ਮਜੀਠੀਆ ਦਾ ਦਾਅਵਾ- ਅੰਮ੍ਰਿਤਪਾਲ ਦੇ ਗੈਂਗਸਟਰਾਂ ਨਾਲ ਸਬੰਧ ਹਨ

ਅੰਮ੍ਰਿਤਸਰ – ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਬਿਕਰਮ ਸਿੰਘ ਮਜੀਠੀਆ ਨੇ ਸੋਮਵਾਰ ਨੂੰ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ 'ਤੇ ਤਿੰਨ ਆਡੀਓ ਕਲਿੱਪਾਂ ਜਾਰੀ ਕਰਦੇ ਹੋਏ ਦਾਅਵਾ ਕੀਤਾ ਕਿ ਖਡੂਰ ਸਾਹਿਬ ਤੋਂ ਸੰਸਦ ਮੈਂਬਰ ਅੰਮ੍ਰਿਤਪਾਲ ਸਿੰਘ ਦੀ ਸਿੱਧੀ ਗੱਲਬਾਤ ਗੈਂਗਸਟਰਾਂ ਨਾਲ ਸੀ। ਉਨ੍ਹਾਂ ਨੇ ਕਿਹਾ ਕਿ ਇਹ ਆਡੀਓਜ਼ ਅੰਮ੍ਰਿਤਪਾਲ ਸਿੰਘ ਦੀਆਂ ਗੰਭੀਰ ਅਪਰਾਧਿਕ ਗਤੀਵਿਧੀਆਂ ਦੀ ਪੁਸ਼ਟੀ ਕਰਦੀਆਂ ਹਨ।

ਆਡੀਓਜ਼ ਵਿੱਚ ਕੀ ਕਿਹਾ ਗਿਆ?

ਮਜੀਠੀਆ ਨੇ ਦੱਸਿਆ ਕਿ ਆਡੀਓ ਕਲਿੱਪਾਂ ਵਿੱਚ ਅੰਮ੍ਰਿਤਪਾਲ ਸਿੱਧਾ ਇੱਕ ਅਣਜਾਣ ਵਿਅਕਤੀ ਨਾਲ ਗੱਲ ਕਰਦਾ ਸੁਣਿਆ ਜਾ ਸਕਦਾ ਹੈ, ਜਿੱਥੇ ਉਹ ਡਕੈਤੀ, ਜਬਰੀ ਵਸੂਲੀ, ਗੈਂਗਸਟਰ ਜੈਪਾਲ ਭੁੱਲਰ ਨਾਲ ਸਬੰਧ, ਹਥਿਆਰਾਂ ਦੀ ਖਰੀਦ ਅਤੇ ਅੰਤਰਰਾਸ਼ਟਰੀ ਲੈਣ-ਦੇਣ ਬਾਰੇ ਗੱਲ ਕਰ ਰਿਹਾ ਹੈ।

ਆਡੀਓ ਰਿਕਾਰਡਿੰਗਜ਼ ਤੋਂ ਨਿਕਲੀਆਂ ਮੁੱਖ ਗੱਲਾਂ:

ਲੁੱਟ ਵਿੱਚ ਹਿੱਸਾ:

ਅੰਮ੍ਰਿਤਪਾਲ ਕਹਿੰਦਾ ਸੁਣਿਆ ਜਾ ਸਕਦਾ ਹੈ ਕਿ ਜੈਪਾਲ ਭੁੱਲਰ ਦੁਆਰਾ ਕੀਤੀ ਲੁੱਟ ਵਿੱਚ ਉਸਦਾ 10 ਲੱਖ ਰੁਪਏ ਦਾ ਹਿੱਸਾ ਸੀ। ਉਹ ਕਹਿੰਦਾ ਕਿ ਇਹ ਪੈਸਾ "ਭਾਈਚਾਰਕ ਮੁੱਦਿਆਂ" ਲਈ ਵਰਤਣਾ ਸੀ।

ਹਥਿਆਰਾਂ ਦੀ ਡੀਲ ਅਤੇ ਪੁਲਿਸ ਨਾਲ ਮਿਲੀਭੁਗਤ:

ਆਡੀਓ ਵਿੱਚ ਹਥਿਆਰਾਂ ਦੀ ਡੀਲ ਦਾ ਜ਼ਿਕਰ ਹੈ, ਜੋ ਕਿ ਫਗਵਾੜਾ ਵਿੱਚ ਆਉਣੀ ਸੀ। ਕਿਹਾ ਗਿਆ ਕਿ ਕੁਝ ਪੁਲਿਸ ਅਧਿਕਾਰੀ ਵੀ ਇਸ ਵਿੱਚ ਸ਼ਾਮਿਲ ਸਨ, ਜੋ ਭਾਰੀ ਰਕਮ ਲੈ ਰਹੇ ਸਨ।

