IND vs ENG: ਕੀ ਰੋਹਿਤ-ਵਿਰਾਟ ਤੀਜੇ ਟੈਸਟ ਵਿੱਚ ਨਜ਼ਰ ਆਉਣਗੇ ?
ਬੀਸੀਸੀਆਈ ਵੱਲੋਂ ਦੋਵੇਂ ਪੂਰਵ ਕਪਤਾਨਾਂ ਨੂੰ ਖਾਸ ਤੌਰ 'ਤੇ ਸੱਦਾ ਦਿੱਤਾ ਗਿਆ ਹੈ, ਤਾਂ ਜੋ ਉਹ ਟੀਮ ਨੂੰ ਮੋਟਿਵੇਟ ਕਰ ਸਕਣ ਅਤੇ ਨਵੇਂ ਖਿਡਾਰੀਆਂ ਨੂੰ ਆਪਣਾ ਤਜਰਬਾ ਸਾਂਝਾ ਕਰ ਸਕਣ।
ਭਾਰਤ ਅਤੇ ਇੰਗਲੈਂਡ ਵਿਚਕਾਰ ਚੱਲ ਰਹੀ ਟੈਸਟ ਲੜੀ ਵਿੱਚ ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਦੇ ਪ੍ਰਸ਼ੰਸਕਾਂ ਲਈ ਖ਼ੁਸ਼ਖਬਰੀ ਹੈ। ਹਾਲਾਂਕਿ ਦੋਵੇਂ ਦਿੱਗਜ ਖਿਡਾਰੀ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਚੁੱਕੇ ਹਨ, ਪਰ ਨਵੀਂ ਰਿਪੋਰਟਾਂ ਮੁਤਾਬਕ ਉਹ ਤੀਜੇ ਟੈਸਟ ਮੈਚ ਦੌਰਾਨ ਲਾਰਡਜ਼ ਸਟੇਡੀਅਮ ਵਿੱਚ ਮੌਜੂਦ ਹੋ ਸਕਦੇ ਹਨ। ਇਹ ਮੈਚ ਲੰਡਨ ਦੇ ਲਾਰਡਜ਼ ਮੈਦਾਨ 'ਤੇ ਹੋਣ ਵਾਲਾ ਹੈ ਅਤੇ ਉਮੀਦ ਹੈ ਕਿ ਰੋਹਿਤ-ਵਿਰਾਟ ਨੂੰ ਸਟੇਡੀਅਮ ਵਿੱਚ ਇੱਕਠੇ ਦੇਖਿਆ ਜਾਵੇਗਾ, ਜਿਸ ਨਾਲ ਮੈਚ ਦਾ ਉਤਸ਼ਾਹ ਹੋਰ ਵਧ ਜਾਵੇਗਾ।
ਰਿਪੋਰਟਾਂ ਵਿੱਚ ਦੱਸਿਆ ਗਿਆ ਹੈ ਕਿ ਬੀਸੀਸੀਆਈ ਵੱਲੋਂ ਦੋਵੇਂ ਪੂਰਵ ਕਪਤਾਨਾਂ ਨੂੰ ਖਾਸ ਤੌਰ 'ਤੇ ਸੱਦਾ ਦਿੱਤਾ ਗਿਆ ਹੈ, ਤਾਂ ਜੋ ਉਹ ਟੀਮ ਨੂੰ ਮੋਟਿਵੇਟ ਕਰ ਸਕਣ ਅਤੇ ਨਵੇਂ ਖਿਡਾਰੀਆਂ ਨੂੰ ਆਪਣਾ ਤਜਰਬਾ ਸਾਂਝਾ ਕਰ ਸਕਣ। ਜੇਕਰ ਇਹ ਰਿਪੋਰਟਾਂ ਸੱਚ ਸਾਬਤ ਹੁੰਦੀਆਂ ਹਨ, ਤਾਂ ਪ੍ਰਸ਼ੰਸਕਾਂ ਲਈ ਇਹ ਵੱਡੀ ਖ਼ੁਸ਼ਖਬਰੀ ਹੋਵੇਗੀ, ਕਿਉਂਕਿ ਉਹ ਆਪਣੇ ਮਨਪਸੰਦ ਖਿਡਾਰੀਆਂ ਨੂੰ ਫਿਰ ਇੱਕ ਵਾਰ ਮੈਚ ਦੇ ਮਾਹੌਲ ਵਿੱਚ ਦੇਖ ਸਕਣਗੇ।
ਰੋਹਿਤ ਸ਼ਰਮਾ ਨੇ 67 ਟੈਸਟ ਮੈਚਾਂ ਵਿੱਚ 4301 ਦੌੜਾਂ, 12 ਸੈਂਕੜੇ ਅਤੇ 1 ਦੋਹਰਾ ਸੈਂਕੜਾ ਬਣਾਇਆ, ਜਦਕਿ ਵਿਰਾਟ ਕੋਹਲੀ ਨੇ 123 ਟੈਸਟਾਂ ਵਿੱਚ 9230 ਦੌੜਾਂ, 30 ਸੈਂਕੜੇ ਅਤੇ 7 ਦੋਹਰੇ ਸੈਂਕੜੇ ਜੜੇ। ਦੋਵੇਂ ਨੇ ਹਾਲ ਹੀ ਵਿੱਚ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਕੇ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ ਸੀ।
ਦੂਜੇ ਪਾਸੇ, ਸ਼ੁਭਮਨ ਗਿੱਲ ਦੀ ਕਪਤਾਨੀ ਹੇਠ ਭਾਰਤੀ ਟੀਮ ਇੰਗਲੈਂਡ ਦੌਰੇ 'ਤੇ ਪਹਿਲਾ ਟੈਸਟ ਹਾਰ ਚੁੱਕੀ ਹੈ, ਪਰ ਦੂਜੇ ਟੈਸਟ ਵਿੱਚ ਜਿੱਤ ਦੇ ਨੇੜੇ ਹੈ। ਭਾਰਤ ਨੇ ਇੰਗਲੈਂਡ ਨੂੰ 608 ਦੌੜਾਂ ਦਾ ਟੀਚਾ ਦਿੱਤਾ ਹੈ, ਜਿਸਨੂੰ ਪੂਰਾ ਕਰਨਾ ਇਤਿਹਾਸਕ ਤੌਰ 'ਤੇ ਲਗਭਗ ਅਸੰਭਵ ਹੈ। ਪ੍ਰਸ਼ੰਸਕ ਉਮੀਦ ਕਰ ਰਹੇ ਹਨ ਕਿ ਟੀਮ ਇੰਡੀਆ ਦੂਜੇ ਟੈਸਟ 'ਚ ਜਿੱਤ ਹਾਸਲ ਕਰਕੇ ਲੜੀ ਵਿੱਚ ਵਾਪਸੀ ਕਰੇਗੀ।