਨੂੰ ਪਾਰ ਕਰ ਲਿਆ ਅਤੇ ਲਗਭਗ 4,06,771 ਕਿਲੋਮੀਟਰ ਦੀ ਵੱਧ ਤੋਂ ਵੱਧ ਦੂਰੀ (Maximum Distance) 'ਤੇ ਪਹੁੰਚ ਕੇ ਨਵਾਂ ਵਰਲਡ ਰਿਕਾਰਡ ਬਣਾਇਆ। ਚੰਦਰਮਾ ਦੇ ਪਿਛਲੇ ਹਿੱਸੇ (Far Side of the Moon) ਤੋਂ ਗੁਜ਼ਰਦਿਆਂ ਇਹ ਯਾਨ ਸਤ੍ਹਾ ਤੋਂ ਸਿਰਫ਼ 6,545 ਕਿਲੋਮੀਟਰ ਦੀ ਦੂਰੀ 'ਤੇ ਸੀ ਜਿੱਥੇ ਚਾਲਕ ਦਲ ਨੇ ਇਸ ਇਤਿਹਾਸਕ ਪਲ ਦਾ ਜਸ਼ਨ ਇੱਕ-ਦੂਜੇ ਨੂੰ ਜੱਫੀ ਪਾ ਕੇ ਮਨਾਇਆ।

ਇਸ ਮਿਸ਼ਨ ਦੌਰਾਨ ਕੈਨੇਡੀਅਨ ਪੁਲਾੜ ਯਾਤਰੀ ਜੇਰੇਮੀ ਹੈਨਸਨ ਨੇ ਚੰਦਰਮਾ ਦੀ ਸਤ੍ਹਾ 'ਤੇ ਮੌਜੂਦ ਦੋ ਨਵੇਂ ਕ੍ਰੇਟਰਸ (Craters) ਦਾ ਨਾਮਕਰਨ ਕਰਨ ਦੀ ਭਾਵੁਕ ਬੇਨਤੀ ਵੀ ਕੀਤੀ ਹੈ ਜਿਸ ਵਿੱਚੋਂ ਇੱਕ ਦਾ ਨਾਮ ਮਿਸ਼ਨ ਕਮਾਂਡਰ ਰੀਡ ਵਾਈਜ਼ਮੈਨ ਦੀ ਸਵਰਗੀ ਪਤਨੀ ਦੇ ਸਨਮਾਨ ਵਿੱਚ 'ਕੈਰਲ' ਰੱਖਣ ਦਾ ਸੁਝਾਅ ਦਿੱਤਾ ਗਿਆ ਹੈ। ਆਰਟੇਮਿਸ II ਮਿਸ਼ਨ ਵਿੱਚ ਪਹਿਲੀ ਵਾਰ ਇੱਕ ਮਹਿਲਾ ਪੁਲਾੜ ਯਾਤਰੀ ਕ੍ਰਿਸਟੀਨਾ ਕੋਚ ਅਤੇ ਪਹਿਲੇ ਕਾਲੇ ਵਿਅਕਤੀ ਵਿਕਟਰ ਗਲੋਵਰ ਚੰਦਰਮਾ ਦੇ ਇੰਨੇ ਨੇੜੇ ਪਹੁੰਚੇ ਹਨ ਜੋ ਭਵਿੱਖ ਵਿੱਚ ਮਨੁੱਖੀ ਬਸਤੀਆਂ ਸਥਾਪਤ ਕਰਨ ਦੀ ਦਿਸ਼ਾ ਵਿੱਚ ਇੱਕ ਵੱਡੀ ਕਾਮਯਾਬੀ ਹੈ। ਨਾਸਾ ਇਸ ਮਿਸ਼ਨ ਰਾਹੀਂ ਪੁਲਾੜ ਯਾਨ ਦੇ ਲਾਈਫ ਸਪੋਰਟ ਸਿਸਟਮ (Life Support System) ਦੀ ਸਖ਼ਤ ਜਾਂਚ ਕਰ ਰਿਹਾ ਹੈ ਤਾਂ ਜੋ ਪੁਲਾੜ ਯਾਤਰੀਆਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾ ਸਕੇ।

ਹੁਣ ਇਹ ਪੁਲਾੜ ਯਾਨ ਚੰਦਰਮਾ ਦੀ ਗੁਰੂਤਾ ਸ਼ਕਤੀ (Lunar Gravity) ਦੀ ਵਰਤੋਂ ਇੱਕ ਗੁਲੇਲੇ (Slingshot) ਵਜੋਂ ਕਰਕੇ ਧਰਤੀ ਵੱਲ ਆਪਣੀ ਵਾਪਸੀ ਦੀ ਯਾਤਰਾ ਸ਼ੁਰੂ ਕਰ ਚੁੱਕਾ ਹੈ। ਪੂਰੇ ਮਿਸ਼ਨ ਦੌਰਾਨ ਲਗਭਗ 1.1 ਮਿਲੀਅਨ ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਨ ਤੋਂ ਬਾਅਦ ਓਰੀਅਨ ਕੈਪਸੂਲ 11 ਅਪ੍ਰੈਲ ਨੂੰ ਭਾਰਤੀ ਸਮੇਂ ਅਨੁਸਾਰ ਸਵੇਰੇ 5:36 ਵਜੇ ਸੈਨ ਡਿਏਗੋ ਦੇ ਨੇੜੇ ਪ੍ਰਸ਼ਾਂਤ ਮਹਾਸਾਗਰ (Pacific Ocean) ਵਿੱਚ ਲੈਂਡ ਕਰੇਗਾ। 1972 ਵਿੱਚ ਅਪੋਲੋ 17 ਤੋਂ ਬਾਅਦ ਇਹ ਪਹਿਲਾ ਮੌਕਾ ਹੈ ਜਦੋਂ ਇਨਸਾਨ ਧਰਤੀ ਦੇ ਹੇਠਲੇ ਪੰਧ (Low Earth Orbit) ਤੋਂ ਇੰਨੀ ਦੂਰ ਗਿਆ ਹੈ ਅਤੇ ਇਹ ਸਫ਼ਲਤਾ ਨਾਸਾ ਦੇ ਮੰਗਲ ਗ੍ਰਹਿ (Mars) ਤੱਕ ਪਹੁੰਚਣ ਦੇ ਸੁਪਨੇ ਨੂੰ ਪੂਰਾ ਕਰਨ ਵਿੱਚ ਮਦਦਗਾਰ ਸਾਬਤ ਹੋਵੇਗੀ।