ਸੋਨੇ ਅਤੇ ਡਾਲਰ ਦਾ ਲੈਣ-ਦੇਣ:

ਅੰਮ੍ਰਿਤਪਾਲ ਕਹਿੰਦਾ ਹੈ ਕਿ ਉਸਨੇ ਅਮਰੀਕਾ ਤੋਂ 15-20 ਹਜ਼ਾਰ ਡਾਲਰ ਅਤੇ ਕੁਝ ਸੋਨਾ ਮੰਗਵਾਉਣ ਦੀ ਯੋਜਨਾ ਬਣਾਈ ਸੀ। ਇਹ ਦੱਸਿਆ ਗਿਆ ਕਿ ਟਰੈਕਿੰਗ ਵਧਣ ਕਰਕੇ ਲੈਣ-ਦੇਣ ਵਿਚ ਰੁਕਾਵਟ ਆਈ।

ਆਡੀਓ ਵਿੱਚ ਅੰਮ੍ਰਿਤਪਾਲ ਕਹਿੰਦਾ ਹੈ, "ਮੈਂ ਹੀ ਡਕੈਤੀ ਕੀਤੀ ਸੀ, ਇਹ ਮੇਰੇ ਨਿੱਜੀ ਪੈਸੇ ਹਨ।" ਜਿਸ ਨਾਲ ਉਸਦੀ ਸਿੱਧੀ ਸ਼ਮੂਲੀਅਤ ਦੀ ਪੁਸ਼ਟੀ ਹੁੰਦੀ ਹੈ।

ਅੰਮ੍ਰਿਤਪਾਲ ਉੱਤੇ ਹੋਰ ਇਲਜ਼ਾਮ: ਮਜੀਠੀਆ ਨੇ ਦਾਅਵਾ ਕੀਤਾ ਕਿ ਅੰਮ੍ਰਿਤਪਾਲ ਡਿਬਰੂਗੜ੍ਹ ਜੇਲ੍ਹ ਵਿੱਚ ਟ੍ਰਾਮਾਡੋਲ ਦੀਆਂ ਗੋਲੀਆਂ ਲੈਂਦਾ ਹੈ। ਇਹ ਜਾਣਕਾਰੀ ਉਸਦੇ ਸਾਥੀ ਦਲਜੀਤ ਕਲਸੀ ਨੇ ਦਿੱਤੀ, ਜੋ ਜੇਲ੍ਹ ਤੋਂ ਰਿਹਾ ਹੋਇਆ ਹੈ। ਦਲਜੀਤ ਨੇ ਇਹ ਵੀ ਦੱਸਿਆ ਕਿ ਅੰਮ੍ਰਿਤਪਾਲ ਕੋਲ ਜੇਲ੍ਹ ਵਿੱਚ ਮੋਬਾਈਲ ਵੀ ਸੀ।

ਰਾਜਨੀਤਿਕ ਪਿਛੋਕੜ 'ਚ ਵੀ ਦਾਅਵੇ:

ਮਜੀਠੀਆ ਨੇ ਦੱਸਿਆ ਕਿ 2019 ਵਿੱਚ ਜਦੋਂ ਪਰਮਜੀਤ ਕੌਰ ਖਾਲੜਾ ਚੋਣ ਲੜ ਰਹੀ ਸਨ, ਤਾਂ ਅੰਮ੍ਰਿਤਪਾਲ ਦਾ ਪਰਿਵਾਰ ਉਨ੍ਹਾਂ ਦੇ ਵਿਰੁੱਧ ਸੀ ਅਤੇ ਕਾਂਗਰਸ ਦੀ ਮਦਦ ਕਰ ਰਹੀ ਸੀ।

ਜਾਂਚ ਦੀ ਮੰਗ:

ਮਜੀਠੀਆ ਨੇ ਕੇਂਦਰ ਸਰਕਾਰ ਅਤੇ ਐਨਆਈਏ ਤੋਂ ਤੁਰੰਤ ਜਾਂਚ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਇੱਕ ਸੰਸਦ ਮੈਂਬਰ ਖੁਦ ਇਨ੍ਹਾਂ ਗੰਭੀਰ ਅਪਰਾਧਾਂ ਵਿੱਚ ਸ਼ਮੂਲੀਅਤ ਸਵੀਕਾਰ ਕਰ ਰਿਹਾ ਹੈ, ਤਾਂ ਹੁਣ ਦੇਰੀ ਨਹੀਂ ਹੋਣੀ ਚਾਹੀਦੀ।