ਨਾਸਾ ਦੀ ਚੇਤਾਵਨੀ: ਐਸਟੇਰਾਇਡ ਤੇਜ਼ ਰਫ਼ਤਾਰ ਨਾਲ ਧਰਤੀ ਵਲ ਆ ਰਿਹੈ

ਨਾਸਾ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇੱਕ ਵਿਸ਼ਾਲ ਐਸਟੇਰਾਇਡ ਜਿਸਦਾ ਨਾਮ FA22 ਹੈ, 18 ਸਤੰਬਰ, 2025 ਨੂੰ ਧਰਤੀ ਦੇ ਨੇੜਿਓਂ ਲੰਘਣ ਵਾਲਾ ਹੈ। ਇਹ ਐਸਟੇਰਾਇਡ, ਜਿਸਦਾ ਆਕਾਰ 120 ਤੋਂ 280 ਮੀਟਰ ਦੇ ਵਿਚਕਾਰ ਹੋਣ ਦਾ ਅਨੁਮਾਨ ਹੈ, ਦਿੱਲੀ ਦੇ ਕੁਤੁਬ ਮੀਨਾਰ (73 ਮੀਟਰ) ਤੋਂ ਵੀ ਵੱਡਾ ਹੈ। ਇਹ 38,838 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਤੇਜ਼ ਰਫ਼ਤਾਰ ਨਾਲ ਗਤੀ ਕਰ ਰਿਹਾ ਹੈ।

ਨਾਸਾ ਦੇ ਸੈਂਟਰ ਫਾਰ ਨੀਅਰ-ਅਰਥ ਆਬਜੈਕਟ ਸਟੱਡੀਜ਼ (CNEOS) ਅਤੇ ਜੈੱਟ ਪ੍ਰੋਪਲਸ਼ਨ ਲੈਬਾਰਟਰੀ (JPL) ਇਸ ਐਸਟੇਰਾਇਡ 'ਤੇ ਲਗਾਤਾਰ ਨਜ਼ਰ ਰੱਖ ਰਹੇ ਹਨ। ਇਹ ਐਸਟੇਰਾਇਡ ਸੂਰਜ ਦੁਆਲੇ ਘੁੰਮਦਾ ਹੈ ਅਤੇ ਲਗਭਗ ਹਰ 1.85 ਸਾਲਾਂ ਵਿੱਚ ਆਪਣਾ ਚੱਕਰ ਪੂਰਾ ਕਰਦਾ ਹੈ।

FA22 ਧਰਤੀ ਤੋਂ ਲਗਭਗ 842,000 ਕਿਲੋਮੀਟਰ ਦੀ ਦੂਰੀ ਤੋਂ ਲੰਘੇਗਾ। ਹਾਲਾਂਕਿ ਇਹ ਦੂਰੀ ਚੰਦਰਮਾ ਅਤੇ ਧਰਤੀ ਦੀ ਦੂਰੀ ਤੋਂ ਲਗਭਗ ਦੁੱਗਣੀ ਹੈ, ਨਾਸਾ ਨੇ ਇਸਨੂੰ "ਸੰਭਾਵੀ ਤੌਰ 'ਤੇ ਖ਼ਤਰਨਾਕ" ਵਜੋਂ ਸ਼੍ਰੇਣੀਬੱਧ ਕੀਤਾ ਹੈ। ਕਿਸੇ ਵੀ ਐਸਟੇਰਾਇਡ ਨੂੰ ਖ਼ਤਰਨਾਕ ਮੰਨਿਆ ਜਾਂਦਾ ਹੈ ਜੇਕਰ ਉਸਦਾ ਆਕਾਰ 85 ਮੀਟਰ ਤੋਂ ਵੱਡਾ ਹੋਵੇ ਅਤੇ ਉਹ ਧਰਤੀ ਤੋਂ 7.4 ਮਿਲੀਅਨ ਕਿਲੋਮੀਟਰ ਦੀ ਦੂਰੀ ਦੇ ਅੰਦਰੋਂ ਲੰਘੇ।

ਵਿਗਿਆਨੀਆਂ ਨੇ ਮੌਜੂਦਾ ਅੰਕੜਿਆਂ ਦੇ ਆਧਾਰ 'ਤੇ ਇਹ ਸਪੱਸ਼ਟ ਕੀਤਾ ਹੈ ਕਿ ਇਸ ਐਸਟੇਰਾਇਡ ਦੇ ਧਰਤੀ ਨਾਲ ਟਕਰਾਉਣ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਪਰ ਗ੍ਰੈਵੀਟੇਸ਼ਨਲ ਫੋਰਸ ਅਤੇ ਸੂਰਜੀ ਰੇਡੀਏਸ਼ਨ ਦੇ ਪ੍ਰਭਾਵ ਕਾਰਨ ਐਸਟੇਰਾਇਡ ਆਪਣਾ ਰਸਤਾ ਬਦਲ ਸਕਦੇ ਹਨ, ਇਸ ਲਈ ਵਿਗਿਆਨੀ ਇਸਦੀ ਨਿਰੰਤਰ ਨਿਗਰਾਨੀ ਕਰ ਰਹੇ ਹਨ।